- રેસલર વિનેશ ફોગાટને અયોગ્ય ઠેરવવામાં આવી હતી
- ફાઈનલ પહેલા 100 ગ્રામ વધારે વજન ગેરલાયક ઠેરવવામાં આવી
- વિનેશ ફોગાટના કેસમાં કોર્ટનો નિર્ણય 16 ઓગસ્ટે આવશે
પેરિસ ઓલિમ્પિક 2024 બાદ વિનેશ ફોગાટના કેસમાં નિર્ણય આવવાનો બાકી છે. કોર્ટ ઓફ આર્બિટ્રેશન ફોર સ્પોર્ટ્સ (CAS) મંગળવારે (13 ઓગસ્ટ) તેના નિર્ણયની જાહેરાત કરવાની હતી, પરંતુ હવે તેને મુલતવી રાખવામાં આવ્યો છે. હવે કોર્ટનો નિર્ણય 16 ઓગસ્ટે આવશે. જો આ નિર્ણય વિનેશની તરફેણમાં આવશે તો તેને સિલ્વર મેડલ મળશે.
વાસ્તવમાં વિનેશે સિલ્વર મેડલ માટે કોર્ટ ઓફ આર્બિટ્રેશન ફોર સ્પોર્ટ્સ (CAS)માં અપીલ કરી હતી. CASએ આ મામલે 9 ઓગસ્ટે સુનાવણી કરી હતી. આ દરમિયાન ભારતીય ઓલિમ્પિક સંઘના વરિષ્ઠ વકીલ હરીશ સાલ્વેએ વિનેશનો પક્ષ રજૂ કર્યો હતો. વધારે વજનના કારણે વિનેશને ગેરલાયક ઠેરવવામાં આવી હતી. તેનું વજન 100 ગ્રામ વધુ હોવાનું જાણવા મળ્યું હતું. હવે વિનેશ સંયુક્ત સિલ્વર મેડલની માંગ કરી રહી છે.
જાણો શું છે સમગ્ર મામલો
મહિલાઓની 50 કિગ્રા વર્ગમાં, વિનેશ ફોગાટે પ્રથમ રાઉન્ડમાં જાપાનની વિશ્વ નંબર-1 યુઇ સુસાકીને હરાવીને હલચલ મચાવી હતી. આ પછી, વિનેશે તેની ક્વાર્ટર ફાઈનલ મેચ પણ આસાનીથી જીતી લીધી અને સાંજે સેમિફાઈનલમાં ક્યુબાના ગુઝમેન લોપેઝને હરાવીને ફાઇનલમાં જગ્યા બનાવી. તે ઓલિમ્પિકની ફાઇનલમાં પહોંચનારી ભારતની પ્રથમ મહિલા રેસલર બની હતી. આ સાથે તેનો મેડલ પણ કન્ફર્મ થઈ ગયો, જે ગોલ્ડ હોઈ શકે અને ઓછામાં ઓછો સિલ્વર મેડલ તો પાક્કો હતો.
ત્યારબાદ બીજા દિવસે એટલે કે 7મી ઓગસ્ટે ફાઈનલ યોજાવાની હતી, પરંતુ ફાઈનલ પહેલા નિયમ મુજબ સવારે ફરીથી વજન માપવાનું હતું. અહીં જ વિનેશનું વજન 50 કિલોના નિર્ધારિત વજન કરતાં 100 ગ્રામ વધુ હોવાનું જણાયું હતું અને UWW ના નિયમો મુજબ તેને અયોગ્ય જાહેર કરી ફાઈનલમાંથી બહાર ફેંકી દેવામાં આવી હતી. UWW ના નિયમો એટલા કડક છે કે માત્ર ફાઇનલ જ નહીં, પરંતુ તેમના તમામ પરિણામો રદ કરવામાં આવ્યા હતા, તેમને સમગ્ર ઇવેન્ટમાંથી અયોગ્ય જાહેર કરવામાં આવી હતી. જેથી સંભવિત સિલ્વર મેડલ પણ છીનવી લેવામાં આવ્યો હતો. તે 12 રેસલરની યાદીમાં છેલ્લા સ્થાને રાખવામાં આવી હતી.
