- ટીમ ઈન્ડિયાએ T20 વર્લ્ડકપ 2024નો ખિતાબ જીત્યો
- ટીમ ઈન્ડિયા હજુ પણ બાર્બાડોસમાં અટવાઈ છે
- હરિકેન બેરીલ વાવાઝોડાના કારણે હોટલમાં ફસાઈ ટીમ
ટીમ ઈન્ડિયાએ T20 વર્લ્ડકપની ફાઇનલમાં શાનદાર જીત નોંધાવીને વર્લ્ડકપની ટ્રોફી જીતી લીધી છે. લગભગ 13 વર્ષ બાદ ભારતીય ટીમે વર્લ્ડકપ ટ્રોફી જીતી હતી. ફાઈનલમાં સાઉથ આફ્રિકા સામેની શાનદાર જીતમાં સૂર્યકુમાર યાદવનો મોટો ફાળો હતો. તેણે 20મી ઓવરમાં ડેવિડ મિલરનો શાનદાર કેચ લીધો હતો. ટીમ ઈન્ડિયા હજુ પણ બાર્બાડોસમાં અટવાઈ છે. ત્યાં તોફાને ભારતીય ટીમનું ટેન્શન વધાર્યું છે.
સૂર્યકુમાર યાદવે હવામાનની સ્થિતિ જણાવી
આ દરમિયાન સૂર્યાએ બાર્બાડોસની હવામાનની સ્થિતિ જણાવી છે. સૂર્યકુમારે તેના રૂમમાંથી એક વીડિયો રેકોર્ડ કર્યો છે. જેમાં જોઈ શકાય છે કે ત્યાં જોરદાર પવન ફૂંકાઈ રહ્યો છે. સૂર્યાએ ઈન્સ્ટાગ્રામ પર શેર કરેલી સ્ટોરીમાં આ સ્થિતિનો ખુલાસો કર્યો છે.
વાવાઝોડું કેટલું ખતરનાક છે?
તેણે તેના કેપ્શનમાં લખ્યું- પવન ઝડપથી ફૂંકાય છે, દિનકર રાવ ટોપીની સંભાળો. સૂર્યાની પત્ની દેવીશાએ પણ એક વીડિયો પોસ્ટ કર્યો છે. જેમાં દરિયામાં જોરદાર પવન ફૂંકાતા જોવા મળી રહ્યા છે. આ બંને વીડિયોએ ફેન્સનું ટેન્શન વધારી દીધું છે. મળતી માહિતી મુજબ, બેરીલ એક ગંભીર ત્રીજી શ્રેણીનું તોફાન છે. આ વાવાઝોડાની પવનની ઝડપ 195 કિલોમીટર પ્રતિ કલાકની હોવાનું કહેવાય છે. બેરીલ તોફાનને કારણે ભારે વરસાદ અને પૂરનો પણ ભય છે.
હોટલમાં ફસાઈ ટીમ
ટીમ ઈન્ડિયા સોમવારે બાર્બાડોસથી રવાના થવાની હતી, પરંતુ વાવાઝોડાના ખતરાને કારણે તે હોટલ હિલ્ટનમાં ફસાઈ ગઈ છે. આ હોટેલ સમુદ્રની ખૂબ નજીક છે. તેથી તણાવ વધી ગયો છે. ગ્રેડ 3 હરિકેન બેરીલ ઝડપથી બાર્બાડોસ ટાપુની નજીક આવી રહ્યું છે. જેના કારણે એરપોર્ટ પણ બંધ કરી દેવામાં આવ્યું છે. ભારતીય ટીમે ન્યૂયોર્ક જઈને કનેક્ટિંગ ફ્લાઈટ લેવાની છે. પ આવી સ્થિતિમાં ટીમ ઈન્ડિયાના તેમના દેશમાં પાછા ફરવામાં વિલંબ થઈ શકે છે.
