- T20 વર્લ્ડકપ પછી ICCની બીજી મોટી ટૂર્નામેન્ટની તૈયારીઓ શરૂ થઈ
- ભારતે ચેમ્પિયન્સ ટ્રોફી માટે પાકિસ્તાન જવા માટે કરી મનાઇ
- વેન્યૂ ગુમાવવાના ડરથી પાકિસ્તાનના દિગ્ગજ ખેલાડીઓ સામે આવ્યા
T20 વર્લ્ડકપ પછી ઈન્ટરનેશનલ ક્રિકેટ કાઉન્સિલ (ICC)ની બીજી મોટી ટૂર્નામેન્ટની તૈયારીઓ શરૂ થઈ ગઈ છે. આવતા વર્ષે ફેબ્રુઆરી-માર્ચમાં યોજાનારી ચેમ્પિયન્સ ટ્રોફી માટે પ્રયાસો તેજ કરી દેવામાં આવ્યા છે. આઠ દેશોની આ ટૂર્નામેન્ટનું આયોજન પાકિસ્તાન કરશે, પરંતુ ટીમ ઈન્ડિયાને લઈને સમાચાર આવ્યા છે કે તે પાકિસ્તાન નહીં જાય.
ભારતીય ક્રિકેટ કંટ્રોલ બોર્ડ (BCCI)ના એક અધિકારીનું કહેવું છે કે દુબઈ અને શ્રીલંકામાં તેનું આયોજન કરવાની માંગ છે. આ પહેલા ટીમ ઈન્ડિયાએ એશિયા કપ માટે પાકિસ્તાન ન જવાનો નિર્ણય કર્યો હતો. વેન્યૂ ગુમાવવાના ડરથી પાકિસ્તાનના દિગ્ગજ ખેલાડીઓ હવે ખુલ્લેઆમ સામે આવ્યા છે.
"અમે તેમનું ઉષ્માભર્યું સ્વાગત કરીશું."
વસીમ અકરમે એક ઈન્ટરવ્યુમાં કહ્યું- “મને આશા છે કે ભારત ચેમ્પિયન્સ ટ્રોફી માટે પાકિસ્તાન આવશે. આપણો દેશ તમામ ટીમોની યજમાની માટે તૈયાર છે. અમે તેમનું ઉષ્માભર્યું સ્વાગત કરીશું. ક્રિકેટ પણ શાનદાર રહેશે. અમારી પાસે અહીં ખૂબ જ સારી સુવિધાઓ છે. નવા સ્ટેડિયમ પણ બનાવવામાં આવી રહ્યા છે. પીસીબી અધ્યક્ષે આ માટે કવાયત શરૂ કરી દીધી છે. કરાચી અને ઈસ્લામાબાદના સ્ટેડિયમને નવુ રૂપ આપવામાં આવી રહ્યું છે.
"ક્રિકેટ અને રાજકારણ અલગ હોવા જોઈએ"
વસીમ અકરમે વધુમાં કહ્યું- “પાકિસ્તાનને ક્રિકેટની સુધારણા માટે આ ટૂર્નામેન્ટની જરૂર છે. મને આશા છે કે વિશ્વભરની ટીમો અહીં ભાગ લેશે. ક્રિકેટ અને રાજકારણ અલગ હોવું જોઈએ. અકરમના મતે પાકિસ્તાન આ ટૂર્નામેન્ટ માટે સંપૂર્ણ રીતે તૈયાર છે.
આગામી સપ્તાહ સુધીમાં લેવામાં આવી શકે છે નિર્ણય
બીસીસીઆઈએ તેને તટસ્થ સ્થળે યોજવાની માંગ કરી છે. પાકિસ્તાનમાં ખેલાડીઓની સુરક્ષાને ધ્યાનમાં રાખીને આ માંગણી કરવામાં આવી હોવાની સંભાવના છે. એવું કહેવામાં આવી રહ્યું છે કે BCCI આવતા અઠવાડિયે કોલંબોમાં ICC મીટિંગમાં ચેમ્પિયન્સ ટ્રોફી 2025 માટે પાકિસ્તાન પ્રવાસના નિર્ણય વિશે ઔપચારિક રીતે વાતચીત કરશે.
8 ટીમો ક્વોલિફાય થઈ
તમને જણાવી દઈએ કે 8 ટીમો ચેમ્પિયન્સ ટ્રોફી માટે ક્વોલિફાય થઈ ગઈ છે. તેમાં યજમાન પાકિસ્તાન ઉપરાંત ભારત, અફઘાનિસ્તાન, ઓસ્ટ્રેલિયા, બાંગ્લાદેશ, ઈંગ્લેન્ડ, ન્યુઝીલેન્ડ અને દક્ષિણ આફ્રિકાની ટીમો ભાગ લેશે. પાકિસ્તાન સિવાય અન્ય 7 દેશોએ ODI વર્લ્ડકપ 2023માં જગ્યા બનાવી છે. આ માટે ગદ્દાફી સ્ટેડિયમ લાહોર, રાવલપિંડી અને નેશનલ સ્ટેડિયમ કરાચીની પસંદગી કરવામાં આવી છે. એવું કહેવામાં આવી રહ્યું છે કે તેનું આયોજન 19 ફેબ્રુઆરીથી 9 માર્ચની વચ્ચે થઈ શકે છે. તેની શરૂઆત 19 ફેબ્રુઆરીએ પાકિસ્તાન અને ન્યૂઝીલેન્ડ વચ્ચેની મેચથી થશે. ભારતની પ્રથમ મેચ 20 ફેબ્રુઆરીએ બાંગ્લાદેશ સામે થશે. પાકિસ્તાન સાથેનો 'મહામુકાબાલા' 1 માર્ચે રમાશે.
