ભારતના રાષ્ટ્રીય સુરક્ષા સલાહકાર અજીત ડોભાલે રશિયામાં BRICS NSA સંમેલનમાં હાજરી આપી હતી. આ દરમિયાન તેમણે તમામ દેશોને ડિજીટલાઇઝેશન અને આતંકવાદને કારણે ઊભા થયેલા પડકારોનો સામનો કરવા માટે બ્રિક્સ દેશો સાથે મળીને કામ કરવા જણાવ્યું હતું.
બહુપક્ષીયતામાં સુધારાની હાકલ કરી
ડોભાલે કોન્ફરન્સમાં કહ્યું કે વર્તમાન પરિસ્થિતિ આધુનિક જોખમો અને સંવેદનશીલ મુદ્દાઓ સાથે લડવા માટે સક્ષમ નથી. વધુમાં તેમણે કહ્યું કે જો આપણે આપણી વિશ્વસનીયતા વધારવી હશે તો બહુપક્ષીયતામાં સુધારો કરવો પડશે. ડોભાલે ICT (ઈન્ફોર્મેશન એન્ડ કોમ્યુનિકેશન ટેકનોલોજી) અને આતંકવાદ, આધુનિક સુરક્ષા પડકારો સાથે સંબંધિત મુદ્દાઓ પર વાત કરી હતી. સંયુક્ત પ્રયાસો દ્વારા પડકારનો સામનો કરવાની જરૂરિયાત પણ વ્યક્ત કરી હતી. આ દરમિયાન તેમણે ચીનના વિદેશ મંત્રી વાંગ યી સાથે પણ વાત કરી હતી. ગુરુવારે, ડોભાલ બ્રિક્સ સમિટની બાજુમાં ચીનના વિદેશ પ્રધાન સાથે દ્વિપક્ષીય બેઠક પણ કરશે.
આધુનિક સુરક્ષા પડકારોની સમીક્ષા કરી
કોન્ફરન્સમાં બ્રિક્સ દેશોના રાષ્ટ્રીય સુરક્ષા સલાહકારોએ વિશ્વના સુરક્ષા પડકારોની પણ સમીક્ષા કરી હતી. આ ત્રણ દિવસીય કોન્ફરન્સ બ્રિક્સની વાર્ષિક સમિટ પહેલા યોજાઈ રહી છે. આગામી મહિને 22 થી 24 ઓક્ટોબર દરમિયાન મોસ્કોમાં યોજાનાર સમિટમાં વડાપ્રધાન નરેન્દ્ર મોદી સહિત બ્રિક્સ દેશોના નેતાઓ ભાગ લેશે. બ્રિક્સમાં બ્રાઝિલ, રશિયા, ભારત, ચીન અને દક્ષિણ અમેરિકાનો સમાવેશ થાય છે. તેમાં 2023માં નવા સભ્ય દેશો ઈજિપ્ત, ઈરાન, યુએઈ, ઈથોપિયા સામેલ થશે. બેઠકમાં સભ્ય દેશો વચ્ચે રશિયા-યુક્રેન યુદ્ધ સહિત વિવિધ મુદ્દાઓ પર ચર્ચા કરવામાં આવશે.
PM મોદીએ આપ્યો સ્પષ્ટ સંદેશ
યુક્રેન પર રશિયાના આક્રમણ બાદ પીએમ મોદીએ 8 અને 9 જુલાઈના રોજ મોસ્કોની પ્રથમ મુલાકાત લીધી હતી. પુતિન સાથેની શિખર બેઠકમાં PM મોદીએ સ્પષ્ટ સંદેશ આપ્યો હતો કે યુક્રેન સંઘર્ષનો ઉકેલ યુદ્ધના મેદાનમાં શક્ય નથી અને બોમ્બ, બંદૂક અને ગોળીઓ વચ્ચે શાંતિ મંત્રણા સફળ થઈ શકે નહીં.
