Gujarat Rain Update: આતુરતાનો અંત, અમદાવાદ, ભાવનગર અને ભરૂચ સહિત અનેક જિલ્લામાં મેઘરાજાની ધમાકેદાર એન્ટ્રી

ગુજરાતભરમાં લાંબા સમયથી વરસાદની કાગડોળે રાહ જોઈ રહેલા નાગરિકો અને ખેડૂતો માટે ખુશીના સમાચાર આવ્યા છે. રાજ્યના હવામાનમાં પલટો આવતાં જ અનેક જિલ્લાઓમાં મેઘરાજાએ ધમાકેદાર આગમન કર્યું છે. અમદાવાદ અને ભાવનગર સહિતના વિસ્તારોમાં લાંબી પ્રતીક્ષા બાદ વરસાદી રાઉન્ડ શરૂ થતાં લોકોમાં ભારે આનંદ અને ઉત્સાહનો માહોલ જોવા મળી રહ્યો છે. અસહ્ય ગરમી અને બફારાથી પરેશાન લોકોને આ વરસાદી માહોલના કારણે મોટી રાહત મળી છે.

અમદાવાદમાં વરસાદ

સોમવારના રોજ અમદાવાદમાં વરસાદી માહોલ જામ્યો હતો. અમદાવાદ શહેરના કેટલાક વિસ્તારોમાં વરસાદી ઝાપટા જોવા મળ્યા હતા. લાંબા સમય બાદ વરસાદ થતા લોકોને ગરમીથી લોકોને રાહત મળી છે.

ભાવનગરના ગ્રામ્ય વિસ્તારોમાં મેઘ મહેર

ભાવનગર જિલ્લામાં વરસાદનો નવો રાઉન્ડ શરૂ થઈ ચૂક્યો છે. જિલ્લાના મહુવા તાલુકામાં કાળા ડિબાંગ વાદળોની ફોજ સાથે વાતાવરણમાં એકાએક પલટો આવ્યો હતો અને બગદાણા તેમજ મોણપર સહિતના ગ્રામ્ય વિસ્તારોમાં વરસાદનું આગમન થયું હતું. હાલના તબક્કે ગામડાઓમાં ખેતીના પાક માટે વરસાદની ખૂબ જ તાતી જરૂરિયાત હતી, તેવામાં મેઘરાજાના આશીર્વાદ વરસતા ખેડૂતોના ચહેરા ખીલી ઉઠ્યા છે. જો આ જ પ્રમાણે વરસાદ ચાલુ રહેશે તો આગામી દિવસોમાં ખેતીમાં મોટો ફાયદો થવાની આશા સેવાઈ રહી છે.

ભરૂચના પાનોલી અને અંકલેશ્વર GIDCમાં પણ વરસાદી ઝાપટાં

બીજી તરફ ભરૂચ જિલ્લામાંથી પણ વરસાદના અહેવાલો મળી રહ્યા છે. ભરૂચના ઔદ્યોગિક હબ ગણાતા પાનોલી અને તેની આસપાસના વિસ્તારોમાં મેઘરાજાએ હાજરી પુરાવી છે. પાનોલી નજીકના વિસ્તારોમાં પવન સાથે વરસાદી ઝાપટાં પડ્યા હતા. આ ઉપરાંત અંકલેશ્વર જીઆઈડીસી વિસ્તારમાં પણ આકાશ વાદળછાયું બન્યા બાદ વરસાદી માહોલ જામ્યો હતો. ઉદ્યોગ નગરીમાં લાંબા સમયથી પડી રહેલી અસહ્ય ગરમી બાદ આ વરસાદી ઝાપટાં પડતા જ સમગ્ર વાતાવરણમાં મધુર ઠંડક પ્રસરી ગઈ છે અને શ્રમિકો તેમજ સ્થાનિક રહીશોએ રાહતનો શ્વાસ લીધો છે.

આ પણ વાંચો - Gujarat Weather: આગામી ત્રણ કલાક વરસાદનું રેડ એલર્ટ જાહેર, આ વિસ્તારોમાં મેઘરાજાની એન્ટ્રી થશે