- પાકિસ્તાનમાં ચેમ્પિયન ટ્રોફી 2025નું આયોજન કરવામાં આવશે
- આ ટૂર્નામેન્ટ હાઈબ્રિડ મોડલ પર આયોજિત થઈ શકે છે
- પાકિસ્તાનમાં સ્ટેડિયમના રિનોવેશનનું કામ પુરજોશમાં ચાલી રહ્યું છે
પાકિસ્તાને આવતા વર્ષે ફેબ્રુઆરી-માર્ચમાં ચેમ્પિયન્સ ટ્રોફી યોજાવાની છે, જેના વિશે પહેલાથી જ ઘણા પ્રશ્નો ઉભા થઈ રહ્યા છે. એક સવાલ છે કે શું ટીમ ઈન્ડિયા પાકિસ્તાનનો પ્રવાસ કરશે? જો ટીમ ઈન્ડિયા પાકિસ્તાન નહીં જાય તો ટૂર્નામેન્ટ હાઈબ્રિડ મોડલ પર આયોજિત થઈ શકે છે. તેમ છતાં પાકિસ્તાન તેની તૈયારીઓમાં વ્યસ્ત છે. દરમિયાન, પાકિસ્તાન ક્રિકેટ બોર્ડના વડાએ તેમના દેશના ક્રિકેટ સ્ટેડિયમનો પર્દાફાશ કર્યો છે અને કહ્યું છે કે પાકિસ્તાનના સ્ટેડિયમ આંતરરાષ્ટ્રીય ક્રિકેટની યજમાની માટે યોગ્ય નથી.
મહોસીન નકવીએ આપ્યું ચોંકાવનારુ નિવેદન
આ દિવસોમાં, ચેમ્પિયન્સ ટ્રોફીને લઈને લાહોર અને કરાચી જેવા પાકિસ્તાનના સૌથી લોકપ્રિય અને સૌથી પ્રખ્યાત સ્ટેડિયમમાં રિનોવેશનનું કામ ચાલી રહ્યું છે. PCB ટૂર્નામેન્ટ પહેલા તેમને તૈયાર કરવામાં વ્યસ્ત છે, જેના પર કરોડો રૂપિયાનો ખર્ચ કરવામાં આવી રહ્યો છે. તેનું મુખ્ય કારણ પાકિસ્તાની સ્ટેડિયમોની ખરાબ હાલત છે, જેના વિશે પ્રશંસકો અને મીડિયા ભૂતકાળમાં ઘણી વખત સવાલો ઉઠાવી રહ્યા છે અને હવે પીસીબીના અધ્યક્ષ મોહસિન નકવીએ પોતે આ વાત સ્વીકારી છે.
પાકિસ્તાનના સ્ટેડિયમની હાલત ખરાબ
લાહોરના ગદ્દાફી સ્ટેડિયમમાં ચાલી રહેલા કામની સમીક્ષા કરવા આવેલા મોહસિન નકવીએ પાકિસ્તાની મીડિયા સાથે વાત કરતા ખુલ્લેઆમ પોતાની નિરાશા વ્યક્ત કરી હતી. તેમણે કહ્યું કે પાકિસ્તાનના સ્ટેડિયમોની હાલત આજે પણ 1980ની જેમ જ છે અને જો તે જમાનામાં રહેવું હોય તો સ્ટેડિયમો સારા લાગે પરંતુ આજના યુગ પ્રમાણે તે ક્યાંય ટકી રહેતા નથી. તેમણે સ્ટેડિયમોમાં સારી બેઠકો, શૌચાલય અને અન્ય સુવિધાઓના અભાવનો ઉલ્લેખ કર્યો અને કહ્યું કે પાકિસ્તાની સ્ટેડિયમ વિશ્વભરના મોટા આધુનિક સ્ટેડિયમોની સરખામણીમાં સારા નથી. નકવીએ ભારપૂર્વક જણાવ્યું હતું કે તેથી ઘણા સ્ટેડિયમના ઘણો ફેરફાર કરવામાં આવી રહ્યો છે જેથી તેઓ ચેમ્પિયન્સ ટ્રોફી માટે તૈયાર થઈ શકે.
પાકિસ્તાને મેચનું સ્થળ બદલ્યું
જોકે, સ્ટેડિયમમાં ચાલી રહેલા બાંધકામને કારણે પાકિસ્તાનને પણ મુશ્કેલીનો સામનો કરવો પડી રહ્યો છે. તેનું તાજેતરનું ઉદાહરણ બાંગ્લાદેશ સામેની ટેસ્ટ સિરીઝ છે, જે 21 ઓગસ્ટથી શરૂ થવાની છે. આ સિરીઝની બીજી ટેસ્ટ મેચને લઈને ઘણો હોબાળો થઈ રહ્યો છે. શરૂઆતમાં PCBએ આ મેચ માટે દર્શકોને પ્રવેશ આપવાનો નિર્ણય કર્યો હતો પરંતુ પછી બાંધકામના કામને ટાંકીને દર્શકોના પ્રવેશ પર પ્રતિબંધ મૂક્યો હતો અને જાહેરાત કરી હતી કે તે દર્શકો વિના યોજાશે. હવે ખેલાડીઓ અને કામદારોની સુરક્ષાને ધ્યાનમાં રાખીને બોર્ડે મેચ કરાચીથી શિફ્ટ કરવાની જાહેરાત કરી છે. આ મેચ હવે રાવલપિંડીમાં જ રમાશે, જ્યાં પ્રથમ ટેસ્ટ મેચ રમાવાની છે.
