ભારતીય હવામાન વિભાગ દ્વારા ડાંગ જિલ્લામાં આવતીકાલે એટલે કે 31 જુલાઈના રોજ અતિભારે વરસાદનું 'રેડ એલર્ટ' જાહેર કરવામાં આવ્યું છે. આ ગંભીર આગાહીને પગલે વિદ્યાર્થીઓની સુરક્ષા અને સલામતીને ધ્યાનમાં રાખીને ડાંગ જિલ્લા કલેક્ટર એન. ડી. પરમારે મોટો નિર્ણય લીધો છે. કલેક્ટરના આદેશ અનુસાર, 31 જુલાઈના રોજ ડાંગ જિલ્લાની તમામ શૈક્ષણિક સંસ્થાઓ (શાળાઓ, કોલેજો અને આંગણવાડી)માં રજા જાહેર કરવામાં આવી છે.
તમામ અધિકારીઓ-કર્મચારીઓ સ્ટેન્ડબાય
ચોમાસાની ભયાનક સ્થિતિને પહોંચી વળવા માટે જિલ્લા વહીવટી તંત્ર પૂરેપૂરું એલર્ટ મોડ પર આવી ગયું છે. કલેક્ટરે જિલ્લાના ત્રણેય તાલુકામાં લાઇઝન અધિકારીઓની નિમણૂક કરી દીધી છે. આ ઉપરાંત, તમામ સરકારી અધિકારીઓ અને કર્મચારીઓને તાત્કાલિક અસરથી સ્ટેન્ડબાય રહેવાનો આદેશ આપવામાં આવ્યો છે. જે કર્મચારીઓ રજા પર હતા, તેમની રજાઓ રદ કરીને તેમને તુરંત જ પોતાના હેડક્વાર્ટર પર હાજર થઈ જવા માટે સ્પષ્ટ સૂચના આપવામાં આવી છે.