એશિયન પેરા ગેમ્સ 2026 માં ભારતીય ખેલાડીઓનું અદભુત પ્રદર્શન સતત ચાલુ છે. જાપાનના આઈચી-નાગોયા ખાતે રમાઈ રહેલી આ ક્ષેત્રીય રમતગમત સ્પર્ધામાં ભારતના 32 વર્ષીય પેરા-એથ્લીટ ધર્મરાજ સોલાઈરાજે પુરુષોની લોંગ જમ્પ સ્પર્ધામાં ગોલ્ડ મેડલ જીતીને સમગ્ર દેશનું નામ રોશન કર્યું છે. તેણે 7.15 મીટરની ઐતિહાસિક છલાંગ લગાવીને પોતાનો જ જૂનો એશિયન રેકોર્ડ તોડી નાખ્યો છે અને સતત બીજી એશિયન પેરા ગેમ્સમાં સ્વર્ણ પદક જીતવાની સિદ્ધિ મેળવી છે.
બીજા પ્રયાસમાં જ સ્થાપ્યો નવો એશિયન રેકોર્ડ
નાગોયા સિટી મિઝુહો પાર્ક એથ્લેટિક સ્ટેડિયમ ખાતે રમાયેલી સંયુક્ત T44/T62/T64 ફાઈનલ ઈવેન્ટમાં તમિલનાડુના આ સ્ટાર ખેલાડીએ પોતાના બીજા જ પ્રયાસમાં 7.15 મીટરનો કૂદકો મારીને નવો એશિયન રેકોર્ડ બનાવી દીધો હતો. આ પહેલા તેનો એશિયન રેકોર્ડ 7.08 મીટરનો હતો, જે તેણે નવી દિલ્હીમાં રમાયેલી 2025 વર્લ્ડ પેરા એથ્લેટિક્સ ચેમ્પિયનશિપમાં બનાવ્યો હતો.
https://x.com/TheKhelIndia/status/2113231574162714923?s=20
રેઝા પોઈન્ટ સિસ્ટમમાં મેળવ્યા સૌથી વધુ પોઈન્ટ્સ
જુદી જુદી કેટેગરીના ખેલાડીઓ વચ્ચે રમાયેલી આ કમ્બાઈન્ડ સ્પર્ધામાં રેઝા પોઈન્ટ્સ સિસ્ટમ આધારિત પરિણામ જાહેર કરવામાં આવ્યું હતું. ધર્મરાજ સોલાઈરાજે 807 પોઈન્ટ્સ મેળવીને પોડિયમમાં ટોચનું સ્થાન મેળવ્યું હતું. મલેશિયાના એડી બર્નાર્ડે T44 કેટેગરીમાં 6.34 મીટરની છલાંગ સાથે 740 પોઈન્ટ્સ મેળવીને સિલ્વર મેડલ જીત્યો હતો, જ્યારે જાપાનના યુમા તામાકીએ T64 કેટેગરીમાં 6.89 મીટરના કૂદકા સાથે 726 પોઈન્ટ્સ મેળવીને બ્રોન્ઝ મેડલ જીત્યો હતો.
સતત શ્રેષ્ઠ પ્રદર્શન સાથે જાળવી રાખ્યો દબદબો
વર્ષ 2023માં હાંગઝોઉ ખાતે રમાયેલી એશિયન પેરા ગેમ્સમાં ધર્મરાજે 6.80 મીટરની છલાંગ લગાવીને પ્રથમ વખત ગોલ્ડ મેડલ પોતાના નામે કર્યો હતો. ત્યારબાદ તેણે પોતાના પ્રદર્શનમાં સતત સુધારો કરીને 2025 માં 7.08 મીટર અને હવે 2026 માં 7.15 મીટરનો એશિયન રેકોર્ડ બનાવીને રમત ક્ષેત્રે ભારતનો દબદબો વધુ મજબૂત કર્યો છે. T64 કેટેગરીમાં ભાગ લેતા ધર્મરાજે પોતાના આંતરરાષ્ટ્રીય કરિયરમાં વધુ એક મોટો ખિતાબ ઉમેરી લીધો છે.
આ પણ વાંચો: Asian Para Games 2026: ભારતીય પેરા તીરંદાજ શીતલ દેવી અને તોમન કુમારે ગોલ્ડ જીતી રચ્યો ઇતિહાસ
