વલસાડ જિલ્લામાં મેઘરાજા આફત બનીને વરસી રહ્યા છે, ત્યારે જિલ્લામાં પૂરની પરિસ્થિતિ વધુ ગંભીર બની રહી છે. નાનાપોંઢાથી અંભેટી તરફ જતા મુખ્ય રસ્તા પર નદી-નાળાના પાણી ફરી વળતાં વાપીથી અંભેટી અને નાનાપોંઢાને જોડતો વાહનવ્યવહાર સંપૂર્ણપણે ઠપ્પ થઈ ગયો છે. રસ્તા પર ભયજનક સપાટીએ પાણી વહી રહ્યા હોવા છતાં પસાર થવાનો પ્રયાસ કરતી એક ખાનગી બસ પૂરના પાણી વચ્ચે ફસાઈ ગઈ છે.
બસમાં ડ્રાઈવર અને કંડક્ટર સહિત અનેક મુસાફરો ફસાયેલા છે
મળતી માહિતી મુજબ, આ ખાનગી બસમાં ડ્રાઈવર અને કંડક્ટર સહિત અનેક મુસાફરો ફસાયેલા છે. રસ્તા પર અચાનક પાણીનું સ્તર વધી જતાં બસ બંધ પડી ગઈ હતી અને ચારેકોર પાણીથી ઘેરાઈ ગઈ હતી. પૂરના પાણી વચ્ચે બસ ફસાઈ હોવાના સમાચાર મળતાં જ સ્થાનિકોમાં ચિંતાનો મોજૂસ પ્રસરી ગયો છે.
વહીવટી તંત્ર તરફથી હજુ સુધી કોઈ મદદ મળી નથી
ઘટના બન્યાને કલાકો વિતી ગયા હોવા છતાં વહીવટી તંત્ર તરફથી હજુ સુધી કોઈ મદદ કે રાહત ટીમ ઘટનાસ્થળે પહોંચી નથી, જેને કારણે ફસાયેલા મુસાફરોના શ્વાસ અધ્ધર થઈ ગયા છે. સ્થાનિકો અને ગ્રામજનો પોતાના સ્તરે મદદ કરવાનો પ્રયાસ કરી રહ્યા છે, પરંતુ પાણીનો પ્રવાહ તેજ હોવાથી તંત્ર દ્વારા તાત્કાલિક રેસ્ક્યૂ કામગીરી શરૂ કરવામાં આવે તેવી માંગ ઉઠી રહી છે.
https://www.instagram.com/reel/DbFHQmfj6Iv/?utm_source=ig_web_button_share_sheet
માર્ગ પર ફસાયેલી ખાનગી બસમાંથી 16 મુસાફરોને બચાવાયા
વલસાડ જિલ્લાના નાનાપોંઢા તાલુકાના અંભેટી પાસે કોપરેલી- વાપી મુખ્ય રસ્તા પર ખાનગી બસ ફસાઈ હતી. આ બસમાં 16 વ્યક્તિ મુસાફરી કરી રહ્યા હતા. સ્થાનિક તંત્રને આ સમાચાર પ્રાપ્ત થતા તંત્ર અને સ્થાનિક ગ્રામજનો દ્વારા રેસ્કયુ ઓપરેશનની કામગીરી હાથ ધરવામાં આવી હતી. સ્થાનિક પોલીસ અને ગ્રામ્યજનો દ્વારા બસમાં મુસાફરી કરી રહેલા તમામ મુસાફરોને સલામત રીતે બહાર કાઢવામાં આવ્યા હતા.
આ પણ વાંચો : Monsoon 2026 : દક્ષિણ ગુજરાતમાં મેઘતાંડવ: કપરાડામાં 16 ઈંચ વરસાદ, શાળા-કોલેજો બંધ, કચ્છના દરિયાકાંઠે 'ઓરેન્જ એલર્ટ' જાહેર
