સાત્વિક-ચિરાગની જોડીએ ફ્રેન્ચ ઓપનમાં રચ્યો ઈતિહાસ, બીજી વખત ટાઈટલ પર કર્યો કબજો

• સાત્વિક-ચિરાગે બીજી વખત ફ્રેન્ચ ઓપન ખિતાબ જીત્યો
  
• તાઇપેઇના લી જે-હુઇ યાંગ અને યાંગ પો-હવાનને હરાવ્યા
• સાત્વિક-ચિરાગની જોડીએ ફાઈનલ માત્ર 36 મિનિટમાં જીતી

વિશ્વની નંબર-1 મેન્સ ડબલ્સ જોડી સાત્વિક સાઈરાજ રેન્કીરેડ્ડી અને ચિરાગ શેટ્ટીએ ફ્રેન્ચ ઓપન સુપર 750 બેડમિન્ટન ટૂર્નામેન્ટનો ખિતાબ જીત્યો છે. આ બીજી વખત છે જ્યારે સાત્વિક-ચિરાગની જોડીએ ફ્રેન્ચ ઓપનનો ખિતાબ જીત્યો છે. સાત્વિક-ચિરાગે ફાઇનલમાં ચાઇનીઝ તાઇપેઇના લી જે-હુઇ યાંગ અને યાંગ પો-હવાનને સીધી ગેમમાં 21-11, 21-17થી હરાવ્યા હતા.

માત્ર 36 મિનિટમાં જીત

સાત્વિક સાઈરાજ રેન્કીરેડ્ડી અને ચિરાગ શેટ્ટીએ ફાઈનલ એકતરફી જીતી હતી. આ જોડીએ પ્રથમ ગેમ માત્ર 15 મિનિટમાં 21-11થી જીતી લીધી હતી. જોકે બીજી ગેમમાં જોરદાર સ્પર્ધા જોવા મળી હતી. એક સમયે રમત 5-5થી બરાબરી પર હતી અને બ્રેક બાદ ચાઈનીઝ તાઈપેઈની જોડીએ 11-10ની સરસાઈ મેળવી હતી. પરંતુ સાત્વિક-ચિરાગની જોડીએ શાનદાર વાપસી કરી અને 21-17થી ગેમ જીતી લીધી.

બીજી વખત ફ્રેન્ચ ઓપન ખિતાબ જીત્યો

ભારતીય જોડીએ અગાઉ સિઝનની શરૂઆતમાં મલેશિયા ઓપનની ફાઇનલમાં જગ્યા બનાવી હતી, પરંતુ લિયાંગ વેઇ કેંગ અને વાંગ ચાંગની ચીનની જોડી સામે હારનો સામનો કરવો પડ્યો હતો. ચિરાગ-સાત્વિકને ઈન્ડિયા ઓપનની ફાઇનલમાં વર્લ્ડ ચેમ્પિયન સામે હારનો સામનો કરવો પડ્યો હતો. પરંતુ આ વખતે તેણે ટાઈટલ ગુમાવ્યું નથી. આ પહેલા આ ભારતીય જોડીએ 2022માં ફ્રેન્ચ ઓપન ટાઈટલ જીત્યું હતું અને 2019માં રનર્સઅપ રહી હતી.