- ઈરાનની સેનાએ 200 હેલિકોપ્ટર સાથે યુદ્ધાભ્યાસ શરૂ કર્યો
- 'આ મોક ડ્રિલ પાછળનો સમગ્ર હેતુ ઈરાનના દુશ્મનોને ચેતવણી આપવાનો
- ઈરાન ખુલ્લેઆમ હમાસને સમર્થન આપી રહ્યું છે
ઈઝરાયલ-હમાસ યુદ્ધ વચ્ચે ઈરાનની સેનાએ 200 હેલિકોપ્ટર સાથે યુદ્ધાભ્યાસ શરૂ કર્યો છે. ઈરાની મીડિયાએ શુક્રવારે આ જાણકારી આપી હતી. ઈરાનના ઈસ્લામિક રિવોલ્યુશનરી ગાર્ડ કોર્પ્સે મધ્ય પૂર્વમાં યુદ્ધની આશંકા વચ્ચે પૂર્વ આયોજિત કાર્યક્રમ મુજબ એસ્ફહાનમાં બે દિવસીય સૈન્ય અભ્યાસ શરૂ કર્યો હતો.
ઈરાની સેનાના કમાન્ડર અમીર ચેશાકે ઈરાનના સરકારી મીડિયા સાથેની વાતચીતમાં કહ્યું હતું કે, 'આ મોક ડ્રિલ પાછળનો સમગ્ર હેતુ ઈરાનના દુશ્મનોને ચેતવણી આપવાનો છે. આ દિવસોમાં ઈઝરાયેલ અને હમાસ વચ્ચે યુદ્ધ ચાલી રહ્યું છે. ઈરાન ખુલ્લેઆમ હમાસને સમર્થન આપી રહ્યું છે.
'અભ્યાસ દ્વારા ઈરાન શું સંદેશ આપવાનો પ્રયાસ કરી રહ્યું છે?'
ઈરાન તેના દાવપેચ દ્વારા કેવો સંદેશ આપવાનો પ્રયાસ કરી રહ્યું છે તેનો અંદાજ એ વાત પરથી લગાવી શકાય છે કે જ્યારે ઈરાનની સેનાએ તેના દાવપેચ શરૂ કર્યા તે જ સમયે ઈરાનના વિદેશ મંત્રી હોસૈન અમીર અબ્દુલ્લાયાને એક નિવેદન જાહેર કરીને ઈઝરાયેલને ખુલ્લી ચેતવણી આપી હતી.
તેમણે કહ્યું હતું કે, 'જો ઈઝરાયેલ ગાઝા પર તેના યુદ્ધ અપરાધો કરવાનું બંધ નહીં કરે તો તેને અન્ય ઘણા મોરચે પણ લડવાની ફરજ પડી શકે છે.' 'એવું થઈ શકે છે કે ગાઝા પર તેના યુદ્ધ અપરાધો આ યુદ્ધને એવી જગ્યાએ લઈ જાય જ્યાં તેને રોકવું ખૂબ મુશ્કેલ બની જાય.'
'ઈઝરાયેલ-ઈરાન કટ્ટર દુશ્મન છે'
ઈઝરાયેલ અને ઈરાન મધ્ય પૂર્વમાં એકબીજાના કટ્ટર દુશ્મન માનવામાં આવે છે. મધ્ય પૂર્વના નિષ્ણાતો પણ કહે છે કે તેહરાન-તેલ અવીવ તેમની દુશ્મનાવટમાં એટલી ઝડપથી આગળ વધ્યા છે કે તેને ખતમ કરવા માટે ઈરાને હમાસ સાથે હાથ મિલાવ્યા છે અને હવે તે તેના માટે ખુલ્લું સમર્થન પણ એકત્રિત કરી રહ્યું છે. એટલું જ નહીં, તેણે આ માટે તેલ અવીવને ચેતવણી પણ આપી છે.
