Pakistan: ખેલાડીઓનું વર્લ્ડકપને બદલે 2500 ડોલર કમાવવા પર ધ્યાન? થયો ખુલાસો

• ટી20 વર્લ્ડ કપ 2024 દરમિયાન પાકિસ્તાની ખેલાડીઓનું ખરાબ પ્રદર્શન
  
• ક્રિકેટરો પૈસા લઈને ફેન્સને મળવાની વ્યવસ્થા કરી રહ્યા હતા
• ખેલાડીઓ ટૂર્નામેન્ટ દરમિયાન પૈસા લઈને કાર્યક્રમનું આયોજન કરતા હતા

પાકિસ્તાન ક્રિકેટ ટીમે ટી20 વર્લ્ડ કપ 2024માં ખૂબ જ ખરાબ પ્રદર્શન કર્યું હતું. ટીમ પહેલા રાઉન્ડમાં જ ટૂર્નામેન્ટમાંથી બહાર થઈ ગઈ હતી. હવે વર્લ્ડ કપ દરમિયાન સામે આવેલા રિપોર્ટમાં એક મોટો ખુલાસો થયો છે, જેમાં કહેવામાં આવ્યું છે કે ટીમના ખેલાડીઓ ટૂર્નામેન્ટ દરમિયાન પૈસા લઈને કાર્યક્રમનું આયોજન કરતા હતા. રિપોર્ટમાં જણાવવામાં આવ્યું હતું કે ટીમના કેટલાક ખેલાડીઓએ 2500 ડોલર કમાવવા માટે કાર્યક્રમમાં ભાગ લીધો હતો.

એક અહેવાલના જણાવ્યા મુજબ કે ટીમના કેટલાક ખેલાડીઓએ 2024 ટી20 વર્લ્ડ કપ દરમિયાન એક કાર્યક્રમમાં હાજરી આપવા માટે 2500 ડોલર લીધા હતા. ખેલાડીઓના આ કાર્યક્રમનું આયોજન અમેરિકાના ડલ્લાસમાં કરવામાં આવ્યું હતું. આ સિવાય રિપોર્ટમાં એવો પણ ખુલાસો થયો હતો કે આ પ્રકારનો અન્ય એક કાર્યક્રમ રદ્દ કરવામાં આવ્યો હતો કારણ કે કેપ્ટન બાબર આઝમને અન્ય ખેલાડીઓ કરતા વધુ પૈસા મળતા હતા. હવે આ તમામ મુદ્દાઓ પાકિસ્તાનની સમીક્ષા બેઠકમાં ઉઠાવવામાં આવશે.

પાકિસ્તાનમાં ચાલી રહી છે ગ્રુપ પદ્ધતિ

થોડા દિવસો પહેલા વિવિધ મીડિયા અહેવાલોમાં ખુલાસો થયો હતો કે પાકિસ્તાનની ટીમ બે ગ્રુપમાં વહેંચાયેલી છે. ટીમના કેપ્ટન બાબર આઝમ અને ફાસ્ટ બોલર શાહીન આફ્રિદી વચ્ચે બધુ બરાબર નથી ચાલી રહ્યું, જેના કારણે ટીમના ખેલાડીઓ બે ગ્રુપમાં વહેંચાઈ ગયા છે.

પાકિસ્તાનની ટીમ ગ્રુપ સ્ટેજમાંથી જ થઈ ગઈ બહાર

પાકિસ્તાનની ટીમ ટી20 વર્લ્ડ કપ 2024ના ગ્રુપ સ્ટેજમાંથી જ બહાર થઈ ગઈ હતી. ટીમે ટૂર્નામેન્ટમાં પોતાના અભિયાનની શરૂઆત અમેરિકા સામે રમીને કરી હતી, જેમાં તેને સુપર ઓવરમાં હારનો સામનો કરવો પડ્યો હતો. આ પછી ટીમની બીજી મેચ ભારત સામે હતી. પાકિસ્તાનની ટીમને ભારત સામે પણ હારનો સામનો કરવો પડ્યો હતો. ત્યાર બાદ ટીમે ત્રીજી મેચમાં કેનેડા સામે અને ચોથી મેચમાં આયર્લેન્ડ સામે જીત મેળવી હતી, પરંતુ સુપર-8 માટે ક્વોલિફાય કરી શકી ન હતી.