હેરી બ્રુકે રચ્યો ઈતિહાસ, પાકિસ્તાન સામે ત્રેવડી સદી ફટકારી કર્યો રેકોર્ડ્સનો વરસાદ

ઈંગ્લેન્ડના યુવા બેટ્સમેન હેરી બ્રુકે પાકિસ્તાન સામે મુલતાન ટેસ્ટમાં ત્રેવડી સદી ફટકારીને ઈતિહાસ રચી દીધો છે. ખાસ વાત એ છે કે તેણે આ ત્રેવડી સદી માત્ર 310 બોલમાં પૂરી કરી હતી. તેની ત્રેવડી સદી કોઈપણ ઈંગ્લિશ બેટ્સમેન દ્વારા ફટકારવામાં આવેલી સૌથી ઝડપી ત્રેવડી સદી પણ છે. આ સાથે બ્રુક છેલ્લા 34 વર્ષમાં ટેસ્ટ ક્રિકેટમાં ત્રેવડી સદી ફટકારનાર પ્રથમ ઈંગ્લેન્ડનો ક્રિકેટર બની ગયો છે. તેણે પાકિસ્તાન સામે મુલ્તાન ટેસ્ટના ચોથા દિવસે આ સિદ્ધિ મેળવી હતી.

માંડ-માંડ બચ્યો લારાનો રેકોર્ડ

બ્રુક પહેલા, ટેસ્ટ ક્રિકેટમાં ઈંગ્લેન્ડ માટે ત્રેવડી સદી ફટકારનાર બેટ્સમેન ગ્રેહામ ગૂચ હતા, જેમણે 1990માં ભારત સામે 333 રન બનાવ્યા હતા. બ્રુકની ઈનિંગ્સ જોઈને એવું લાગી રહ્યું હતું કે તે બ્રાયન લારાના સૌથી મોટા સ્કોરને તોડી નાખશે, પરંતુ એવું થઈ શક્યું નહીં. બ્રુક માત્ર 84 રનથી લારાનો રેકોર્ડ તોડવાનું ચૂકી ગયો.

બ્રુક ત્રેવડી સદી ફટકારનાર છઠ્ઠો ખેલાડી બન્યો

આ ઇનિંગના આધારે બ્રુક ટેસ્ટ ક્રિકેટમાં ત્રેવડી સદી ફટકારનાર છઠ્ઠો ઇંગ્લિશ ખેલાડી બની ગયો છે. બ્રુકની ઈનિંગ્સના આધારે ઈંગ્લેન્ડે પાકિસ્તાન સામે સૌથી વધુ ટેસ્ટ સ્કોરનો નવો રેકોર્ડ પણ બનાવ્યો હતો. બ્રુક આખરે 322 બોલમાં 317 રન બનાવીને આઉટ થયો, જેમાં 29 ચોગ્ગા અને ત્રણ છગ્ગાનો સમાવેશ થાય છે.

મુલતાનનો નવો સુલતાન બન્યો બ્રુક 

તેની ઇનિંગ્સના આધારે બ્રુક હવે સાચા અર્થમાં મુલ્તાનનો નવો સુલતાન બની ગયો છે. કારણ કે તેણે મુલ્તાન સ્ટેડિયમમાં સૌથી ઝડપી ત્રેવડી સદી ફટકારી છે. તેના પહેલા આ રેકોર્ડ પૂર્વ ભારતીય ઓપનર વીરેન્દ્ર સેહવાગના નામે હતો, જેણે આ મેદાન પર 364 બોલમાં ત્રેવડી સદી ફટકારી હતી. જો કે સૌથી ઝડપી ત્રેવડી સદી ફટકારવાના મામલે સેહવાગ હજુ પણ બ્રુકથી ઉપર છે. તેણે 2007-08માં દક્ષિણ આફ્રિકા સામે માત્ર 278 બોલમાં ત્રેવડી સદી ફટકારી હતી.