- T20 વર્લ્ડકપ 2024માં ઐતિહાસિક અપસેટ સર્જાયો
- સુપર-8માં અફઘાનિસ્તાને ઓસ્ટ્રેલિયાને 21 રનથી હરાવ્યું
- આ સાથે અફઘાનિસ્તાને સેમિફાઇનલની રેસ મુશ્કેલ બનાવી
T20 વર્લ્ડકપ 2024માં ઐતિહાસિક અપસેટ સર્જાયો હતો. આ ફોર્મેટની ચેમ્પિયન રહેલી ઓસ્ટ્રેલિયન ટીમને અફઘાનિસ્તાન સામે હાર મળી હતી. સમગ્ર મેચ દરમિયાન ઓસ્ટ્રેલિયાની ટીમ સંઘર્ષ કરતી જોવા મળી હતી. આ પહેલા મેચમાં અફઘાનિસ્તાનના બેટ્સમેનોએ ઓસ્ટ્રેલિયાને વિકેટ માટે તલપાપડ કરી નાખ્યું હતું. જે બાદ અફઘાનિસ્તાનના બોલરોએ પોતાની કરિશ્માઈ બોલિંગથી ઓસ્ટ્રેલિયાને હરાવ્યું હતું. અફઘાનિસ્તાને આ મેચ 21 રને જીતીને સેમિફાઇનલની રેસ મુશ્કેલ બનાવી દીધી છે.
ભારતનો સેમિફાઈનલ માટે રસ્તો સરળ
ઓસ્ટ્રેલિયાની હારથી ભારતનો રસ્તો આસાન થઈ ગયો છે. ભારતે અત્યાર સુધી 2 મેચ રમી છે અને બંને મેચ જીતી છે. ભારતનો નેટ રન રેટ પણ +2.425 છે. ટીમની આગામી મેચ ઓસ્ટ્રેલિયા સામે થશે. જો ભારત આ મેચ જીતશે તો તે અજેય રીતે સેમીફાઈનલમાં પ્રવેશ કરશે. પરંતુ જો ભારત આ મેચ હારી જાય તો પણ ભારત માટે સેમીફાઈનલમાં પહોંચવું એટલું મુશ્કેલ નહીં હોય. જો કે ભારત ઓસ્ટ્રેલિયા સામેની મેચમાં મોટા માર્જિનથી હારી ન જાય. ભારત અને ઓસ્ટ્રેલિયા વચ્ચે આ મેચ 24 જૂને રમાશે.
ઓસ્ટ્રેલિયાની મુશ્કેલીઓ વધી
અફઘાનિસ્તાને ઓસ્ટ્રેલિયાને હરાવીને આ વર્લ્ડકપમાં અત્યાર સુધીનો સૌથી મોટો અપસેટ સર્જ્યો છે. આ મેચમાં હારને કારણે ઓસ્ટ્રેલિયાની મુશ્કેલીઓ વધી ગઈ છે. ઓસ્ટ્રેલિયા હાલમાં 2 મેચમાં 2 પોઈન્ટ સાથે ગ્રુપમાં બીજા સ્થાન પર છે. અફઘાનિસ્તાન સામે હાર્યા બાદ તેમનો નેટ રન રેટ પણ કથળી ગયો છે. ઓસ્ટ્રેલિયાનો વર્તમાન નેટ રન રેટ +0.223 છે. ઓસ્ટ્રેલિયાએ સેમીફાઈનલમાં પહોંચવા માટે કોઈપણ ભોગે ભારત સામેની મેચ જીતવી પડશે.
જો ઓસ્ટ્રેલિયાની ટીમ ભારત સામે આગામી મેચ જીતે છે અને અફઘાનિસ્તાન તેની આગામી મેચમાં બાંગ્લાદેશને હરાવશે તો ભારત, ઓસ્ટ્રેલિયા અને અફઘાનિસ્તાનના 4-4 પોઈન્ટ થશે. આવી સ્થિતિમાં નેટ રન રેટના આધારે ટીમોને સેમિફાઇનલમાં પ્રવેશ મળશે. તે જ સમયે, જો ઓસ્ટ્રેલિયા ભારત સામેની મેચ હારી જાય છે અને અફઘાનિસ્તાન પણ તેની આગામી મેચ હારી જાય છે, તો ભારત અને ઓસ્ટ્રેલિયાની ટીમો સેમિફાઇનલમાં પહોંચી જશે.
અફઘાનિસ્તાનનું મનોબળ વધ્યું
ભારત સામેની કારમી હાર બાદ અફઘાનિસ્તાને ઓસ્ટ્રેલિયાને હરાવ્યું છે. આ મેચમાં જીત સાથે અફઘાનિસ્તાનનું મનોબળ વધી ગયું છે. સેમીફાઈનલમાં પહોંચવા માટે ટીમે બાંગ્લાદેશ સામેની આગામી મેચ કોઈપણ ભોગે જીતવી પડશે. સેમિફાઇનલમાં પહોંચવા માટે અફઘાનિસ્તાને બાંગ્લાદેશ સામે સારા માર્જિનથી જીત મેળવવી પડશે. જો અફઘાનિસ્તાન બાંગ્લાદેશ સામેની આગામી મેચ જીતે છે અને ભારતીય ટીમ ઓસ્ટ્રેલિયાને હરાવશે તો અફઘાનિસ્તાન ભારત સાથે સેમિફાઇનલમાં પહોંચી જશે. તે જ સમયે, જો અફઘાનિસ્તાન અને ઓસ્ટ્રેલિયા બંને તેમની મેચ જીતી જાય છે, તો સેમિફાઇનલની ટીમ નેટ રન રેટના આધારે નક્કી કરવામાં આવશે.
બાંગ્લાદેશ પણ કરી શકે છે ક્વોલિફાય
આ ગ્રુપમાં છેલ્લા સ્થાને રહેલી બાંગ્લાદેશની ટીમ પણ સેમીફાઈનલમાં પહોંચી શકે છે. આ માટે બાંગ્લાદેશે અફઘાનિસ્તાનને મોટા અંતરથી હરાવવું પડશે. તેમજ બાંગ્લાદેશ ઈચ્છે છે કે ભારત ઓસ્ટ્રેલિયાને મોટા અંતરથી હરાવી દે.
