- ટી20 વર્લ્ડકપ 2024માં કુલ 20 ટીમોએ ભાગ લીધો હતો
- વર્લ્ડકપ 2024ની ફાઈનલ મેચ ભારત અને દક્ષિણ આફ્રિકા વચ્ચે રમાઈ હતી
- આ મેચમાં ભારતે દક્ષિણ આફ્રિકાને હરાવીને ટાઈટલ જીત્યું હતું
ટી20 વર્લ્ડકપ 2024 સમાપ્ત થઈ ગયો છે. ભારતે આ સિઝનનો ખિતાબ જીત્યો છે. જ્યારે દક્ષિણ આફ્રિકા પહેલી વખત આ ટૂર્નામેન્ટની ફાઈનલમાં પહોંચી અને રનર અપ બની. આ ટુર્નામેન્ટમાં કુલ 20 ટીમોએ ભાગ લીધો હતો. આ પહેલી વખત ટી20 વર્લ્ડકપમાં 20 ટીમોને એન્ટ્રી આપવામાં આવી હતી.
આની જાહેરાત કરતી વખતે આઈસીસીએ કહ્યું હતું કે તેમની યોજના ક્રિકેટને શક્ય તેટલા વધુ દેશોમાં લઈ જવાની છે, જેથી આ રમત વધુ લોકપ્રિય બને. આ દરમિયાન, ચર્ચા ઝડપથી શરૂ થઈ કે આગામી ટી20 વર્લ્ડકપમાં આ ટૂર્નામેન્ટમાં 20ને બદલે 24 ટીમોને એન્ટ્રી આપવામાં આવશે. ICCએ હવે આ ચર્ચા પર પોતાનો જવાબ આપ્યો છે.
આગામી સિઝન ક્યાં રમાશે
ટી20 વર્લ્ડકપની આગામી સિઝન 2026માં ભારત અને શ્રીલંકાની યજમાનીમાં રમાશે. એવી ચર્ચા ચાલી રહી હતી કે જે રીતે ફૂટબોલ વર્લ્ડકપ-2026માં 48 ટીમોને એન્ટ્રી આપવામાં આવી છે, તેવી જ રીતે આઈસીસી પણ ટી20 વર્લ્ડ કપ-2026માં 24 ટીમોને એન્ટ્રી આપશે. જેમ 2024 ટી20 વર્લ્ડ કપમાં 5 ટીમોના 4 ગ્રુપ બનાવવામાં આવ્યા હતા. તેવી જ રીતે આગામી વર્લ્ડકપમાં 6 ટીમોના 4 ગ્રુપ બનાવવામાં આવશે.
ICCએ કર્યું સ્પષ્ટ
આ ચર્ચા પર પૂર્ણવિરામ મૂકતા, ICC અધિકારીઓએ સ્પષ્ટ કર્યું છે કે ભારત અને શ્રીલંકામાં 2026માં યોજનારી આગામી એડિશનમાં માત્ર 20 ટીમો જ ભાગ લેશે. તેની ભાવિ સિઝનમાં શું થશે તે અંગે આ સમયે કોઈ ચર્ચા થઈ નથી. 2026 પછી, ટુર્નામેન્ટની આગામી એડિશન ઓસ્ટ્રેલિયા અને ન્યુઝીલેન્ડમાં 2028 માટે છે. આ પછી યુકે, સ્કોટલેન્ડ અને આયર્લેન્ડ 2030માં ટી20 વર્લ્ડકપની યજમાની કરશે.
ટી20 વર્લ્ડકપ 2026માં ભાગ લેતી ટીમો
બંને ટીમોને ભારત અને શ્રીલંકામાં યોજાનાર ટી20 વર્લ્ડકપ 2026માં યજમાન તરીકે પ્રવેશ આપવામાં આવશે. આ સિવાય ટી20 વર્લ્ડ કપ 2024ના સુપર-8 ગ્રુપમાં પહોંચનારી ટીમોને પણ સીધી એન્ટ્રી મળશે. તેમાં ભારત, ઓસ્ટ્રેલિયા, દક્ષિણ આફ્રિકા, વેસ્ટ ઈન્ડિઝ, ઈંગ્લેન્ડ, અફઘાનિસ્તાન, બાંગ્લાદેશ અને યુએસએની ટીમો સામેલ થશે. 3 ટીમોને ટી20 ક્રિકેટના આંતરરાષ્ટ્રીય રેન્કિંગ દ્વારા પ્રવેશ મળશે, જેમાં હાલમાં પાકિસ્તાન, ન્યુઝીલેન્ડ અને આયર્લેન્ડની ટીમો સામેલ છે. આ તમામ સહિત કુલ 12 ટીમો ટૂર્નામેન્ટમાં સીધી એન્ટ્રી કરશે. બાકીની 8 ટીમોએ ક્વોલિફાઈંગ રાઉન્ડમાંથી પસાર થવું પડશે.
