પાકિસ્તાનની જીતથી બદલયા WTCના સમીકરણ, જાણો કેવી છે ભારતની સ્થિતિ

ઈંગ્લેન્ડની ટીમ આ દિવસોમાં પાકિસ્તાનના પ્રવાસે છે. જ્યાં બંને ટીમો વચ્ચે ત્રણ મેચની ટેસ્ટ સિરીઝ રમાઈ રહી છે. સિરીઝની બીજી મેચ મુલતાન સ્ટેડિયમમાં રમાઈ હતી. જેને પાકિસ્તાને 152 રને જીતીને સિરીઝ 1-1થી બરાબર કરી લીધી હતી. પાકિસ્તાનની જીત બાદ વર્લ્ડ ટેસ્ટ ચેમ્પિયનશિપ 2025 ફાઈનલના પોઈન્ટ ટેબલમાં પણ ફેરફાર જોવા મળ્યા છે. પાકિસ્તાનને થોડો ફાયદો થયો છે, જ્યારે ઈંગ્લેન્ડને હાર સાથે નુકસાન થયું છે.

પાકિસ્તાને એક સ્થાનનો થયો ફાયદો

પ્રથમ મેચમાં હાર બાદ વર્લ્ડ ટેસ્ટ ચેમ્પિયનશિપ 2025 ફાઈનલના પોઈન્ટ ટેબલમાં પાકિસ્તાનની હાલત ખૂબ જ ખરાબ હતી. પરંતુ બીજી ટેસ્ટ મેચમાં ઈંગ્લેન્ડને હરાવ્યા બાદ પાકિસ્તાને હવે એક સ્થાનનો ફાયદો ઉઠાવ્યો છે. હવે પાકિસ્તાનની ટીમ 9મા સ્થાનેથી 8મા સ્થાને પહોંચી ગઈ છે. આ સિવાય ઈંગ્લેન્ડ હજુ પણ તેના ચોથા સ્થાને યથાવત છે પરંતુ ટીમની જીતની ટકાવારીમાં ઘટાડો થયો છે. આ મેચ પહેલા ઈંગ્લેન્ડની જીતની ટકાવારી 45.59 હતી જે હવે 43.06 થઈ ગઈ છે.

પ્રથમ સ્થાને છે ટીમ ઈન્ડિયા

ભારતીય ટીમ હાલમાં ન્યુઝીલેન્ડ સાથે ત્રણ મેચની ટેસ્ટ સિરીઝ રમી રહી છે. આ પહેલા ટીમ ઈન્ડિયાએ બાંગ્લાદેશને ટેસ્ટ સિરીઝમાં 2-0થી હરાવ્યું હતું. હાલમાં, ટીમ ઈન્ડિયા વર્લ્ડ ટેસ્ટ ચેમ્પિયનશિપ 2025 ફાઈનલના પોઈન્ટ ટેબલમાં પ્રથમ સ્થાન પર છે અને ટીમની જીતની ટકાવારી 74.24 છે. આ સિવાય ઓસ્ટ્રેલિયાની ટીમ બીજા સ્થાને રહી હતી. ઓસ્ટ્રેલિયાની જીતની ટકાવારી 62.50 છે. જ્યારે શ્રીલંકાની ટીમ 55.56 ટકા સાથે ત્રીજા સ્થાને છે.

સાજિદ ખાન પ્લેયર ઓફ ધ મેચ બન્યો

સાજિદ ખાને બીજી ટેસ્ટ મેચમાં શાનદાર પ્રદર્શન કર્યું હતું. સાજિદ ખાને આ ટેસ્ટ મેચની બંને ઇનિંગ્સમાં 9 વિકેટ લીધી હતી. સાજિદે પ્રથમ દાવમાં 7 અને બીજી ઈનિંગમાં 2 વિકેટ ઝડપી હતી. આ સિવાય બેટિંગ કરતી વખતે તેણે બંને ઇનિંગ્સમાં મળીને 24 રન બનાવ્યા હતા.