સરકારી નોકરીની જવાબદારીઓ વચ્ચે રમતગમત માટે સમય કાઢવો સહેલો નથી, પરંતુ ભારતીય રેવન્યુ સર્વિસ (IRS)નાં અધિકારી એકતા વિષ્ણોઈએ પોતાની મહેનતથી આ વાત સાચી સાબિત કરી છે. અમેરિકાના નેવાડામાં યોજાયેલી વર્લ્ડ માસ્ટર્સ ક્લાસિક એન્ડ ઇક્વિપ્ડ પાવરલિફ્ટિંગ ચેમ્પિયનશિપમાં એકતાએ ત્રણ ગોલ્ડ મેડલ જીતીને ભારતનું નામ રોશન કર્યું છે. 52 વર્ષનાં એકતા વિષ્ણોઈએ મહિલાઓની 50થી 59 વર્ષની ઉંમરવાળી M2 કેટેગરીમાં 57 કિલો વજન વર્ગમાં ભાગ લીધો હતો. તેમણે સ્ક્વોટ, બેન્ચ પ્રેસ અને ડેડલિફ્ટમાં મળીને કુલ 362.5 કિલો વજન ઉઠાવ્યું. આ પ્રદર્શનના આધારે તેમણે ત્રણ ગોલ્ડ મેડલ જીત્યા.

ત્રણ ઇવેન્ટમાં બતાવી તાકાત

એકતા વિષ્ણોઈએ સ્પર્ધામાં ત્રણેય પ્રકારની લિફ્ટમાં શાનદાર પ્રદર્શન કર્યું.

• સ્ક્વોટ: 130 કિલો

• બેન્ચ પ્રેસ: 72.5 કિલો

• ડેડલિફ્ટ: 160 કિલો

• કુલ વજન: 362.5 કિલો

તેમણે કુલ વજનની સ્પર્ધામાં કેનેડાની ખેલાડીને પાછળ રાખી, જેણે 330 કિલો વજન ઉઠાવ્યું હતું. જાપાનની ખેલાડીએ 325 કિલો વજન ઉઠાવી ત્રીજું સ્થાન મેળવ્યું.

હાલમાં કેન્દ્ર સરકારમાં જોઈન્ટ સેક્રેટરી

એકતા વિષ્ણોઈ હાલમાં ભારત સરકારના બાયોટેક્નોલોજી વિભાગમાં જોઈન્ટ સેક્રેટરી તરીકે ફરજ બજાવે છે. તેઓ અગાઉ ભારતીય રમતગમત પ્રાધિકરણ (SAI)માં ડેપ્યુટી ડાયરેક્ટર જનરલ તરીકે પણ કામ કરી ચૂક્યાં છે. આ ઉપરાંત તેમણે ફિટ ઈન્ડિયા મિશનની જવાબદારી પણ સંભાળી હતી. સરકારી ફરજો વચ્ચે આંતરરાષ્ટ્રીય સ્તરે પાવરલિફ્ટિંગમાં આટલી મોટી સફળતા મેળવવી તેમની મહેનત અને શિસ્ત દર્શાવે છે.

45 વર્ષની ઉંમરે શરૂ કરી હતી વેઇટ ટ્રેનિંગ

એકતા વિષ્ણોઈની સફળતાની ખાસ વાત એ છે કે તેમણે નાની ઉંમરથી પાવરલિફ્ટિંગ શરૂ કર્યું નહોતું. તેમણે આશરે 45 વર્ષની ઉંમરે વેઇટ ટ્રેનિંગ શરૂ કરી હતી. શરૂઆતમાં તેમનો હેતુ ફિટ રહેવાનો અને સ્વાસ્થ્ય જાળવવાનો હતો. ધીમે-ધીમે તેમણે નિયમિત તાલીમ શરૂ કરી અને સ્પર્ધાત્મક પાવરલિફ્ટિંગમાં આગળ વધ્યાં. હવે 52 વર્ષની ઉંમરે ત્રણ ગોલ્ડ મેડલ જીતીને તેમણે સાબિત કર્યું છે કે રમતગમતમાં આગળ વધવા માટે ઉંમર એકમાત્ર માપદંડ નથી.

કોચના માર્ગદર્શનથી મેળવી સફળતા

એકતા વિષ્ણોઈએ પોતાની સફળતાનો શ્રેય કોચ સુનીલ કુમારને આપ્યો છે. તેમની ટેકનિક અને માર્ગદર્શને પોતાની ક્ષમતા વધારવામાં મદદ કરી હોવાનું એકતાએ જણાવ્યું હતું. તેમણે કહ્યું કે વર્લ્ડ માસ્ટર્સ ચેમ્પિયનશિપમાં ત્રણ ગોલ્ડ મેડલ જીતવા અને આંતરરાષ્ટ્રીય મંચ પર ભારતનું પ્રતિનિધિત્વ કરવું તેમના માટે ગર્વની ક્ષણ છે. 362.5 કિલો વજન ઉઠાવવાનું પરિણામ વર્ષોની મહેનત, શિસ્ત અને ધીરજનું ફળ છે.

એકતાએ આશા વ્યક્ત કરી કે તેમની સફર ખાસ કરીને 40 અને 50 વર્ષની ઉંમરની મહિલાઓને રમતગમતમાં પોતાના સપનાં પૂરાં કરવા માટે પ્રેરણા આપશે.

આ પણ વાંચો: Asian Para Games: હાથ વગર તીરંદાજીમાં દુનિયાને ટક્કર, શીતલ દેવીએ વર્લ્ડ રેકોર્ડની કરી બરાબરી