- વર્લ્ડ કપ 2023માં શાનદાર બોલિંગથી છવાયો મોહમ્મદ શમી
- ભારતને ફાઈનલમાં લઈ જવામાં મોહમ્મ શમીની ભૂમિકા મહત્વની
- ખેડૂત પુત્રની કમાણી જાણી તમારી પણ આંખો થઈ જશે પહોળી
ભારતીય ક્રિકેટ ટીમના અનુભવી ઝડપી બોલર મોહમ્મદ શમીએ ODI વર્લ્ડ કપ 2023માં શાનદાર બોલિંગ કરી હતી. આ વર્લ્ડ કપમાં શમી સૌથી વધુ વિકેટ લેનાર બોલર હતા. તેને પ્રથમ કેટલીક મેચોમાંથી બહાર રાખવામાં આવ્યા હતા. પરંતુ હાર્દિક પંડ્યાની ઈજા બાદ પ્લેઈંગ ઈલેવનમાં પરત ફર્યા બાદ શમીએ બોલિંગમાં તબાહી મચાવી દીધી હતી. તે 24 વિકેટ સાથે વર્લ્ડ કપમાં સૌથી વધુ વિકેટ લેનારા બોલરોની યાદીમાં ટોપ પર છે. શમીની ટીમ ઈન્ડિયાની સફર આસાન નહોતી. એક ખેડૂતના દીકરાએ પોતાના દમ પર ટીમ ઈન્ડિયામાં જગ્યા બનાવી અને આજે આ ક્રિકેટરની કિંમત કરોડોમાં છે.
વર્લ્ડ કપથી આવ્યા ચર્ચામાં
મોહમ્મદ શમીએ ભારતીય ક્રિકેટ ટીમને વર્લ્ડ કપની ફાઇનલમાં લઈ જવામાં મહત્વની ભૂમિકા ભજવી હતી. શમીએ 7 ઇનિંગ્સમાં સૌથી વધુ 24 વિકેટ લીધી હતી. અલબત્ત, ટીમ ઈન્ડિયા ફાઈનલમાં ઓસ્ટ્રેલિયા સામે હારી ગઈ આમ છતાં શમીએ તેની શાનદાર બોલિંગથી ઘણી હેડલાઈન્સ બનાવી. ટીમ ઈન્ડિયાના સ્ટાર બોલર પોતાની અંગત જીવનને લઈને પણ અવારનવાર ચર્ચામાં રહે છે.
મોહમ્મદ શમી લક્ઝરી કારનો શોખીન છે અને તેની નેટવર્થ સતત વધી રહી છે. માહિતી અનુસાર, મોહમ્મદ શમીની નેટવર્થ વધીને લગભગ 55 કરોડ રૂપિયા થઈ ગઈ છે જે 2022માં લગભગ 45 કરોડ રૂપિયા હતી. શમીની વાર્ષિક આવક 8 કરોડ રૂપિયાથી વધુ છે જ્યારે તેની માસિક આવક 55 લાખ રૂપિયાથી વધુ છે.
શમીના ઘરનું નામ તેની પત્નીના નામ પર
દિલ્હીથી લગભગ 160 કિલોમીટર દૂર આવેલા અમરોહાના સહસપુર ગામમાંથી આવતા મોહમ્મદ શમીનું એક મોટું ફાર્મહાઉસ છે. શમી આ ફાર્મહાઉસની તસવીરો સોશિયલ મીડિયા પર શેર કરતો રહે છે. તેણે તેનું નામ તેની પત્ની હસીન જહાંના નામ પરથી રાખ્યું છે. શમીના ફાર્મહાઉસનું નામ 'હસીન' છે. જોકે, શમી હવે હસીન જહાંથી અલગ રહે છે. હસીન જહાંએ શમી પર ઘરેલુ હિંસાનો આરોપ લગાવ્યો છે.
શમી કારનો શોખીન છે
મોહમ્મદ શમી આઈપીએલ અને જાહેરાતોમાંથી ઘણી કમાણી કરે છે. તેને IPL ફ્રેન્ચાઇઝી ગુજરાત ટાઇટન્સે રૂ. 6.25 કરોડમાં ખરીદ્યો છે. શમી બીસીઆઈના એ ગ્રેડમાં સામેલ છે જ્યાંથી તેને વાર્ષિક 5 કરોડ રૂપિયા મળે છે. મોહમ્મદ શમીને ટેસ્ટ મેચ રમવા માટે 15 લાખ રૂપિયા મળે છે જ્યારે વનડે રમવા માટે તેને 6 લાખ રૂપિયા મળે છે. શમીને ટી20 મેચ રમવા માટે 3 લાખ રૂપિયા મળે છે. માહિતી અનુસાર, તે જાહેરાતોમાંથી લગભગ 1 કરોડ રૂપિયાની કમાણી કરે છે.
33 વર્ષીય રાઈટ હેન્ડ ફાસ્ટ બોલર મોહમ્મદ શમીને કારનો ખૂબ જ શોખ છે. તેની પાસે ટોયોટા ફોર્ચ્યુનર, BMW 5 સીરીઝ અને ઓડી જેવી મોંઘી કાર છે. શમી પાસે જગુઆર એફ-ટાઈપ સ્પોર્ટ્સ કાર પણ છે જેની કિંમત લગભગ 1 કરોડ રૂપિયા છે. તેણે ગયા વર્ષે આ કાર ખરીદી હતી. મોહમ્મદ શમીએ રિયલ એસ્ટેટમાં પણ 12 થી 15 કરોડ રૂપિયાનું રોકાણ કર્યું છે.
