- IPL 2024 બાદ તરત જ T20 વર્લ્ડકપ રમાશે
- IPLની વચ્ચે ટીમ ઈન્ડિયાની થશે જાહેરાત
- રોહિત શર્માનું IPL 2024માં શાનદાર પ્રદર્શન
T20 વર્લ્ડકપ માટે ટીમ ઈન્ડિયાની જાહેરાત IPL 2024ના મધ્યમાં થઈ શકે છે. થોડા દિવસો પહેલા સમાચાર સામે આવ્યા હતા કે ટીમ ઈન્ડિયાના મુખ્ય કોચ રાહુલ દ્રવિડ અને ચીફ સિલેકટર્સ અજીત અગરકરે ટીમ ઈન્ડિયાના કેપ્ટન રોહિત શર્મા સાથે મુલાકાત કરી હતી. જેના પર હવે રોહિતે મોટો ખુલાસો કર્યો છે. વાસ્તવમાં ટીમ ઈન્ડિયાની જાહેરાત પહેલા દરરોજ નવી માહિતી સામે આવી રહી છે. સાથે જ ચાહકોની નજર એ વાત પર પણ ટકેલી છે કે ટીમ ઈન્ડિયાની જાહેરાત ક્યારે થશે?
રોહિત શર્માએ અહેવાલોને ફગાવી દીધા
તાજેતરમાં એક ઈન્ટરવ્યૂમાં પસંદગીકારો સાથેની બેઠક અંગે રોહિત શર્માએ કહ્યું કે અમારી આવી કોઈ બેઠક થઈ નથી. રોહિતે આ તમામ અહેવાલોને ફગાવી દીધા છે. આ ઈન્ટરવ્યૂમાં રોહિતની સાથે એડમ ગિલક્રિસ્ટ અને માઈકલ વોન પણ હતા. રોહિતે કહ્યું કે હું કોઈને મળ્યો નથી. રાહુલ દ્રવિડ તેના પરિવાર સાથે બેંગલુરુમાં છે જ્યારે અજીત અગરકર દુબઈમાં હાજર છે. હકીકતમાં, થોડા દિવસો પહેલા, IPL 2024 દરમિયાન, સમાચાર સામે આવ્યા હતા કે રોહિત શર્માએ ટીમ ઈન્ડિયાના કોચ રાહુલ દ્રવિડ અને મુખ્ય પસંદગીકાર અજીત અગરકર સાથે T20 વર્લ્ડકપ 2024 માટે ટીમ ઈન્ડિયાની ટીમને લઈને વાતચીત કરી હતી. આ દરમિયાન એવી માહિતી પણ આવી હતી કે હાર્દિક પંડ્યાની બોલિંગની પણ ચર્ચા થઈ હતી.
રોહિતનું IPLમાં શાનદાર પ્રદર્શન
ભલે મુંબઈ ઈન્ડિયન્સની ટીમ IPL 2024માં 6માંથી 4 મેચ હારી ગઈ હોય, પરંતુ રોહિત શર્માએ પોતાના શાનદાર પ્રદર્શનથી ચાહકોનું દિલ જીતી લીધું છે. રોહિત આ સિઝનમાં શાનદાર બેટિંગ કરી રહ્યો છે. આ સિઝનમાં રોહિતે સદી પણ ફટકારી છે. રોહિતે CSK સામે 105 રનની ઇનિંગ રમી હતી. રોહિતે અત્યાર સુધી 6 મેચમાં 261 રન બનાવ્યા છે.
