પાકિસ્તાનને IMF પાસેથી મદદ ન મળી તો ફરી ચીનના ઘુંટણીએ પડ્યું

• પાકિસ્તાને ચીનને જલદીથી 1.3 બિલિયન ડોલરની કોમર્શિયલ લોન આપવા વિનંતી કરી
  
• તેમને લોન ચોક્કસ મળશે પરંતુ પાકિસ્તાને અગાઉની લોન ચૂકવવી જોઈએ:ચીન
• પાકિસ્તાન સરકાર IMF પાસેથી લોન મેળવવામાં નિષ્ફળ

આર્થિક સંકટનો સામનો કરી રહેલા પાકિસ્તાને પોતાના સદાકાળના સાથી ચીનને જલદીથી 1.3 બિલિયન ડોલરની કોમર્શિયલ લોન આપવા વિનંતી કરી છે અને તેને IMF લોન પ્રોગ્રામ હેઠળ હપ્તાની ઘટતી જતી શક્યતાઓ વિશે પણ માહિતી આપી છે.

પાકિસ્તાનના અહેવાલ મુજબ, પાકિસ્તાનના નાણા પ્રધાન ઇશાક ડારે સોમવાર 12 જૂનના રોજ ચીનના રાજદ્વારી બાબતોના પ્રભારી પેંગ ચુનક્સ્યુ સાથેની બેઠક દરમિયાન લોનની વિનંતી કરી હતી. રિપોર્ટમાં સૂત્રોને ટાંકીને કહેવામાં આવ્યું છે કે, ચીની અધિકારીઓએ પહેલા જ પાકિસ્તાનને ખાતરી આપી છે કે તેમને લોન ચોક્કસ મળશે પરંતુ પાકિસ્તાને અગાઉની લોન ચૂકવવી જોઈએ. અહીં પાકિસ્તાન ઈચ્છે છે કે જલદી પૈસા આપવામાં આવે. ડારે ચીનના પ્રતિનિધિને શક્ય તેટલી વહેલી તકે લોનના હપ્તા પહોંચાડવા વિનંતી કરી હતી જેની પ્રાપ્તિ પર પાકિસ્તાનના વિદેશી મુદ્રા ભંડારમાં તેજી આવશે.

વિદેશી હૂંડિયામણનો ભંડાર 3 અબજ ડોલરથી ઓછો રહેશે!

એવું કહેવામાં આવી રહ્યું છે કે પાકિસ્તાન બે અઠવાડિયાથી ઓછા સમયમાં બેંક ઓફ ચાઈનાને 300 મિલિયન ડોલરની લોન ચૂકવવા જઈ રહ્યું છે. રોકડની અછતગ્રસ્ત ઇસ્લામિક દેશ ત્રણ અઠવાડિયાની અંદર ચાઇના ડેવલપમેન્ટ બેંકને 1 અબજ ડોલર ચૂકવે તેવી પણ અપેક્ષા છે. તો બીજી તરફ, પાકિસ્તાનની સેન્ટ્રલ બેંકે ડેટા જાહેર કર્યો હતો કે દેશની સત્તાવાર વિદેશી હૂંડિયામણ અનામત હવે ઘટીને 3.9 બિલિયન ડોલર થઈ ગઈ છે અને લોનના હપ્તામાં કોઈપણ વિલંબ આ અનામતને 3 અબજ ડોલર સુધી નીચે લાવી શકે છે.

પાકિસ્તાન સરકાર IMF પાસેથી લોન મેળવવામાં નિષ્ફળ

પાકિસ્તાનના નાણા મંત્રાલયે એક નિવેદનમાં જણાવ્યું હતું કે, નાણામંત્રીએ નવમી સમીક્ષા પૂર્ણ થવા પર IMF સાથે વાટાઘાટોની પ્રગતિ વિશે ચીનના 'ચાર્જ ડી' અફેર્સ'ને અપડેટ કર્યા છે. જો કે, આશ્ચર્યજનક રીતે તમામ પ્રયાસો છતાં પાકિસ્તાન સરકાર અને IMF દેશને નાદારીમાંથી બચાવવાના ઉદ્દેશ્યથી 1.1 અબજ ડોલરના બેલઆઉટ પેકેજ પર સ્ટાફ-લેવલના કરાર સુધી પહોંચવામાં નિષ્ફળ રહ્યા છે.

=