- WPLમાં દિલ્હી કેપિટલ્સના ખેલાડીને દંડ ફટકાર્યો
- આચાર સંહિતાનું ઉલ્લંઘન કરવા બદલ દંડ ફટકાર્યો
- અરુંધતીને મેચ ફીનો 10 ટકા દંડ ફટકારવામાં આવ્યો
વુમન્સ પ્રીમિયર લીગ 2024માં દિલ્હી કેપિટલ્સ અને યુપી વોરિયર્સ વચ્ચે રમાયેલી મેચમાં દિલ્હી કેપિટલ્સના ખેલાડીને દંડ ફટકારવામાં આવ્યો છે. વાસ્તવમાં, દિલ્હી કેપિટલ્સના ખેલાડીને WPL આચાર સંહિતાનું ઉલ્લંઘન કરવા બદલ દોષી ઠેરવવામાં આવી હતી. સોમવારે વિમેન્સ પ્રીમિયર લીગ 2024 (WPL)માં દિલ્હી કેપિટલ્સ અને યુપી વોરિયર્સ વચ્ચે મેચ રમાઈ હતી. આ મેચમાં દિલ્હી કેપિટલ્સે યુપી વોરિયર્સને 9 વિકેટે હરાવ્યું હતું. WPL 2024માં યુપી વોરિયર્સની આ પ્રથમ જીત હતી.
અરુંધતી રેડ્ડી પર દંડ ફટકારવામાં આવ્યો
દિલ્હી કેપિટલ્સની ફાસ્ટ બોલર અરુંધતી રેડ્ડીને યુપી વોરિયર્સ સામેની મેચ દરમિયાન મહિલા પ્રીમિયર લીગ 2024 (WPL)ની આચાર સંહિતાનું ઉલ્લંઘન કરવા બદલ તેની મેચ ફીના 10 ટકા દંડ ફટકારવામાં આવ્યો છે. 26 વર્ષીય ખેલાડીએ દિલ્હી કેપિટલ્સની 9 વિકેટની જીતમાં મહત્વની ભૂમિકા ભજવી હતી. પરંતુ મેચ દરમિયાન તે કેટલાક નિયમોનું ઉલ્લંઘન કરવા બદલ દોષી સાબિત થઈ હતી.
શું હતો સમગ્ર મામલો?
હકીકતમાં, મેચ દરમિયાન અરુંધતિ રેડ્ડી એવી હરકતો કરતી જોવા મળી હતી જેનાથી ખેલાડી ગુસ્સે થઈ શકે. જે WPL આચાર સંહિતાની કલમ 2.5 હેઠળ લેવલ-1 નો ગુનો છે. મળતી માહિતી મુજબ, આચાર સંહિતાના લેવલ-1ના ઉલ્લંઘન માટે મેચ રેફરીનો નિર્ણય અંતિમ છે. વાસ્તવમાં, જ્યારે મેચમાં બોલિંગ કરતી વખતે અરુંધતિએ પૂનમ ખેમનરની વિકેટ લીધી ત્યારે તે કેટલીક હરકતો કરતી જોવા મળી હતી. જેના કારણે તેના પર આ દંડ ફટકારવામાં આવ્યો છે.
શું હતી મેચની સ્થિતિ
જો મેચની વાત કરીએ તો પ્રથમ બેટિંગ કરતા યુપી વોરિયર્સે 20 ઓવરમાં 9 વિકેટ ગુમાવીને માત્ર 119 રન બનાવ્યા હતા. યુપી વોરિયર્સ તરફથી બેટિંગ કરતી વખતે શ્વેતા શેરાવતે સૌથી વધુ 45 રનની ઇનિંગ રમી હતી. દિલ્હી કેપિટલ્સ તરફથી બોલિંગ કરતી વખતે રાધા યાદવે સૌથી વધુ 4 વિકેટ લીધી હતી. આ પછી દિલ્હી કેપિટલ્સે 14.3 ઓવરમાં ટાર્ગેટ હાંસલ કરીને જીત નોંધાવી હતી. દિલ્હી તરફથી શેફાલી વર્માએ સૌથી વધુ 64 રનની ઇનિંગ રમી હતી.
