- મુંબઈ અને વિદર્ભ વચ્ચે રણજી ટ્રોફીની ફાઈનલ મેચ
- અજિંક્ય રહાણે અને શ્રેયસ ઐયર ફાઈનલમાં ફ્લોપ
- પ્રથમ ઈનિંગમાં રહાણે અને ઐયર 7-7 રન બનાવ્યા
મુંબઈ માટે રણજી ટ્રોફી ફાઈનલની પ્રથમ ઈનિંગમાં ફ્લોપ થયેલા અજિંક્ય રહાણે અને શ્રેયસ ઐયરને સાથી ખેલાડી શાર્દુલ ઠાકુરનો સાથ મળ્યો છે. ઠાકુરને વિશ્વાસ છે કે આ ટોચના ખેલાડીઓ ટૂંક સમયમાં ફોર્મમાં પરત ફરશે. મુંબઈના વાનખેડે સ્ટેડિયમમાં રમાઈ રહેલી ફાઈનલ મેચની પ્રથમ ઈનિંગમાં રહાણે અનેઐયર 7-7 રન બનાવ્યા હતા. જ્યારે ઠાકુરે 75 રનની ઇનિંગ રમીને મુંબઈને 224 રનના સ્કોર સુધી પહોંચાડ્યું હતું. આ પછી બોલિંગ દરમિયાન ઠાકુરે વિદર્ભની પહેલી વિકેટ પણ લીધી. તેના સિવાય ધવલ કુલકર્ણીએ બે વિકેટ લીધી, જેના કારણે વિદર્ભ 31/3ની મુશ્કેલ સ્થિતિમાં આવી ગયું.
શાર્દુલે ઐયર-રહાણેનું સમર્થન કર્યું
ઠાકુરે પ્રથમ દિવસની રમત બાદ કહ્યું, “અજિંક્ય આખી સિઝનમાં રન નથી બનાવી શક્યો. તે શાનદાર ફોર્મમાં નથી. અમે તેને દોષ આપી શકીએ નહીં કારણ કે આ તેમના માટે મુશ્કેલ સમય છે. હું શ્રેયસ અને અજિંક્ય વિશે પણ એવું જ કહીશ. આ લોકો મુંબઈ અને ભારત માટે મેચ વિનર રહ્યા છે. અત્યારે, તે તેમનો મુશ્કેલ સમય છે તેમની ટીકા કરવાને બદલે તેમને સાથ આપવાનો સમય છે કારણ કે ટીકા કરવી સહેલી છે.”
રહાણેએ અત્યાર સુધી આઠ રણજી મેચોમાં 12.81ની એવરેજથી એક ફિફ્ટી સાથે માત્ર 141 રન બનાવ્યા છે. ઐયર આ સિઝનમાં મુંબઈ માટે સતત રમ્યો નથી, પરંતુ સ્થાનિક ક્રિકેટમાં તેની વાપસી પણ પ્રભાવશાળી રહી નથી. તેણે ત્રણ મેચમાં 19.33ની એવરેજથી 58 રન બનાવ્યા છે.
ઐયર-રહાણે રોલ મોડલ
ઠાકુરે કહ્યું, “અજિંક્યએ રન બનાવ્યા નથી પરંતુ ફિલ્ડિંગ પ્રત્યે તેનો અભિગમ ટોચનો છે. મુંબઈમાં અંડર-23 અને અંડર-19 ક્રિકેટમાંથી આવતા ઘણા યુવાનોનું વલણ તેમના જેવું નથી. તમે તેને સ્લિપમાં જોશો, જો તેને 80 ઓવર માટે મેદાનમાં ઉતારવામાં આવે તો પણ તે ચાર રન બચાવવા માટે ઝડપથી દોડશે. શ્રેયસ વાઘની જેમ મેદાનમાં ફરે છે. જ્યારે તેઓ ડ્રેસિંગ રૂમમાં હોય છે ત્યારે તેઓ બંને રોલ મોડલ હોય છે." પોતાના સાથી ખેલાડીઓનો બચાવ કરતા, ઠાકુરે કેટલાક યુવા બેટ્સમેનોએ રણજી ફાઈનલ જેવી મહત્વપૂર્ણ મેચમાં તેમની તકોનો લાભ ન લેવા પર નારાજગી વ્યક્ત કરી હતી.
ધવલ કુલકર્ણીની છેલ્લી મેચમાં ઠાકુર ભાવુક થયો
ફાઈનલ બાદ નિવૃત્ત થયેલા કુલકર્ણી વિશે ઠાકુરે કહ્યું કે, તેમના જૂના સાથી ખેલાડીને છેલ્લી વખત મુંબઈ માટે રમતા જોવું એ ભાવનાત્મક ક્ષણ છે. ઠાકુરે કહ્યું, “આજે સવારે પુષ્ટિ થઈ કે તે રમી રહ્યો છે. આ તેની છેલ્લી મેચ બનવાની હતી. આ તેના માટે ખૂબ જ ભાવનાત્મક ક્ષણ હતી. મારા માટે પણ આ ભાવનાત્મક ક્ષણ છે કારણ કે મેં તેને બાળપણથી જોયો છે. જ્યારે મારી પાસે પગરખાં ખરીદવા માટે પૈસા ન હતા, ત્યારે તેણે મને થોડા જોડી જૂતા આપ્યા હતા.
