પાટણ જિલ્લાના સાંતલપુર પંથકમાં મેઘરાજાએ મન મૂકીને વરસતાં ચારેય તરફ જળબંબાકારની આકાશી આફત સર્જાઈ છે. સાંતલપુરમાં સાંબેલાધાર વરસાદને કારણે ભીલોટ ત્રણ રસ્તાથી સુઈગામ તરફ જતો મુખ્ય માર્ગ સંપૂર્ણપણે બેટમાં ફેરવાઈ ગયો છે. રસ્તાઓ પર ઘૂંટણસમા પાણી ફરી વળતાં વાહન વ્યવહાર સંપૂર્ણપણે ખોરવાઈ ગયો છે અને વાહનચાલકો ભારે મુશ્કેલીમાં મુકાયા છે.
પાણીના ભારે પ્રવાહને કારણે ટ્રક રોડ પર જ પલટી
ઉપરવાસમાંથી સતત ધસમસતા પાણીનો પ્રવાહ આવવાના કારણે લોદરા ગામ નજીક એક અનિચ્છનીય ઘટના સામે આવી છે, જેમાં પાણીના ભારે પ્રવાહને કારણે એક ટ્રક રોડ પર જ પલટી મારી ગઈ હતી. સદનસીબે આ દુર્ઘટનામાં મોટી જાનહાનિ ટળી છે, પરંતુ પાણીનો પ્રવાહ એટલો ઝડપી છે કે નાના-મોટા તમામ વાહનો માટે રસ્તો પસાર કરવો અત્યંત જોખમી બન્યો છે.
