દક્ષિણ અમેરિકાના દેશ વેનેઝુએલામાં આવેલા વિનાશક ભૂકંપમાં અત્યાર સુધીમાં 164 લોકોના મોત થયાની સત્તાવાર પુષ્ટિ કરવામાં આવી છે. વેનેઝુએલાના કાર્યવાહક રાષ્ટ્રપતિએ આ આંકડાની જાહેરાત કરી છે. ભૂકંપ આવ્યાને 12 કલાકથી વધુ સમય વીતી ગયો હોવા છતાં હજુ પણ સ્થિતિ સંપૂર્ણ સ્પષ્ટ થઈ નથી. રાજધાની કરાકાસ સહિત દેશના ઘણા વિસ્તારોમાં ભારે તબાહીના દ્રશ્યો જોવા મળી રહ્યા છે.
ભૂકંપ પહેલા લાખો એન્ડ્રોઇડ યુઝર્સને ગૂગલે કર્યા એલર્ટ
આ મહાવિનાશ વચ્ચે ટેક્નોલોજીની એક મોટી કમાલ પણ સામે આવી છે. ભૂકંપના આંચકા અનુભવાય તે પહેલાં જ ગૂગલે વેનેઝુએલાના લાખો એન્ડ્રોઇડ સ્માર્ટફોન યુઝર્સને એલર્ટ મોકલી દીધી હતી. આ એલર્ટ ભૂકંપ આવવાની થોડી સેકન્ડો પહેલાં જ મળ્યું હતું, જેના કારણે ઘણા લોકો સુરક્ષિત સ્થળે ભાગી શક્યા હતા. આ ઘટના બાદ વૈશ્વિક સ્તરે ચર્ચા શરૂ થઈ છે કે, શું ટેક્નોલોજી આપણને કુદરતી આફતોથી બચાવી શકે છે? નિષ્ણાતોના મતે, ગૂગલ ભૂકંપનું પૂર્વાનુમાન નથી કરતું, પરંતુ તેના પ્રારંભિક તરંગોને પકડીને ત્વરિત એલર્ટ સિસ્ટમ દ્વારા લોકોને સાવચેત કરે છે.
126 વર્ષ બાદ દેશમાં આવ્યો સૌથી શક્તિશાળી ભૂકંપ
USGS ના રિપોર્ટ અનુસાર, વેનેઝુએલામાં ગત રાત્રે બે જોરદાર ભૂકંપના આંચકા આવ્યા હતા, જે વર્ષ 1900 પછીના સૌથી શક્તિશાળી આંચકા છે. પ્રથમ ભૂકંપની તીવ્રતા રિક્ટર સ્કેલ પર 7.2 માપવામાં આવી હતી, જ્યારે તેની બરાબર એક મિનિટ પછી આવેલા બીજા ભૂકંપની તીવ્રતા 7.5 નોંધાઈ હતી. આ અગાઉ 29 ઓક્ટોબર 1900ના રોજ વેનેઝુએલામાં 7.7 ની તીવ્રતાનો ભૂકંપ આવ્યો હતો, જેના 126 વર્ષ બાદ આ પ્રકારની ભયાનક આપત્તિ આવી છે.
વૈશ્વિક મદદ શરૂ, ક્રૂડ ઓઇલના ઉત્પાદનને રાહત
વેનેઝુએલાની આ મુશ્કેલ ઘડીમાં દુનિયાભરના દેશો મદદ માટે આગળ આવ્યા છે. અમેરિકા, ડોમિનિકન રિપબ્લિક, અલ સાલ્વાડોર, મેક્સિકો અને કતારથી બચાવ ટુકડીઓ વેનેઝુએલા પહોંચી ગઈ છે અને યુદ્ધના ધોરણે રાહત કાર્ય શરૂ કરાયું છે. આ સિવાય ચીન, બ્રાઝિલ અને કેરેબિયન દેશોએ પણ મદદની ઓફર કરી છે. રાહતની વાત એ છે કે, વેનેઝુએલાના વિશાળ તેલ ભંડારો અને તેલ ઉત્પાદનને આ ભૂકંપથી કોઈ નુકસાન થયું નથી, જે વૈશ્વિક હોર્મુજ કટોકટી વચ્ચે દુનિયા માટે મોટી રાહતના સમાચાર છે.
આ પણ વાંચો - Venezuela Earthquake: જાણે પાતાળમાંથી રાક્ષસ ત્રાડ્યો...ભૂકંપના સાક્ષીએ ધ્રૂજતા અવાજે કહી કંપાવી દેનારી આપવીતી!
