- ઇઝરાયેલ-હમાસ યુદ્ધમાં 4 દિવસીય યુદ્ધવિરામ
- ઇંધણ અને રાંધણ ગેસથી ભરેલા 8 ટેન્કરો ગાઝા પટ્ટી પહોંચ્યા
- ઈઝરાયેલ 150 પેલેસ્ટિનિયન કેદીઓને મુક્ત કરશે: હમાસ
ઇઝરાયેલ-હમાસ યુદ્ધમાં ચાર દિવસીય યુદ્ધવિરામ અમલમાં આવ્યો છે, તેથી શુક્રવારે ઇજિપ્તથી ઇંધણ અને રાંધણ ગેસથી ભરેલા 8 ટેન્કરો ગાઝા પટ્ટી પહોંચ્યા.
ઇઝરાયેલ-હમાસ યુદ્ધમાં ચાર દિવસીય યુદ્ધવિરામ શુક્રવારે વહેલી સવારે અમલમાં આવ્યો. સીએનએનના અહેવાલ મુજબ, કરાર હેઠળ બંને પક્ષો બંધકો અને કેદીઓની આપ-લે કરશે. યુદ્ધવિરામ બાદ શુક્રવારે ઈંધણ અને રસોઈ ગેસથી ભરેલા 8 ટેન્કરો ઈજીપ્તથી ગાઝા પટ્ટી પહોંચ્યા હતા. આ ટેન્કરોને ઇઝરાયેલ અને ઇજિપ્ત વચ્ચેના રફાહ ક્રોસિંગ દ્વારા ગાઝામાં પ્રવેશ આપવામાં આવ્યો હતો.
સવારે 7 વાગ્યે યુદ્ધવિરામ શરૂ થયો અને 4 દિવસ સુધી ચાલશે. આ સમયગાળા દરમિયાન, ગાઝાના શાસક હમાસ જૂથે 7 ઓક્ટોબરના રોજ લેવામાં આવેલા આશરે 240 બંધકોમાંથી ઓછામાં ઓછા 50ને મુક્ત કરવાનું વચન આપ્યું છે. હમાસે કહ્યું કે ઈઝરાયેલ 150 પેલેસ્ટિનિયન કેદીઓને મુક્ત કરશે.
ઇંધણ અને રાંધણ ગેસથી ભરેલા 8 ટેન્કરો ગાઝા પટ્ટી પહોંચ્યા
ઈઝરાયેલે કહ્યું કે યુદ્ધવિરામ લાગુ થયાના થોડા સમય બાદ જ ચાર ઈંધણના ટેન્કર અને રાંધણ ગેસ વહન કરતા ચાર ટેન્કરો ગાઝા પટ્ટીમાં પ્રવેશ્યા. ઇઝરાયેલ યુદ્ધવિરામ દરમિયાન દરરોજ 130,000 લિટર (34,342 ગેલન) ઇંધણની ડિલિવરીની મંજૂરી આપવા સંમત થયું છે, જે અગાઉ મંજૂરી આપવામાં આવી હતી તેનાથી લગભગ બમણું છે, પરંતુ આ હજુ પણ ગાઝાની અંદાજિત 1 મિલિયન લિટરથી વધુની દૈનિક જરૂરિયાતના માત્ર એક ક્વાર્ટર છે.
ઇઝરાયેલે ઇંધણના પ્રવેશ પર પ્રતિબંધ મૂક્યો હતો
નોંધનીય છે કે યુદ્ધના છેલ્લા સાત અઠવાડિયામાંથી મોટાભાગના સમય માટે, ઇઝરાયલે ગાઝામાં કોઈપણ ઇંધણના પ્રવેશ પર પ્રતિબંધ મૂક્યો હતો, અને દાવો કર્યો હતો કે તેનો ઉપયોગ હમાસ દ્વારા લશ્કરી હેતુઓ માટે કરવામાં આવી રહ્યો છે. યુએન સહાય એજન્સીઓએ આવા દાવાઓને નકારી કાઢતા કહ્યું હતું કે ઇંધણના વિતરણ પર નજીકથી દેખરેખ રાખવામાં આવી હતી અને માનવતાવાદી આપત્તિને રોકવા માટે તાત્કાલિક જરૂર હતી.
હમાસના એક અધિકારીએ નામ જાહેર ન કરવાની શરતે કહ્યું કે કરાર હેઠળ મુક્ત થનારા પહેલા 50 બંધકો ઇઝરાયેલના નાગરિકો છે. અમેરિકા અને કતારે ઇઝરાયલ-હમાસ યુદ્ધમાં ચાર દિવસીય યુદ્ધવિરામ અંગે મધ્યસ્થી કરી છે.
