- પાકિસ્તાનના સિંધ પ્રાંતમાં એક હિંદુ વેપારીની 3 દીકરીઓનું અપહરણ
- બળજબરીથી ધર્મ પરિવર્તન કરીને મુસ્લિમ યુવકો સાથે કરાવ્યા લગ્ન
- સંસ્થાની અપીલ છતાં હિંદુ છોકરીઓના બળજબરીથી ધર્મ પરિવર્તનની સમસ્યા યથાવત
પાકિસ્તાનના સિંધ પ્રાંતમાં એક હિંદુ વેપારીની 3 દીકરીઓનું અપહરણ કરીને બળજબરીથી ધર્મ પરિવર્તન કરીને મુસ્લિમ યુવકો સાથે તેમના લગ્ન કરાવવાનો મામલો સામે આવ્યો છે. પ્રાંતમાં હિંદુ અલ્પસંખ્યકો માટે કામ કરતા એક અધિકાર સમૂહના જણાવ્યા અનુસાર, આ 3 છોકરીઓનું પહેલા અપહરણ કરવામાં આવ્યું હતું અને પછી તેમનું ધર્માંતરણ કરવામાં આવ્યું હતું. ત્યાર બાદ ત્રણેયના લગ્ન એ જ યુવકો સાથે થયા હતા જેમણે તેમનું અપહરણ કર્યું હતું.
મુસ્લિમ યુવકો સાથે લગ્ન કરાવ્યા
પાકિસ્તાનના દરેવર ઇતેહાદના વડા શિવ કાચીએ જણાવ્યું હતું કે આ ઘટના સિંધ પ્રાંતના ધારકી વિસ્તારની છે. ત્રણ યુવતીઓની ઓળખ ચાંદની, રોશની અને પરમેશ કુમારી તરીકે થઈ છે. હિન્દુ વેપારી લીલારામની આ ત્રણ પુત્રીઓનું પહેલા અપહરણ કરવામાં આવ્યું હતું અને પછી તેમનું ધર્મ પરિવર્તન કરીને મુસ્લિમ યુવકો સાથે લગ્ન કરવામાં આવ્યા હતા. તેણે કહ્યું હતું કે યુવતીઓનું ધર્માંતરણ વિસ્તારના જ પીર જાવેદ અહેમદ કાદરીના વતી કરવામાં આવ્યું હતું.
કાચીએ વધુમાં કહ્યું હતું કે તેમની સંસ્થાની અપીલ પછી પણ હિંદુ છોકરીઓના બળજબરીથી ધર્મ પરિવર્તનની સમસ્યા યથાવત છે. વિસ્તારની પોલીસ અને અધિકારીઓ ગુનેગારોને પકડવામાં સક્ષમ નથી. તેણે દાવો કર્યો હતો કે ત્રણેય બહેનોના લગ્ન એ જ મુસ્લિમ છોકરાઓ સાથે થયા હતા જેમણે તેમનું અપહરણ કર્યું હતું.
સીમા હૈદરની ઘટના બાદ હિન્દુ પરિવારોને ધમકીઓ મળી
ઇત્તેહાદના વડાએ કહ્યું હતું કે સીમા હૈદરની ઘટના બાદ સિંધ પ્રાંતમાં રહેતા હિન્દુ પરિવારો પર હુમલા તેજ થયા છે. હિન્દુ પરિવારોને રોજેરોજ ધમકીઓ મળી રહી છે. ગયા અઠવાડિયે ગુંડાઓની ટોળકીએ સિંધ પ્રાંતના કશ્મોર વિસ્તારમાં એક હિન્દુ મંદિર પર રોકેટ લોન્ચર વડે હુમલો કર્યો હતો. આ દરમિયાન ઘણા હિંદુ ઘરોને પણ નિશાન બનાવવામાં આવ્યા હતા.
હકીકતમાં પાકિસ્તાની મૂળની સીમા હૈદર આ દિવસોમાં ઘણી ચર્ચામાં છે. સીમા હૈદર તેના 4 બાળકો સાથે નેપાળ થઈને ભારત આવી છે. સીમા હાલમાં ગ્રેટર નોઈડામાં સચિન મીના સાથે રહે છે. સીમા અને સચિન વચ્ચે મિત્રતા એક ઓનલાઈન ગેમ દ્વારા થઈ હતી. આ પછી બંને વચ્ચે વોટ્સએપ અને ફેસબુક પર વાતચીત શરૂ થઈ હતી. સચિનના પ્રેમમાં પાગલ બનેલી સીમા તેના 4 બાળકોને સચિનના ઘરે લઈ ગઈ છે.
