ભારતીય બેડમિન્ટન માટે 1 નવેમ્બર 2026નો દિવસ યાદગાર બની ગયો છે. જર્મનીના સારબ્રુકેનમાં રમાયેલી હાયલો ઓપન સુપર 500 ટુર્નામેન્ટમાં પીવી સિંધુ બાદ લક્ષ્ય સેને પણ મેન્સ સિંગલ્સનું ટાઇટલ જીતીને ભારતને બેવડી સફળતા અપાવી છે. લક્ષ્યે ફાઇનલમાં ઇન્ડોનેશિયાના જોનાતન ક્રિસ્ટીને સીધી ગેમમાં 21-17, 21-10થી હરાવ્યો હતો. આ જીત સાથે તેણે લગભગ એક વર્ષથી ચાલી રહેલી BWF વર્લ્ડ ટૂર ટાઇટલની રાહનો પણ અંત લાવ્યો છે.
ફાઇનલમાં લક્ષ્યનો દમદાર દેખાવ
જર્મનીના સારલાન્ડહાલેમાં રમાયેલી ફાઇનલમાં લક્ષ્ય સેન અને જોનાતન ક્રિસ્ટી વચ્ચે શરૂઆતમાં જોરદાર ટક્કર જોવા મળી હતી. પ્રથમ ગેમમાં બંને ખેલાડીઓએ એકબીજાને પડકાર આપ્યો હતો, પરંતુ નિર્ણાયક પળોમાં લક્ષ્યે શાનદાર કોર્ટ કવરેજ અને ચોકસાઈભર્યા શોટ્સના આધારે 21-17થી ગેમ જીતી લીધી હતી. બીજી ગેમમાં લક્ષ્યે વધુ આક્રમક રમત બતાવી હતી. તેણે ક્રિસ્ટીને વાપસી કરવાની તક આપી નહોતી અને 21-10થી બીજી ગેમ જીતીને ટાઇટલ પોતાના નામે કર્યું હતું. આ રીતે ભારતીય શટલરે સીધી બે ગેમમાં ફાઇનલ પૂરી કરી હતી.
એક જ દિવસે સિંધુ અને લક્ષ્યની ડબલ ધમાલ
લક્ષ્ય પહેલાં ભારતની પીવી સિંધુએ વિમેન્સ સિંગલ્સની ફાઇનલમાં ડેનમાર્કની લાઇન હોજમાર્ક કજેરફેલ્ટને 21-12, 21-14થી હરાવીને ટાઇટલ જીત્યું હતું. સિંધુએ માત્ર 39 મિનિટમાં ફાઇનલ જીતી હતી. ત્યાર બાદ લક્ષ્યે મેન્સ સિંગલ્સમાં વિજય મેળવીને ભારતીય ઉજવણી બમણી કરી દીધી હતી. આ બંને જીતને કારણે ભારતે હાયલો ઓપન સુપર 500માં મેન્સ અને વિમેન્સ સિંગલ્સ બંને ટાઇટલ પોતાના નામે કર્યા છે. એક જ ટુર્નામેન્ટમાં બંને સિંગલ્સ કેટેગરીમાં ભારતીય ખેલાડીઓ ચેમ્પિયન બનવું ભારતીય બેડમિન્ટન માટે મોટી સિદ્ધિ છે.
આ જીત લક્ષ્ય માટે કેમ ખાસ છે?
લક્ષ્ય સેન માટે આ જીતનું મહત્ત્વ એટલા માટે પણ વધારે છે કે 2026માં તેને સતત સારા પરિણામ મેળવવા માટે સંઘર્ષ કરવો પડ્યો હતો. આ વર્ષે તે પ્રતિષ્ઠિત ઓલ ઇંગ્લેન્ડ ચેમ્પિયનશિપની ફાઇનલ સુધી પહોંચ્યો હતો, પરંતુ ત્યાં તાઇવાનના લિન ચુન-યીએ તેને 21-15, 22-20થી હરાવ્યો હતો. હવે હાયલો ઓપનનું ટાઇટલ જીતીને લક્ષ્યે ફરી એકવાર સાબિત કર્યું છે કે તે વિશ્વના ટોચના ખેલાડીઓને પડકારવાની ક્ષમતા ધરાવે છે.
ભારતીય બેડમિન્ટન માટે યાદગાર દિવસ
હાયલો ઓપનમાં સિંધુ અને લક્ષ્યની જીત માત્ર બે ટાઇટલ સુધી સીમિત નથી. આ સફળતા ભારતીય બેડમિન્ટનની આંતરરાષ્ટ્રીય સ્પર્ધાઓમાં મજબૂત હાજરી પણ દર્શાવે છે. સિંધુએ આ સિઝનમાં જાપાન ઓપન બાદ બીજું ટાઇટલ જીત્યું છે, જ્યારે લક્ષ્યે આ સિઝનનું પ્રથમ BWF વર્લ્ડ ટૂર ટાઇટલ મેળવ્યું છે. બંને ખેલાડીઓની જીતથી ભારતીય બેડમિન્ટન ચાહકોને એક જ દિવસે ઉજવણીની બે મોટી તક મળી છે.
આ પણ વાંચો: PV Sindhuએ ફરી બતાવી પોતાની તાકાત! હાઇલૉ ઓપનનો ખિતાબ જીતી 2026ની બીજી ટ્રોફી કરી નામે
