- પીવી સિંધુએ પેરિસ ઓલિમ્પિકમાં પોતાના અભિયાનની મજબૂત શરૂઆત કરી
- મહિલા સિંગલ્સના ગ્રુપ-Mમાં તેની પ્રથમ મેચમાં માલદીવની ફાતિમાને હરાવી
- સિંધુ 31 જુલાઈએ તેની બીજી ગ્રુપ મેચમાં એસ્ટોનિયાની ક્રિસ્ટિન કુબા સામે ટકરાશે
ભારતીય બેડમિન્ટન સ્ટાર પીવી સિંધુએ પેરિસ ઓલિમ્પિકમાં પોતાના અભિયાનની મજબૂત શરૂઆત કરી છે. સિંધુએ 28 જુલાઈએ મહિલા સિંગલ્સના ગ્રુપ-Mમાં તેની પ્રથમ મેચમાં માલદીવની ફાતિમા નબાહા અબ્દુલ રઝાકને સરળતાથી હરાવ્યો હતો. સિંધુએ આ મેચ વિશ્વની નંબર-111 ખેલાડી સામે 21-9, 21-6થી જીતી હતી. સિંધુને મેચ જીતવામાં માત્ર 29 મિનિટ લાગી હતી. હવે સિંધુ 31 જુલાઈએ તેની બીજી ગ્રુપ મેચમાં એસ્ટોનિયાની ક્રિસ્ટિન કુબા સામે ટકરાશે. જો તે આ મેચ જીતશે તો તે પ્રી-ક્વાર્ટર ફાઇનલમાં પહોંચી જશે.
ઈતિહાસ રચવા પર છે સિંધુની નજર
પીવી સિંધુએ રિયો ઓલિમ્પિકમાં સિલ્વર મેડલ અને ટોક્યો ઓલિમ્પિકમાં બ્રોન્ઝ મેડલ જીત્યો હતો. જો તે પેરિસ ઓલિમ્પિકમાં પોડિયમ સુધી પહોંચવામાં સફળ થાય છે, તો તે મેડલની હેટ્રિક પુરી કરનાર પ્રથમ ભારતીય ખેલાડી બની જશે. 29 વર્ષની સિંધુ છેલ્લા કેટલાક સમયથી આઉટ ઓફ ફોર્મ છે, પરંતુ તેણે કહ્યું કે પ્રકાશ પાદુકોણ સાથે છેલ્લા આઠ મહિના ગાળવાથી તેનો આત્મવિશ્વાસ વધ્યો છે અને તે સતત ત્રીજો મેડલ જીતવા માટે તૈયાર છે.
પેરિસ આવતા પહેલા સિંધુએ લીધી તાલીમ
પેરિસ આવતા પહેલા, સિંધુએ જર્મનીના સારબ્રુકેન ખાતેના સ્પોર્ટકેમ્પસ સાર ખાતે તાલીમ લીધી હતી જ્યાં ઊંચાઈ, હવામાન અને સ્થિતિ ફ્રાન્સની રાજધાની જેવી જ છે. પરિસ્થિતિઓને અનુરૂપ થવા માટે, તેણીએ તેના રૂમમાં એક હાયપોક્સિક ચેમ્બર (લો ઓક્સિજન) બનાવ્યું અને થોડા દિવસો ત્યાં સૂતી હતી. હાઈપોક્સિક ચેમ્બર ખેલાડીઓના શરીરને ઊંચાઈએ રમવા માટે તૈયાર કરવામાં મદદ કરે છે.
સિંધુને આ ખેલાડીઓ આપશે ટક્કર
સિંધુનો પ્રથમ મોટો પડકાર રાઉન્ડ ઓફ 16માં આવશે, જ્યારે તેનો સામનો ચીનની હી બિંગજિયાઓ સાથે થશે, જે ટોક્યો ઓલિમ્પિકની બ્રોન્ઝ મેડલ મેચમાં તેની પ્રતિસ્પર્ધી છે. બિંગજિયાઓને તે મેચમાં સિંધુએ આસાનીથી 21-13, 21-15થી પરાજય આપ્યો હતો. જો કે, બિંગજિયાઓએ 2022 એશિયન ગેમ્સમાં સિંધુ સામેની તેની અગાઉની મેચ જીતી હતી. હેડ ટુ હેડની વાત કરીએ તો સિંધુ સામે બિંગજિયાઓનો રેકોર્ડ 11-9નો છે.
જો સિંધુ બિંગજિયાઓને હરાવીને ક્વાર્ટર ફાઇનલમાં પહોંચે છે, તો તેની સામે ચીનની ખેલાડી ચેન યુફેઈ (જો કોઈ મોટો અપસેટ ન હોય તો) હશે. ભારતીય સુપરસ્ટાર ઓલિમ્પિક અને વર્લ્ડ ચેમ્પિયનશિપમાં ચીનના કોઈપણ શટલર સામે કોઈ મેચ હારી નથી, પરંતુ યુફેઈ શાનદાર ફોર્મમાં છે.
વર્તમાન ઓલિમ્પિક ચેમ્પિયને આ મહિનાની શરૂઆતમાં ઇન્ડોનેશિયા ઓપન જીતી હતી અને ફાઇનલમાં વિશ્વની નંબર 1 એન સેઉંગને હરાવી હતી. સિંધુ અને યુફેએ અત્યાર સુધી એકબીજા સામે 6-6 મેચ જીતી છે. સેમિફાઇનલમાં સિંધુનો મુકાબલો સ્પેનિશ દિગ્ગજ કેરોલિના મારિન સામે થઈ શકે છે, જે હંમેશા તેની સૌથી મોટી હરીફ રહી છે. મારિન સામે સિંધુનો રેકોર્ડ સારો નથી, જેમાં તે 5-12થી પાછળ છે. આ જ મારિને 2016 ઓલિમ્પિકની ફાઇનલમાં સિંધુને હરાવી હતી.
રોવિંગમાં મોટી સફળતા
રોવિંગમાં ભારતીય એથ્લેટ બલરાજ પંવારે મેડલ જીતવાની આશા જીવંત રાખી છે. બલરાજ પંવારે રોવિંગની રિપેચેજ ઈવેન્ટમાં બીજું સ્થાન મેળવીને ક્વાર્ટર ફાઇનલમાં પ્રવેશ કર્યો છે. બલરાજ ઓલિમ્પિકમાં રોવિંગ ઈવેન્ટમાં ક્વાર્ટર ફાઇનલમાં પહોંચનાર ભારતનો ચોથો રોવર બન્યો છે. હવે તેમની ક્વાર્ટર ફાઈનલ મેચ 30 જુલાઈએ રમાશે.
