ઓસ્ટ્રેલિયા સામેની હાર બાદ ન્યુઝીલેન્ડને મોટુ નુકસાન, જાણો કયા નંબરે છે ભારત

• ઓસ્ટ્રેલિયાએ બીજી ટેસ્ટ મેચમાં ન્યૂઝીલેન્ડને 3 વિકેટે હરાવ્યું
  
• ઓસ્ટ્રેલિયાને વર્લ્ડ ટેસ્ટ ચેમ્પિયનશિપ પોઈન્ટ ટેબલમાં ફાયદો
• વર્લ્ડ ટેસ્ટ ચેમ્પિયનશિપ પોઈન્ટ ટેબલમાં ભારત પ્રથમ સ્થાન પર

ઓસ્ટ્રેલિયાએ બીજી ટેસ્ટ મેચમાં ન્યૂઝીલેન્ડને 3 વિકેટે હરાવીને સીરિઝ 2-0થી કબજે કરી લીધી હતી. આ સાથે ઓસ્ટ્રેલિયાએ હવે વર્લ્ડ ટેસ્ટ ચેમ્પિયનશિપ પોઈન્ટ ટેબલમાં એક સ્થાનનો ફાયદો થયો છે, જ્યારે ન્યૂઝીલેન્ડને સીરિઝની હાર બાદ વર્લ્ડ ટેસ્ટ ચેમ્પિયનશિપની પોઈન્ટ ટેબલમાં નુકસાન થયું છે.

WTC પોઈન્ટ ટેબલમાં હલચલ

ઓસ્ટ્રેલિયાએ બે મેચની ટેસ્ટ સીરિઝની બંને મેચ જીતી લીધી છે. જે બાદ હવે વર્લ્ડ ટેસ્ટ ચેમ્પિયનશિપમાં પોઈન્ટ ટેબલમાં હલચલ જોવા મળી છે. ઓસ્ટ્રેલિયાને જીત સાથે ફાયદો થયો છે, જ્યારે ન્યુઝીલેન્ડને હાર સાથે હારનો સામનો કરવો પડ્યો છે. આ મેચ પહેલા ઓસ્ટ્રેલિયા વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ત્રીજા સ્થાને હતું જ્યારે ન્યુઝીલેન્ડની ટીમ બીજા સ્થાને હતી. હવે ઓસ્ટ્રેલિયાની ટીમ બીજા સ્થાને પહોંચી ગઈ છે જ્યારે ન્યુઝીલેન્ડ ત્રીજા સ્થાને સરકી ગઈ છે.

ટીમ ઈન્ડિયા હજુ પણ પ્રથમ સ્થાન પર

આ મેચ બાદ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં ટીમ ઈન્ડિયાના સ્થાનમાં કોઈ ફરક નથી. તાજેતરમાં જ ટીમ ઈન્ડિયાએ ઈંગ્લેન્ડ સામેની ટેસ્ટ સીરિઝ 4-1થી જીતી હતી. આ સીરિઝની ચોથી મેચ બાદથી ટીમ ઈન્ડિયા વર્લ્ડ ટેસ્ટ ચેમ્પિયનશિપ ફાઈલના પોઈન્ટ ટેબલમાં પ્રથમ સ્થાન પર છે. ટીમ ઈન્ડિયા 9 મેચમાં 6 જીત, 2 હાર અને એક ડ્રો સાથે નંબર વન પર છે. તે જ સમયે, ઓસ્ટ્રેલિયાની ટીમ હવે 12 મેચમાં 8 જીત, 3 હાર અને એક ડ્રો સાથે બીજા સ્થાને આવી ગઈ છે.

ઓસ્ટ્રેલિયા 3 વિકેટે જીત્યું

ઓસ્ટ્રેલિયાને બીજી ટેસ્ટ મેચ જીતવા માટે 278 રનનો ટાર્ગેટ મળ્યો હતો. જે એક સમયે ઓસ્ટ્રેલિયા માટે હાંસલ કરવું ખૂબ જ મુશ્કેલ લાગતું હતું. પરંતુ ઓસ્ટ્રેલિયાએ અંતે લક્ષ્યાંક હાંસલ કરી લીધો અને 7 વિકેટ ગુમાવીને મેચ જીતી લીધી. ઓસ્ટ્રેલિયા તરફથી બીજી ઈનિંગમાં બેટિંગ કરતા એલેક્સ કેરીએ અણનમ 98 રનની સૌથી વધુ ઈનિંગ રમી હતી. આ સિવાય મિચેલ માર્શે 80 રન બનાવ્યા હતા. કેપ્ટન પેટ કમિન્સે પણ અણનમ 32 રનની મહત્વપૂર્ણ ઇનિંગ રમી હતી.