- IPLમાં અવાર નવાર મેચ ફિક્સિંગના આરોપો લાગતા રહેતા હોય છે
- CSK અને RRને મેચ ફિક્સિંગ મામલે 2 વર્ષનો બેન લાગ્યો
- ખુલાસો થયો છે કે IPL 2009ના ઓક્શનમાં ફિક્સિંગ થયું હતું
ઈન્ડિયન પ્રીમિયર લીગમાં મેચ ફિક્સિંગના મામલા કોઈનાથી છુપાયેલા નથી. તે 2013નો સમય હતો જ્યારે મેચ ફિક્સિંગના આરોપમાં એસ શ્રીસંત, અજીત ચંદીલા અને અંકિત ચવ્હાણ પર ક્રિકેટ રમવા પર પ્રતિબંધ મૂકવામાં આવ્યો હતો. જ્યારે તપાસ સમિતિની રચના કરવામાં આવી ત્યારે ચેન્નાઈ સુપર કિંગ્સ (CSK) અને રાજસ્થાન રોયલ્સ (RR)ને IPL કોન્ટ્રાક્ટમાંથી બે વર્ષ માટે સસ્પેન્ડ કરવામાં આવ્યા હતા. આજે પણ ક્રિકેટ પ્રેમીઓ IPLના તે ભયાનક કૌભાંડ વિશે સાંભળીને ડરી જાય છે. IPLના કમિશનર રહી ચૂકેલા લલિત મોદીએ વર્ષો પહેલા એક ઈન્ટરવ્યુમાં કહ્યું હતું કે ઈંગ્લેન્ડના ક્રિકેટર એન્ડ્રુ ફ્લિન્ટોફ પર લગાવવામાં આવેલી બિડ ફિક્સ હતી.
શું 2009ની હરાજી ફિક્સ હતી?
IPL 2009 ની હરાજી ગોવામાં કરવામાં આવી હતી. બીજી ઘણી ટીમો પોતાની ટીમોને હરાજી માટે તૈયાર કરવામાં વ્યસ્ત હતી, પરંતુ ચેન્નાઈ સુપર કિંગ્સની નજર ટોચના ખેલાડી પર હતી. એન્ડ્રુ ફ્લિન્ટોફે 2009ની હરાજી માટે પોતાને પ્રથમ વખત ઉપલબ્ધ કરાવ્યા હતા. IPLના પૂર્વ કમિશનર લલિત મોદીએ એક મીડિયા ઈન્ટરવ્યુમાં જણાવ્યું હતું કે તેઓ જાણતા હતા કે રાજસ્થાન રોયલ્સ કોઈપણ કિંમતે ઈંગ્લેન્ડના ઓલરાઉન્ડર ફ્લિન્ટોફને ખરીદવા માંગે છે. પરંતુ હરાજી પહેલા જ બીસીસીઆઈના તત્કાલિન પ્રમુખ અને સીએસકેના માલિક એન શ્રીનિવાસને લલિતને પત્ર લખ્યો હતો. CSKની પણ નજર ફ્લિન્ટોફ પર હોવાથી, લલિત મોદીએ RR મેનેજમેન્ટને સોહેલ તનવીરને જાળવી રાખવા કહ્યું.
પાકિસ્તાની ખેલાડી તનવીરને જાળવી રાખવા રાજસ્થાન રોયલ્સ પાસે બહુ ઓછા પૈસા બચ્યા હતા. આવી સ્થિતિમાં ફ્લિન્ટોફને ખરીદવો તેમના માટે શક્ય ન હતો. આ કારણે ચેન્નાઈ સુપર કિંગ્સે 2009ની હરાજીમાં ફ્લિન્ટોફ પર રૂ. 9.8 કરોડ એટલે કે 1.55 મિલિયન યુએસ ડોલરની બોલી લગાવી હતી. લલિત મોદીએ પોતે સ્વીકાર્યું છે કે તેમણે હરાજીમાં દખલ કરવી જોઈતી હતી અને તેણે તેની જવાબદારી પણ લીધી છે.
એન્ડ્રુ ફ્લિન્ટોફ માત્ર એક સિઝન રમ્યો હતો
એન્ડ્રુ ફ્લિન્ટોફ એક જ સિઝનમાં કરોડપતિ બની ગયો અને IPL 2009માં તેણે 3 મેચ રમીને બેટ વડે 62 રન બનાવ્યા, જ્યારે બોલિંગમાં માત્ર 2 વિકેટ લીધી. 2009ની સિઝન પછી તે ઘૂંટણની સર્જરીને કારણે IPLની આગામી સિઝન રમ્યો ન હતો અને તે પછી તે ક્યારેય આ લીગમાં પાછો ફર્યો નહોતો.
