રોહિત શર્માના નેતૃત્વમાં ભારતીય ટીમ પાંચમી ઓક્ટોબરે ઓસ્ટ્રેલિયા રવાના થશે

• વર્લ્ડકપના એક સપ્તાહ પહેલા ઓસ્ટ્રેલિયા જશે ભારતીય ટીમ
  
• ટીમ ઇન્ડિયા 15 દિવસમાં છ T20 રમ્યા બાદ ઓસ્ટ્રેલિયા જશે
• 17 અને 19 ઓક્ટોબરે ઓસ્ટ્રેલિયા-ન્યૂઝીલેન્ડ સામે વોર્મ-અપ મેચ

T20 વર્લ્ડકપની તૈયારીઓ માટે ભારતીય ટીમ ઓસ્ટ્રેલિયા અને સાઉથ આફ્રિકા સામે ત્રણ-ત્રણ T20 મેચની શ્રેણી રમવાની છે. ભારતીય ટીમ ICCની મેગા ઇવેન્ટ પહેલાં 15 દિવસમાં છ T20 મેચ રમ્યા બાદ ઓસ્ટ્રેલિયા રવાના થશે. ભારતીય ટીમ વર્લ્ડકપના એક સપ્તાહ પહેલાં પાંચમી ઓક્ટોબરે રવાના થશે. BCCI બે વોર્મ-અપ મેચ ઉપરાંત વધુ એક પ્રેક્ટિસ મેચનું આયોજન કરવાનું વિચારી રહ્યું છે.

ઓસ્ટ્રેલિયા-ન્યૂઝીલેન્ડ સામે વોર્મ-અપ મેચ

ભારતીય ટીમ 17મી અને 19મી ઓક્ટોબરે યજમાન ઓસ્ટ્રેલિયા અને ન્યૂઝીલેન્ડ સામે બે વોર્મ-અપ મેચ રમશે. બોર્ડ પોતાની ટીમ માટે વધુ એક પ્રેક્ટિસ મેચ અંગે વિચારી રહ્યું છે અને આ માટે બીજા દેશના ક્રિકેટ બોર્ડના સંપર્કમાં છે. બોર્ડના અધિકારીએ જણાવ્યું હતું કે રોહિત શર્માના નેતૃત્વમાં ભારતીય ટીમ પાંચમી ઓક્ટોબરે ઓસ્ટ્રેલિયા રવાના થશે. સાઉથ આફ્રિકા સામે રમાનારી વન-ડે શ્રેણીમાં ભારતની B-ટીમ વીવીએસ લક્ષ્મણના કોચિંગ હેઠળ રમશે.