ભારતીય ફૂટબોલના દિગ્ગજ સુનીલ છેત્રી હવે મેદાનની બહાર પણ પોતાની ઓળખ બનાવવાની તૈયારીમાં છે. FIFAના ‘પ્લેયર ઇમ્પેક્ટ પ્રોગ્રામ’માં સામેલ થઈને તેઓ શિક્ષણ, માનસિક સ્વાસ્થ્ય અને રમતગમતમાં સમાન તક જેવા સામાજિક મુદ્દાઓ પર કામ કરશે. આ કાર્યક્રમમાં છેત્રી પ્રથમ પુરુષ ખેલાડી છે. જૂનમાં અમેરિકાના બોસ્ટનમાં યોજાયેલી ત્રણ દિવસની કાર્યશાળામાં તેમણે મહિલા ફૂટબોલરો સાથે ભાગ લીધો હતો. હવે ડિસેમ્બરમાં લંડનમાં યોજાનારા આગામી તબક્કામાં તેઓ પોતાના પ્રોજેક્ટની રજૂઆત કરશે.
FIFAના ખાસ કાર્યક્રમમાં છેત્રીની એન્ટ્રી
FIFAનો ‘પ્લેયર ઇમ્પેક્ટ પ્રોગ્રામ’ એવા ખેલાડીઓને મદદ કરે છે, જેઓ પોતાની લોકપ્રિયતા, અનુભવ અને ઓળખનો ઉપયોગ કરીને સમાજમાં સકારાત્મક બદલાવ લાવવા માગે છે. આ કાર્યક્રમનો હેતુ ખેલાડીઓને માત્ર રમત પૂરતા મર્યાદિત ન રાખીને સામાજિક જવાબદારી નિભાવવાની તક આપવાનો છે. આ કાર્યક્રમની બીજી આવૃત્તિમાં કુલ 13 ખેલાડીઓ સામેલ છે. તેમાં સ્પેનની મહિલા વર્લ્ડ કપ વિજેતા એલેક્સિયા પુતેયાસ સહિત વિવિધ દેશોની મહિલા ફૂટબોલરોનો સમાવેશ થાય છે. સુનીલ છેત્રી આ કાર્યક્રમમાં સામેલ થનારા પ્રથમ પુરુષ ખેલાડી છે.
બોસ્ટનમાં મહિલા ખેલાડીઓ સાથે ખાસ કાર્યશાળા
જૂન મહિનામાં અમેરિકાના બોસ્ટનમાં ત્રણ દિવસની ‘ઇમ્પેક્ટ એક્સિલરેટર વર્કશોપ’ યોજાઈ હતી. તેમાં કાર્યક્રમના 13માંથી 11 ખેલાડીઓએ ભાગ લીધો હતો. આ દરમિયાન ખેલાડીઓએ પોતાના જીવનના અનુભવો, સામાજિક મુદ્દાઓ અને ભવિષ્યમાં હાથ ધરવા માગતા પ્રોજેક્ટ અંગે ચર્ચા કરી હતી. કાર્યશાળામાં ગ્રૂપ ચર્ચા, પ્રેક્ટિકલ કવાયત અને નિષ્ણાતો દ્વારા માર્ગદર્શન આપવામાં આવ્યું હતું. ખેલાડીઓને પોતાના વિચારોને વાસ્તવિક પ્રોજેક્ટમાં ફેરવવા માટે જરૂરી કૌશલ્ય અને સંસાધનો અંગે સમજ આપવામાં આવી હતી. આ કાર્યક્રમમાં સ્પેનની એલેક્સિયા પુતેયાસ, કેનેડાની જેસી ફ્લેમિંગ, જાપાનની હિના સુગિતા, બ્રાઝિલની ગાબી નુનેસ અને અન્ય દેશોની મહિલા ખેલાડીઓ સામેલ હતી.
શિક્ષણથી લઈને રમતગમતમાં સમાન તક સુધીના મુદ્દા
FIFAના આ કાર્યક્રમમાં શિક્ષણ, માનસિક સ્વાસ્થ્ય અને રમતગમતમાં સમાન તક જેવા મુદ્દાઓને પ્રાથમિકતા આપવામાં આવી છે. ખેલાડીઓ પોતાની પસંદગીના સામાજિક મુદ્દા પર પ્રોજેક્ટ તૈયાર કરશે. FIFA અને રમતગમત દ્વારા સામાજિક બદલાવ લાવવા માટે કામ કરતી નિષ્ણાત સંસ્થા તેમને માર્ગદર્શન આપશે. FIFAના જણાવ્યા પ્રમાણે, કાર્યક્રમની 2025માં યોજાયેલી પ્રથમ મહિલા-કેન્દ્રિત આવૃત્તિના કેટલાક સહભાગીઓએ પોતાની ફાઉન્ડેશન શરૂ કરી હતી, ફૂટબોલ એકેડમી સ્થાપી હતી અને સામાજિક સંસ્થાઓ સાથે ભાગીદારી કરી હતી. આ અનુભવના આધારે બીજી આવૃત્તિને વધુ વિસ્તૃત કરવામાં આવી છે.
છેત્રીએ કહ્યું- શીખેલી વાતો અમલમાં મૂકવા આતુર
42 વર્ષીય સુનીલ છેત્રીએ FIFAની વેબસાઇટ પર કહ્યું હતું કે આ તક મળવાથી તેઓ ખુશ છે અને અહીંથી મળેલા પાઠને અમલમાં મૂકવા આતુર છે. તેમણે કહ્યું કે આ કાર્યક્રમમાં પુરુષ અને મહિલા વચ્ચેનો કોઈ ભેદ નથી, પરંતુ અલગ-અલગ દેશોના શાનદાર ખેલાડીઓ સાથે મળવાની અને તેમની પાસેથી શીખવાની તક છે. છેત્રીએ 2005થી 2025 દરમિયાન ભારત માટે 150થી વધુ આંતરરાષ્ટ્રીય મેચ રમી છે. હવે તેમની કારકિર્દીનો અનુભવ સામાજિક પહેલમાં ઉપયોગી બને તે દિશામાં તેઓ આગળ વધી રહ્યા છે.
આ કાર્યક્રમનો આગામી તબક્કો ડિસેમ્બરમાં લંડનમાં યોજાશે. તેમાં સહભાગીઓ પોતાના પ્રોજેક્ટ રજૂ કરશે અને અન્ય ખેલાડીઓ સાથે વિચારોની આપ-લે કરશે.
આ પણ વાંચો: GTA 6: તૈયાર થઈ જાઓ, અસલી જંગ હવે શરૂ થશે! ડિવાઇસમાં 212 GB ખાલી રાખજો
