સરફરાઝ ખાને ડેબ્યૂ મેચમાં જ ટીમ ઈન્ડિયાની સૌથી મોટી સમસ્યાનું કર્યું સમાધાન

• ભારત અને ઈંગ્લેન્ડ વચ્ચે પાંચ મેચની ટેસ્ટ સિરીઝ
  
• સરફરાઝે પોતાની ડેબ્યૂ મેચમાં શાનદાર પ્રદર્શન કર્યું
• સરફરાઝના કારણે ભારતનો મિડલ ઓર્ડર મજબૂત

સરફરાઝ ખાને ઈંગ્લેન્ડ સામે રમાઈ રહેલી 5 ટેસ્ટ મેચની સિરીઝમાં ભારતની સૌથી મોટી સમસ્યાનો ઉકેલ લાવી દીધો છે. વિરાટ કોહલીની ગેરહાજરીમાં ટીમ ઈન્ડિયા મિડલ ઓર્ડરની નિષ્ફળતા સામે ઝઝૂમી રહી હતી. પરંતુ સરફરાઝ ખાને વિસ્ફોટક અંદાજમાં ડેબ્યૂ કર્યું છે અને તે ત્રીજી ટેસ્ટની બંને ઇનિંગ્સમાં ફિફ્ટી ફટકારવામાં સફળ રહ્યો હતો. સરફરાઝના કારણે ટીમ ઈન્ડિયાનો મિડલ ઓર્ડર ઘણો મજબૂત દેખાઈ રહ્યો છે. આ સાથે રાંચીમાં કેએલ રાહુલની વાપસી બાદ ટીમ ઈન્ડિયાનો મિડલ ઓર્ડર વધુ મજબૂત બનશે.

ભારતનો મિડલ ઓર્ડર મજબૂત

ટીમ ઈન્ડિયા માટે મિડલ ઓર્ડરની સમસ્યાઓ સિરીઝની શરૂઆત પહેલા જ શરૂ થઈ ગઈ હતી. વિરાટ કોહલીએ અંગત કારણોસર સિરીઝની પ્રથમ બે મેચમાંથી પોતાનું નામ પાછું ખેંચી લીધું હતું. પ્રથમ ટેસ્ટમાં મિડલ ઓર્ડરની જવાબદારી શ્રેયસ ઐયર અને કેએલ રાહુલને આપવામાં આવી હતી. સિરીઝની પ્રથમ બે મેચમાં ઐયર ફ્લોપ સાબિત થયો હતો. જ્યારે કેએલ રાહુલ ઈજાના કારણે બીજી અને ત્રીજી ટેસ્ટમાં પ્લેઈંગ-11નો ભાગ બની શક્યો ન હતો. બીજી ટેસ્ટમાં રાહુલની જગ્યાએ રજત પાટીદારને તક આપવામાં આવી હતી. પાટીદાર પણ તકનો લાભ ઉઠાવી શક્યા ન હતા અને બે ટેસ્ટની ચાર ઇનિંગ્સમાં એક પણ ફિફ્ટી ફટકારી શક્યા ન હતા. ટીમ ઈન્ડિયાની મુશ્કેલીઓ ત્યારે વધી ગઈ જ્યારે વિરાટ કોહલીએ છેલ્લી ત્રણ ટેસ્ટમાંથી પોતાનું નામ પાછું ખેંચી લીધું.

સરફરાઝ ખાનનું ધમાકેદાર ડેબ્યુ

લાંબા સમયથી ટીમ ઈન્ડિયા તરફથી રમવાનો દાવો કરી રહેલા સરફરાઝ ખાનને રાજકોટ ટેસ્ટમાં ડેબ્યૂ કરવાની તક મળી હતી. સરફરાઝ ખાને આ તકને બંને હાથે ઝડપી લીધી છે. ડેબ્યૂ મેચમાં સરફરાઝે પ્રથમ દાવમાં 66 બોલમાં 62 રનની શાનદાર ઇનિંગ રમી હતી. સરફરાઝની ઇનિંગમાં 9 ફોર અને એક સિકસનો સમાવેશ થાય છે. સરફરાઝ કમનસીબ હતો અને રનઆઉટ થયો હતો. બીજી ઈનિંગમાં સરફરાઝનું બેટ વધુ કમાલ કરવામાં સફળ રહ્યું. સરફરાઝે બીજી ઇનિંગમાં 72 બોલમાં 68 રનની અણનમ ઇનિંગ રમી હતી. બીજી ઇનિંગમાં 3 સિક્સર સિવાય સરફરાઝે 6 ફોર પણ ફટકારી હતી. સરફરાઝ ખાનનું હવે સિરીઝની બાકીની બે મેચોમાં રમવું નિશ્ચિત છે.