અવિરત વરસેલા અતિભારે વરસાદને કારણે અમદાવાદ-બાવળા હાઈવે પાણીમાં ગરકાવ થઈ જતાં વાહનવ્યવહાર ઠપ થઈ ગયો છે. બાવળા નજીક આવેલા ગેલોપ્સ ઈન્ડસ્ટ્રીયલ પાર્કમાં ચોમેર કમરટોળ પાણી ભરાઈ જતાં પરિસ્થિતિ અત્યંત ગંભીર બની છે. આ પરિસરમાં અંદાજિત 900 જેટલા લોકો ફસાઈ ગયા હતા, જેમને બહાર કાઢવા માટે છેલ્લા બે દિવસથી રાત-દિવસ મોટા પાયે રેસ્ક્યૂ ઓપરેશન ચલાવવામાં આવી રહ્યું છે.
સંયુક્ત ટીમો રેસ્ક્યૂ કામગીરીમાં જોડાઈ
સ્થિતિની નાજુકતાને ધ્યાનમાં રાખીને સ્થાનિક પોલીસ ઉપરાંત એનડીઆરએફ, એસડીઆરએફ , ભારતીય આર્મી અને કોસ્ટગાર્ડની સંયુક્ત ટીમો રેસ્ક્યૂ કામગીરીમાં જોડાઈ છે. ઘટનાસ્થળે પહોંચેલા રેન્જ આઈજી તેમજ જિલ્લા એસપી એ પોતે ટ્રેક્ટરમાં બેસીને પાણીમાં ગરકાવ વિસ્તારોનું પ્રત્યક્ષ નિરીક્ષણ કર્યું હતું અને રાહત કામગીરીને વધુ ઝડપી બનાવવા સૂચનાઓ આપી હતી.