- યુપી વોરિયર્સ અને દિલ્હી કેપિટલ્સને 1 રનથી હરાવ્યું
- દીપ્તિ શર્માને પ્લેયર ઓફ ધ મેચ તરીકે પસંદ કરાઈ
- દીપ્તિ શર્માએ હેટ્રિક વિકેટ ઝડપી મેચની બાજી પલટી
WPL 2024 દરેક મેચ પછી વધુ રોમાંચક બની રહી છે. લીગની 15મી મેચ યુપી વોરિયર્સ અને દિલ્હી કેપિટલ્સ વચ્ચે રમાઈ હતી. આ રોમાંચક મેચમાં દીપ્તિ શર્માએ ઈતિહાસ રચ્યો હતો. યુપી આ મેચ માત્ર 1 રનથી જીતી શક્યું હતું. આ મેચ સરળતાથી દિલ્હી કેપિટલ્સની તરફેણમાં જશે તેવું લાગી રહ્યું હતું, પરંતુ 19મી ઓવરમાં બોલિંગ કરવા આવેલી દીપ્તિ શર્માએ મેચની બાજી પલટી દીધી હતી. દીપ્તિ શર્માએ દિલ્હી સામે રોમાંચક મેચમાં હેટ્રિક વિકેટ લઈને યુપી વોરિયર્સને જીત અપાવી છે. જાણો WPLના ઈતિહાસમાં કેટલા ખેલાડીઓએ આ સિદ્ધિ મેળવી છે.
દીપ્તિ શર્માએ વિનિંગ સ્પેલ નાખ્યો
14મી ઓવરમાં જ્યારે દીપ્તિ શર્મા બોલિંગ કરવા આવી ત્યારે તેણે ઓવરના છેલ્લા બોલ પર સેટ બેટર મેગ લેનિંગને 60ના સ્કોર પર આઉટ કરી દીધી હતી. આ પછી દીપ્તિ શર્માની માત્ર એક ઓવર બાકી હતી. કેપ્ટન એલિસા હીલીએ 19મી ઓવરમાં ઘણી અપેક્ષાઓ સાથે ફરી એકવાર દીપ્તિ શર્માને બોલ સોંપ્યો, ઓલરાઉન્ડર આવતાની સાથે જ તેણે પહેલા 2 બોલમાં 2 વિકેટ ઝડપી અને તેની હેટ્રિક પણ પૂરી કરી. આ મેચમાં દીપ્તિએ 4 ઓવર નાંખી અને 19 રન આપીને 4 વિકેટ લીધી હતી.
આ પહેલા પણ હેટ્રિક લીધી
WPLના ઈતિહાસમાં આ બીજી હેટ્રિક છે. ગત સિઝનમાં મુંબઈ તરફથી રમતી વખતે યુપી વોરિયર્સ સામે ઈસી વોંગે પ્રથમ હેટ્રિક લીધી હતી. હવે યુપીના ખેલાડીએ ઈતિહાસનું પુનરાવર્તન કર્યું છે. દીપ્તિ શર્માએ આ મેચમાં માત્ર તેની બોલિંગ જ નહીં પરંતુ તેના બેટથી પણ મહત્વપૂર્ણ યોગદાન આપ્યું છે. તેણે મેચમાં માત્ર 48 બોલમાં 59 રનની ઇનિંગ રમી હતી. આ મેચ વિનિંગ પ્રદર્શનના કારણે તેને પ્લેયર ઓફ ધ મેચ પણ જાહેર કરવામાં આવી હતી. આ મેચ જીતીને યુપી હજુ પણ પ્લે ઓફની રેસમાં છે.
કેવો રહ્યો મેચનો રોમાંચ?
યુપી વોરિયર્સે ટોસ જીતીને પ્રથમ બેટિંગ કરવાનો નિર્ણય કર્યો હતો. આ મેચમાં યુપીના બેટ્સમેનો કંઈ ખાસ કરી શક્યા ન હતા અને 20 ઓવર પછી ટીમ 138 રન જ બનાવી શકી હતી. યુપી માટે આ લીગમાં રહેવા માટે આ મેચ ખૂબ જ મહત્વપૂર્ણ હતી, પરંતુ દિલ્હીને જીતવા માટે આસાન ટાર્ગેટ મળ્યો હતો. એવું લાગતું હતું કે દિલ્હી આસાનીથી મેચ જીતી જશે, પરંતુ દીપ્તિ શર્માએ ઐતિહાસિક સ્પેલ બતાવીને યુપીને 1 રનથી મેચ જીતાડી હતી. દિલ્હી માટે ખતરનાક બેટ્સમેન મેગ લેનિંગે માત્ર 46 બોલમાં 60 રનની ઇનિંગ રમી હતી. લેનિંગ સિવાય એક પણ બેટ્સમેન 20 રનના આંકડાને સ્પર્શી શક્યો નહતો.
