- ટીમ ઈન્ડિયાએ મુંબઈમાં જોરદાર ઉજવણી કરી હતી
- ખેલાડીઓએ રોડ શો દરમિયાન ફેન્સ સાથે ડાન્સ કર્યો
- રોહિતની માતા ડોક્ટરની એપોઇન્ટમેન્ટ છોડીને મળવા આવી
T20 વર્લ્ડકપનો ખિતાબ જીત્યા બાદ ટીમ ઈન્ડિયાએ મુંબઈમાં જોરદાર ઉજવણી કરી હતી. ટીમ ઈન્ડિયાના ખેલાડીઓએ રોડ શો દરમિયાન વાનખેડે સ્ટેડિયમમાં ફેન્સ સાથે ડાન્સ કર્યો હતો. વિજેતા કેપ્ટન રોહિત શર્માને જોવા માટે ભારે ભીડ ઉમટી પડી હતી. પુત્રની આ ખુશીમાં રોહિત શર્માની માતાએ પણ ભાગ લીધો હતો. ખાસ વાત એ હતી કે રોહિતની માતા ડોક્ટરની એપોઇન્ટમેન્ટ છોડીને રોહિતને મળવા આવી હતી.
સુંદર વિડીયો તમને ભાવુક કરી દેશે
જ્યારે ટીમ ઈન્ડિયા વાનખેડે સ્ટેડિયમમાં રોડ શો કરી રહી હતી ત્યારે સ્ટેડિયમમાં હાજર હજારો પ્રશંસકોની નજર રોહિત શર્મા પર ટકેલી હતી, પરંતુ રોહિત શર્માનું ધ્યાન બીજે જ હતું. કારણ કે રોહિતના માતા-પિતા પ્રેસિડેન્ટ બોક્સમાં રાહ જોઈ રહ્યા હતા. રોડ શો પછી જ્યારે રોહિત તેના માતા-પિતાને મળવા આવ્યો ત્યારે તેની માતા પૂર્ણિમાએ રોહિતને ગળે લગાડ્યો અને તેના માથા પર ચુંબન કર્યું. જેનો વીડિયો સોશિયલ મીડિયા પર ખૂબ જ ઝડપથી વાયરલ થઈ રહ્યો છે.
રોડ શો બાદ રોહિત શર્માની માતા પૂર્ણિમાએ મીડિયા સાથે વાત કરતા કહ્યું કે વર્લ્ડકપ પહેલા રોહિતે કહ્યું હતું કે તે T20 ઈન્ટરનેશનલ ક્રિકેટમાંથી સંન્યાસ લઈ લેશે. આ સમય દરમિયાન મેં તેને માત્ર એટલું જ કહ્યું કે જીતવાનો પ્રયાસ કરો. આજે હું ખૂબ સારું અનુભવી રહી છું અને મારે કોઈપણ ભોગે અહીં આવવું હતું. મેં વિચાર્યું ન હતું કે હું આ દિવસ જોઇ શકીશ.
રોહિતની કેપ્ટન્સીમાં પ્રથમ વખત ચેમ્પિયન બની ભારતીય ટીમ
રોહિત શર્માની કેપ્ટન્સીમાં ટીમ ઈન્ડિયાએ પ્રથમ વખત ICC ટ્રોફી જીતી છે. આ પહેલા ભારતીય ટીમ ODI વર્લ્ડકપ 2023ની ફાઇનલમાં હારી ગઈ હતી, ત્યારથી ફેન્સ અને રોહિતનું સપનું T20 વર્લ્ડકપ જીતવાનું હતું અને રોહિતે તે કરી બતાવ્યું. હવે ફેન્સ અને રોહિતની ખુશીની કોઈ સીમા નથી. ટીમ ઈન્ડિયાની આ જીતની દરેક વ્યક્તિ ઉજવણી કરી રહી છે.
