- પાકિસ્તાનને IMF તરફથી મળી મદદ
- પાકિસ્તાન માટે 3 અબજ ડોલરનું બેલઆઉટ પેકેજ મંજૂર કર્યું
- પાકિસ્તાનના વડાપ્રધાન શાહબાઝ શરીફે આ વાત કરી
આર્થિક સંકટનો સામનો કરી રહેલા પાકિસ્તાનને ઇન્ટરનેશનલ મોનેટરી ફંડ (IMF)એ મોટી રાહત આપી છે. IMFએ પાકિસ્તાન માટે 3 અબજ ડોલરનું બેલઆઉટ પેકેજ મંજૂર કર્યું છે. IMF એક્ઝિક્યુટિવ બોર્ડે બુધવારે (12 જુલાઈ) પાકિસ્તાન માટે 3 અબજ ડોલરની સ્ટેન્ડ-બાય વ્યવસ્થાને મંજૂરી આપી હતી.અહેવાલ અનુસાર, IMFએ કહ્યું છે કે તે દક્ષિણ એશિયાઈ દેશ (પાકિસ્તાન)ને મદદ કરવા માટે તરત જ લગભગ 1.2 બિલિયન ડોલરનું વિતરણ કરશે.
પાકિસ્તાનના વડાપ્રધાન શાહબાઝ શરીફે આ વાત કરી
બુધવારે રાત્રે પાકિસ્તાનના વડાપ્રધાન શાહબાઝ શરીફે પણ ટ્વિટ કરીને તેમના દેશને મળેલી લોનની પુષ્ટિ કરી હતી. શાહબાઝ શરીફે એક ટ્વિટમાં લખ્યું છે કે, 'થોડા સમય પહેલા IMFના એક્ઝિક્યુટિવ બોર્ડ દ્વારા 3 અબજ ડોલર સ્ટેન્ડ-બાય એગ્રીમેન્ટની મંજૂરી એ અર્થતંત્રને સ્થિર કરવા અને મેક્રો ઇકોનોમિક સ્થિરતા પ્રાપ્ત કરવાના સરકારના પ્રયાસોમાં એક મોટું પગલું છે.'
તેમણે આગળ લખ્યું હતું કે, 'તે પાકિસ્તાનની આર્થિક સ્થિતિને તાત્કાલિકથી મધ્યમ ગાળાના આર્થિક પડકારોને પહોંચી વળવા માટે મજબૂત બનાવે છે જે આગામી સરકારને આગળનો માર્ગ નક્કી કરવા માટે નાણાકીય જગ્યા આપે છે.'
29 જૂનના રોજ સ્ટેન્ડ-બાય વ્યવસ્થા પર પહોંચ્યા IMF અને પાકિસ્તાન
પાકિસ્તાનના અહેવાલ મુજબ, 29 જૂનના રોજ IMF અને પાકિસ્તાન દેશના નાણાકીય સંકટને હળવા કરવા માટે સ્ટેન્ડ-બાય વ્યવસ્થા પર પહોંચ્યા હતા. રિપોર્ટમાં IMFના નિવેદનને ટાંકીને કહેવામાં આવ્યું છે કે ઇન્ટરનેશનલ મોનેટરી ફંડના એક્ઝિક્યુટિવ બોર્ડે ઓથોરિટીના ઇકોનોમિક સ્ટેબિલાઇઝેશન પ્રોગ્રામને સમર્થન આપવા માટે પાકિસ્તાન માટે 9 મહિનાની સ્ટેન્ડ-બાય વ્યવસ્થાને મંજૂરી આપી છે.
નિવેદનમાં કહેવામાં આવ્યું છે કે આ વ્યવસ્થા પાકિસ્તાન માટે પડકારરૂપ આર્થિક મોરચે આવી છે. મુશ્કેલ બાહ્ય વાતાવરણ, વિનાશક પૂર અને નીતિવિષયક ભૂલોને કારણે મોટી રાજકોષીય અને બાહ્ય ખાધ થઈ છે જેના કારણે નાણાકીય વર્ષ 23માં ઉચ્ચ ફુગાવો અને અનામત બફર્સનો ઘટાડો થયો છે.
