2032માં ઓસ્ટ્રેલિયાના બ્રિસ્બેનમાં યોજાનારા ઓલિમ્પિક અને પેરાલિમ્પિક ગેમ્સનું સત્તાવાર પ્રતીક જાહેર કરી દેવામાં આવ્યું છે. આયોજકોએ ગુલાબી કોકાટૂને બ્રિસ્બેન 2032નું એમ્બલમ પસંદ કર્યું છે. જોકે આ એમ્બલમ સત્તાવાર રીતે જાહેર થાય તે પહેલાં જ તેની તસવીરો સોશિયલ મીડિયા પર લીક થઈ ગઈ હતી. હવે આયોજકોએ સત્તાવાર લોન્ચ સાથે આ ડિઝાઇનને દુનિયા સામે રજૂ કરી છે.
સત્તાવાર જાહેરાત પહેલાં જ કેવી રીતે લીક થયું?
બ્રિસ્બેન 2032ના આયોજકોએ એમ્બલમના અલગ-અલગ ભાગોને ક્વીન્સલેન્ડમાં અનેક સ્થળોએ ધીમે-ધીમે જાહેર કરવાની યોજના બનાવી હતી. આખું પ્રતીક 5 ઓક્ટોબરે સત્તાવાર રીતે લોન્ચ થવાનું હતું. પરંતુ લોન્ચના લગભગ 3 દિવસ પહેલાં બ્રિસ્બેન 2032ના પોતાના જ સત્તાવાર યુટ્યુબ ચેનલ પર એક ‘એમ્બલમ એક્સપ્લેનર’ વીડિયોનું પ્રિવ્યૂ ઇમેજ થોડા સમય માટે ઓનલાઈન આવી ગયું. તેમાં આખું કોકાટૂ પ્રતીક દેખાઈ ગયું અને સોશિયલ મીડિયા પર તેની તસવીરો ઝડપથી ફેલાઈ ગઈ. ત્યારબાદ વીડિયો હટાવી દેવામાં આવ્યો હતો.
ગુલાબી કોકાટૂએ કાંગારૂ-કોઆલાને પાછળ છોડ્યા
કોકાટૂની પસંદગી પાછળ ક્વીન્સલેન્ડ અને ઓસ્ટ્રેલિયાની સ્થાનિક ઓળખને મહત્વ આપવામાં આવ્યું છે. કાંગારૂ અને કોઆલા જેવા લોકપ્રિય ઓસ્ટ્રેલિયન પ્રતીકો પણ ચર્ચામાં હતા, પરંતુ અંતે કોકાટૂને પસંદ કરવામાં આવ્યું. ઓલિમ્પિક માટેના એમ્બલમમાં પિંક કોકાટૂનો ઉપયોગ થયો છે, જ્યારે પેરાલિમ્પિક ગેમ્સ માટે કોકાટૂની બીજી સ્થાનિક પ્રજાતિ એટલે કે સલ્ફર-ક્રેસ્ટેડ કોકાટૂથી પ્રેરિત ડિઝાઇન બનાવવામાં આવી છે. બંને ડિઝાઇન ક્વીન્સલેન્ડની પ્રકૃતિ અને સ્થાનિક ઓળખને દર્શાવે છે.
ડિઝાઇનમાં 2032 અને ક્વીન્સલેન્ડનો પણ સંકેત
આ એમ્બલમ માત્ર પક્ષીની તસવીર નથી. તેની ડિઝાઇનમાં અનેક સંકેતો છુપાયેલા છે. કોકાટૂના ક્રેસ્ટનો આકાર ક્વીન્સલેન્ડના નકશાની યાદ અપાવે છે, જ્યારે તેની પાંખો અને રંગને ઓલિમ્પિક તથા પેરાલિમ્પિક ફ્લેમ સાથે જોડવામાં આવ્યા છે. ડિઝાઇનમાં 3 અને 2 પાંખોના ગોઠવણ દ્વારા 2032નો સંકેત આપવામાં આવ્યો છે. આ ઉપરાંત કોકાટૂને ક્વીન્સલેન્ડ અને ઓસ્ટ્રેલિયાની સ્થાનિક સંસ્કૃતિ સાથે પણ જોડવામાં આવ્યું છે. ફર્સ્ટ નેશન્સ સમુદાયો માટે કોકાટૂનું સાંસ્કૃતિક મહત્વ છે અને તેને લોકો, સ્થળ અને વાર્તાઓને જોડનારા સંદેશવાહક તરીકે જોવામાં આવે છે.
લીકને પણ આયોજકોએ બનાવી દીધી પોઝિટિવ વાત
એમ્બલમના લીકથી શરૂઆતમાં આયોજકો માટે સ્થિતિ અસહજ બની હતી, કારણ કે ઘણા દિવસોથી ચાલતી સત્તાવાર રિવીલ યોજના બગડી ગઈ હતી. પરંતુ બાદમાં સોશિયલ મીડિયા પર ડિઝાઇનને મળેલા સારા પ્રતિસાદને આયોજકોએ સકારાત્મક રીતે લીધો. બ્રિસ્બેન 2032ના પ્રમુખ એન્ડ્રુ લિવેરિસે કહ્યું કે લીક થયા બાદ ટીમે ઝડપથી પોતાની વ્યૂહરચના બદલી અને મળેલા સારા પ્રતિસાદને ધ્યાનમાં રાખીને તેને સકારાત્મક રીતે આગળ વધાર્યું. સત્તાવાર લોન્ચમાં આ એમ્બલમને બ્રિસ્બેન અને ક્વીન્સલેન્ડની જીવંત, મસ્તીખોર અને અલગ ઓળખ સાથે જોડવામાં આવ્યું.
આ એમ્બલમ માસ્કોટ નથી
અહીં એક મહત્વની વાત એ છે કે કોકાટૂને ગેમ્સના એમ્બલમ તરીકે પસંદ કરવામાં આવ્યું છે, તે ઓલિમ્પિક માસ્કોટ નથી. બ્રિસ્બેન 2032નો સત્તાવાર માસ્કોટ અથવા માસ્કોટ્સ પછી જાહેર કરવામાં આવશે. બ્રિસ્બેન 2032 ઓલિમ્પિક ગેમ્સ 23 જુલાઈથી 8 ઓગસ્ટ 2032 સુધી યોજાવાની છે, જ્યારે પેરાલિમ્પિક ગેમ્સ 24 ઓગસ્ટથી 5 સપ્ટેમ્બર 2032 દરમિયાન યોજાશે. બ્રિસ્બેન ઉપરાંત ક્વીન્સલેન્ડના અન્ય શહેરો, જેમાં ગોલ્ડ કોસ્ટ અને સનશાઇન કોસ્ટનો સમાવેશ થાય છે, પણ ગેમ્સની યજમાની કરશે.
આ પણ વાંચો: Lionel Messi Farewell: આર્જેન્ટિનાની જર્સીમાં છેલ્લી વાર મેદાનમાં ઉતરશે મેસ્સી, ભારતમાં ક્યારે અને ક્યાં જોઈ શકાશે LIVE?
