પ્રધાનમંત્રી નરેન્દ્ર મોદીએ પેરા એશિયન ગેમ્સ 2026માં ભાગ લઈ રહેલા ભારતીય ખેલાડીઓને શુભેચ્છા પાઠવી છે. તેમણે કહ્યું કે ભારતને પોતાના શાનદાર પેરા એથ્લેટ્સ પર ખૂબ ગર્વ છે. ખેલાડીઓની મહેનત, સમર્પણ અને મુશ્કેલીઓ સામે લડવાની હિંમત 140 કરોડ ભારતીયોને પ્રેરણા આપે છે. જાપાનના આઈચી-નાગોયામાં 18થી 24 ઓક્ટોબર દરમિયાન યોજાનારી આ સ્પર્ધામાં ભારતીય ખેલાડીઓ 11 રમતોમાં ભાગ લેશે. ભારતીય ટીમનો ઉદ્દેશ્ય અગાઉના સંસ્કરણમાં મળેલી સફળતાને આગળ વધારવાનો છે.
PM મોદીએ સોશિયલ મીડિયા પર શું કહ્યું?
પ્રધાનમંત્રી મોદીએ સોશિયલ મીડિયા પ્લેટફોર્મ X પર લખ્યું કે પેરા એશિયન ગેમ્સની શરૂઆત સાથે તેઓ ભારતીય ટીમને શુભેચ્છા પાઠવે છે. તેમણે કહ્યું કે ભારતીય પેરા એથ્લેટ્સનું સાહસ, સમર્પણ અને અદમ્ય જુસ્સો દેશના લોકોને પ્રેરિત કરે છે. તેમણે આશા વ્યક્ત કરી કે ભારતીય ખેલાડીઓ આત્મવિશ્વાસ સાથે સ્પર્ધામાં ભાગ લેશે અને પોતાનું શ્રેષ્ઠ પ્રદર્શન કરશે.
https://x.com/narendramodi/status/2111790048320581783?s=20
168 ખેલાડીઓ સાથે ભારતની ટીમ
પેરા એશિયન ગેમ્સ 2026માં ભારત તરફથી કુલ 168 ખેલાડીઓ ભાગ લઈ રહ્યા છે. તેમાં 112 પુરુષ અને 56 મહિલા ખેલાડીઓ સામેલ છે. ભારતીય ખેલાડીઓ એથ્લેટિક્સ, પેરા બેડમિન્ટન, પેરા શૂટિંગ અને અન્ય રમતોમાં દેશનું પ્રતિનિધિત્વ કરશે. ભારતીય ટીમમાં અનુભવી ખેલાડીઓની સાથે નવા ખેલાડીઓ પણ સામેલ છે, જેઓ આંતરરાષ્ટ્રીય સ્તરે પોતાની ઓળખ બનાવવાનો પ્રયાસ કરશે.
પ્રમોદ ભગત અને સિમરન શર્મા બન્યાં ધ્વજવાહક
નાગોયાના પાલોમા મિઝુહો સ્ટેડિયમમાં યોજાયેલા ઉદ્ઘાટન સમારોહમાં પેરા બેડમિન્ટન ખેલાડી પ્રમોદ ભગત અને પેરા એથ્લેટ સિમરન શર્માએ ભારતીય ટીમના ધ્વજવાહક તરીકે તિરંગો લહેરાવ્યો હતો. ભારતીય ખેલાડીઓના બ્લેઝર પર સિંધુ ખીણની સભ્યતાથી પ્રેરિત સુવર્ણ રંગની ડિઝાઇન પણ જોવા મળી હતી. આ ડિઝાઇન દ્વારા ભારતની પ્રાચીન સંસ્કૃતિ અને વારસાને દર્શાવવાનો પ્રયાસ કરવામાં આવ્યો હતો.
અગાઉની સ્પર્ધામાં ભારતે જીત્યા હતા 111 મેડલ
2023માં ચીનના હાંગઝોઉમાં યોજાયેલી પેરા એશિયન ગેમ્સમાં ભારતે ઐતિહાસિક પ્રદર્શન કરતાં કુલ 111 મેડલ જીત્યા હતા. તેમાં 29 ગોલ્ડ, 31 સિલ્વર અને 51 બ્રોન્ઝ મેડલ સામેલ હતા. ભારત મેડલ ટેલીમાં પાંચમા સ્થાને રહ્યું હતું. હવે 2026ની સ્પર્ધામાં ભારતીય ખેલાડીઓ ફરી એકવાર મેડલ જીતવા અને દેશનું નામ રોશન કરવા ઉતરશે. સ્પર્ધા દરમિયાન તેમના પ્રદર્શન પર રમતપ્રેમીઓની નજર રહેશે.
આ પણ વાંચો: Para Athletics: ભારતીય પેરા-એથ્લીટ પર 3 વર્ષનો પ્રતિબંધ, મેડલ અને ઇનામ પણ ગુમાવશે
