IPLમાં ટીમો એકબીજાને પાછળ છોડી દેવા માટે સ્પર્ધા કરી રહી છે,ત્યારે ખેલાડીઓ પણ રન માટે જોરદાર લડાઈમાં વ્યસ્ત છે. અત્યાર સુધી વીસ મેચ રમાઈ ચૂકી છે, અને ઓરેન્જ કેપ માટેની લડાઈ ખૂબ જ રસપ્રદ બની ગઈ છે. રાજસ્થાન રોયલ્સના ઓપનર વૈભવ સૂર્યવંશી હાલમાં સ્કોરિંગ ચાર્ટમાં સૌથી આગળ છે, ત્યારે RCBના કેપ્ટન રજત પાટીદારે પણ પોતાનો દાવો રજૂ કર્યો છે. નોંધનીય છે કે, અત્યાર સુધીમાં ફક્ત એક જ બેટ્સમેન 200 રનનો આંકડો પાર કરવામાં સફળ રહ્યો છે.
વૈભવ સૂર્યવંશીએ આ વર્ષની IPLમાં સૌથી વધુ રન બનાવ્યા
આ વર્ષની IPLમાં ઓરેન્જ કેપ માટેની દોડ વધુને વધુ રસપ્રદ બની રહી છે.હાલમાં રવિવાર રાત્રિની મેચ પછી એટલે કે 12 એપ્રિલ સુધી,રાજસ્થાન રોયલ્સના વૈભવ સૂર્યવંશીએ સૌથી વધુ રન બનાવવાનો રેકોર્ડ બનાવ્યો છે.તેણે અત્યાર સુધીમાં ચાર મેચમાં 200 રન બનાવ્યા છે, જેમાં 50 ની સરેરાશ છે અને 266.67 ના સ્ટ્રાઈક રેટથી સ્કોર કર્યો છે. તેણે અત્યાર સુધીમાં 18 ચોગ્ગા અને 18 છગ્ગા ફટકારવામાં સફળ રહ્યો છે.
રજત પાટીદાર વૈભવ વચ્ચે ટક્કર
આ દરમિયાન, રજત પાટીદાર તેને કઠિન સ્પર્ધા આપી રહ્યો છે. રજત પાટીદાર આરસીબીના કેપ્ટન છે અને તેમની કેપ્ટનશીપ હેઠળ, આરસીબીએ ગયા વર્ષે આઈપીએલનો ખિતાબ જીત્યો હતો. આ સિઝનમાં, રજતે ચાર મેચમાં 195 રન બનાવ્યા છે, જેના કારણે તે વૈભવ સૂર્યવંશીથી ફક્ત પાંચ રન પાછળ છે. રજત પાટીદારની સરેરાશ 65 છે, જે વૈભવ કરતા પણ વધુ છે. તેણે હવે 214.29 ના સ્ટ્રાઇક રેટથી રન બનાવ્યા છે. તેણે 11 ચોગ્ગા અને 18 છગ્ગા ફટકાર્યા છે.
હેનરિક ક્લાસેન અને યશસ્વી જયસ્વાલ પણ રેસમાં
જ્યારે પ્રથમ બે સ્થાનો ભારતીય બેટ્સમેનોના કબજામાં છે, ત્યારે ત્રીજા સ્થાન પર હાલમાં હેનરિક ક્લાસેન છે, જેમણે ચાર મેચમાં 184 રન બનાવ્યા છે. તે સનરાઇઝર્સ હૈદરાબાદ માટે રમે છે અને હાલમાં સારું પ્રદર્શન કરી રહ્યો છે. યશસ્વી જયસ્વાલે રાજસ્થાન રોયલ્સ માટે ચાર મેચમાં 183 રન બનાવ્યા છે. રાજસ્થાન રોયલ્સ આ સિઝનમાં એક પણ મેચ હાર્યું નથી. આનો શ્રેય ટીમની ઓપનિંગ જોડીને જાય છે, જેમણે શાનદાર બેટિંગ કરી છે. આગામી મેચોમાં કયો બેટ્સમેન વૈભવને પાછળ છોડીને ઓરેન્જ કેપ જીતે છે તે જોવાનું બાકી છે.
આ પણ વાંચો - IPL 2026: પંડ્યા બ્રધર્સમાં અણબનાવના અણસાર, હાર્દિક પંડ્યાએ ક્રુણાલ વિશે કરી આવી પોસ્ટ
