પડોશી દેશ નેપાળમાંથી એક મોટા અને દુઃખદ અકસ્માતના સમાચાર સામે આવ્યા છે. મંગળવારે વહેલી સવારે નેપાળના પ્રખ્યાત સોલુખુમ્બુ હેલિપેડ પર બે હેલિકોપ્ટર આપસમાં અથડાઈ જવાથી એક ગંભીર દુર્ઘટના સર્જાઈ હતી. આ ભયાનક અકસ્માતમાં એક વિદેશી નાગરિકનું કરૂણ મોત નીપજ્યું છે, જ્યારે અન્ય એક વ્યક્તિ ગંભીર રીતે ઘાયલ થયો છે. 

કેવી રીતે સર્જાયો અકસ્માત?

નેપાળ પોલીસ દ્વારા આપવામાં આવેલા પ્રારંભિક અહેવાલો મુજબ, આ દુર્ઘટના મંગળવારે સવારે આશરે ૮:૧૧ વાગ્યાની આસપાસ બની હતી. સોલુખુમ્બુ હેલિપેડ પર લેન્ડિંગ (ઉતરાણ) કરવાની પ્રક્રિયા ચાલી રહી હતી તે જ સમયે ફિશટેલ એર (Fishtail Air) અને ડાયનેસ્ટી એર (Dynasty Air) ના બે હેલિકોપ્ટર એકબીજા સાથે અથડાઈ ગયા હતા. લેન્ડિંગ દરમિયાન થયેલી આ ગંભીર ટક્કરના કારણે બંને હેલિકોપ્ટરને ભારે નુકસાન પહોંચ્યું હતું અને ત્યાં નાસભાગ જેવી સ્થિતિ સર્જાઈ હતી.
https://x.com/kumarsubodh_/status/2117468205237318069?ref_src=twsrc%5Etfw%7Ctwcamp%5Etweetembed%7Ctwterm%5E2117468205237318069%7Ctwgr%5E%7Ctwcon%5Es1_c10&ref_url=

બચાવ કામગીરી અને રાહત કાર્ય

અકસ્માતની જાણ થતા જ સ્થાનિક પોલીસ અને રેસ્ક્યૂ ટીમ તાત્કાલિક ઘટનાસ્થળે દોડી આવી હતી. આ અકસ્માતમાં ઘાયલ થયેલા વ્યક્તિને તાત્કાલિક ધોરણે પ્રભુ હેલિકોપ્ટર (Prabhu Helicopter) ની મદદથી સારવાર માટે નજીકના લુકલા (Lukla) ખાતે ખસેડવામાં આવ્યા હતા, જ્યાં તેને તબીબી સહાય આપવામાં આવી રહી છે. જોકે, આ ગઝબની દુર્ઘટનામાં મૃત્યુ પામનાર વિદેશી નાગરિક અને ઘાયલ વ્યક્તિની સત્તાવાર ઓળખ હજુ સુધી પ્રશાસન દ્વારા જાહેર કરવામાં આવી નથી. પોલીસ અને એવિએશન ઓથોરિટી દ્વારા મૃતકો અને ઘાયલોની વિગતો મેળવવાની સાથે-સાથે આ અકસ્માત પાછળના ચોક્કસ કારણો જાણવા માટે તપાસ હાથ ધરવામાં આવી છે.

સોલુખુમ્બુ એ માઉન્ટ એવરેસ્ટ અને ટ્રેકિંગ રૂટ પર જનારા પ્રવાસીઓ માટે એક અત્યંત વ્યસ્ત અને મહત્વપૂર્ણ હવાઈ કેન્દ્ર છે, જેના કારણે અહીં સુરક્ષાના ધોરણોને લઈને પણ હવે ગંભીર સવાલો ઊભા થઈ રહ્યા છે.

આ પણ વાંચોઃ Petrol-Diesel Price Today : ક્રૂડ ઓઇલના ભાવમાં ઘટાડો, પેટ્રોલ ડીઝલના ભાવ ઘટી જશે?