T20 World cup: ટી-ટવેન્ટી વર્લ્ડ કપમાં સુપર-8માં પહોંચ્યું અફઘાનિસ્તાન, ન્યૂઝીલેન્ડ આઉટ

• ટી-ટવેન્ટી વર્લ્ડ કપમાં સુપર-8માં અફઘાનિસ્તાને ક્વોલિફાઈ કરી લીધું
  
• શુક્રવારે બ્રાયન લારા ક્રિકેટ સ્ટેડિયમમાં ક્રિકેટ મેચ યોજાઈ હતી
• પાપુઆ ન્યૂગિનીને સાત વિકેટે હરાવી અફઘાનિસ્તાને જીતની હેટ્રિક લગાવી

અફઘાનિસ્તાને શુક્રવારે બ્રાયન લારા ક્રિકેટ સ્ટેડિયમમાં પાપુઆ ન્યુ ગિનીને સાત વિકેટથી હરાવીને ટૂર્નામેન્ટમાં જીતની હેટ્રિક પણ નોંધાવી T20-વર્લ્ડ કપના સુપર-8 માટે ક્વોલિફાય કર્યું છે. અફઘાનિસ્તાનની આ જીત ન્યૂઝીલેન્ડ માટે મોટો ઝટકો છે. કિવી ટીમનો સુપર-8માં પહોંચવાનો ઈરાદો પુરો થઈ શક્યો નહોતો.

ન્યૂઝીલેન્ડ બે મેચમાં બે હાર સાથે ગ્રુપ સીમાં તળિયે છે. અફઘાનિસ્તાન અને વેસ્ટ ઈન્ડિઝે ગ્રુપમાં ત્રણેય મેચ જીતી હતી. આ સાથે જ ન્યુઝીલેન્ડને સતત હારનો સામનો કરવો પડ્યો અને ટીમ ટુર્નામેન્ટની રેસમાંથી બહાર થઈ ગઈ છે. આ મેચની વાત કરીએ તો ટોસ જીત્યા બાદ અફઘાનિસ્તાને પાપુઆ ન્યૂ ગીની સામે બોલિંગ કરવાનો નિર્ણય લીધો હતો.

પાપુઆ ન્યૂ ગિની 19.5 ઓવરમાં 95 રનમાં ઓલઆઉટ થઈ ગઈ હતી જેમાં વિકેટકીપર બેટ્સમેન કિપલિન ડોરિગાએ સૌથી વધુ 27 રન બનાવ્યા હતા. જવાબમાં ગુલબદિનની 49 રનની ઇનિંગના આધારે અફઘાનિસ્તાને 15.1 ઓવરમાં 3 વિકેટ ગુમાવીને 96 રનનો લક્ષ્યાંક હાંસલ કરી લીધો હતો. જો કે 96 રનનો પીછો કરતા અફઘાનિસ્તાનની શરૂઆત ખરાબ રહી હતી. ટીમે પ્રથમ ત્રણ ઓવરમાં જ ઓપનર રહેમાનુલ્લા ગુરબાઝ અને ઈબ્રાહિમ ઝદરાનની વિકેટ ગુમાવી દીધી હતી અને પાવરપ્લે 39/2 પર સમાપ્ત થયો હતો. ત્રીજા ક્રમે આવેલા ગુલબદીને ઇનિંગ્સને સંભાળી હતી. જો કે આ પછી પણ અફઘાનિસ્તાને વિકેટો ગુમાવી હતી પરંતુ ગુલબદિન ક્રિઝ પર જ રહ્યો હતો. લડાયક ઇનિંગ્સ રમીને નાયબે સિક્સર ફટકારીને અફઘાનિસ્તાનને જીત અપાવી હતી.