નેપાળના મેયરની દીકરી ગોવામાં ગુમ થઈ, સર્ચ ઓપરેશન બાદ મળી આવતા હાશકારો

• નેપાળના મેયરની દીકરી ગોવામાં ગુમ થતા સોશિયલ મીડિયાની મદદ લેવાઈ
  
• ગોવા પોલીસે લોકેશનના આધારે દીકરીને શોધી કાઢીને પિતાને સોંપી
• સોશિયલ મીડિયા ઉપરાંત પોલીસની મદદને લીધે દીકરીને શોધી કાઢવામાં મળી સફળતા

નેપાળની એક યુવતી ગોવામાં ગુમ થઈ હોવાની માહિતી સામે આવી છે. આ યુવતી બીજું કોઈ નહીં પણ નેપાળના ધનગઢી સબ-મેટ્રોપોલિટન સિટીના મેયર ગોપાલ હમાલની પુત્રી આરતી હમાલ છે. આરતી છેલ્લા કેટલાક મહિનાઓથી ગોવામાં હતી અને ઓશો મેડિટેશન સેન્ટરમાં કામ કરતી હતી. સોમવારે રાત્રે 9.30 વાગ્યે અશ્વેમ બ્રિજ પાસે આરતી છેલ્લે જોવા મળી હતી. જોકે, ગોવા પોલીસે તેને શોધી કાઢી છે. ઓશોના ધ્યાન કેન્દ્રમાં જોડાવા ગયેલી આરતી હમાલનો કોઈ સંપર્ક કરી શક્યું ન હતું. પિતાએ કાઠમંડુમાં ભારતીય દૂતાવાસ દ્વારા ગોવા પોલીસનો સંપર્ક કર્યો છે. ધનગઢીના મેયર ગોપાલ હમાલે સોશિયલ મીડિયા પ્લેટફોર્મ ફેસબુક પર તેમની પુત્રીને શોધવામાં મદદ માટે અપીલ કરી હતી. તેણે ગોવા સરકાર અને ગોવા પોલીસને તેની પુત્રીને શોધવા માટે અપીલ કરી હતી.

મેયરે ગોવા પોલીસનો સંપર્ક કર્યો

મેયર હમાલે કહ્યું હતું કે તેમની નાની પુત્રી અને જમાઈ તેમને શોધવા ગોવા પહોંચ્યા છે. બે દિવસથી ગુમ થયેલી પુત્રીને શોધવા માટે ગોવા પોલીસનો પણ સંપર્ક કરવામાં આવ્યો છે. તેમણે કહ્યું કે આરતીનું છેલ્લું લોકેશન ગોવાના જોરબા અશ્વેમ બ્રિજ પાસે હતું. દૂતાવાસની પહેલ બાદ ગોવા પોલીસે ગુમ થયાની ફરિયાદ નોંધીને શોધખોળ શરૂ કરી હતી. આ પછી પોલીસે તેની પુત્રી આરતી હમાલને શોધી કાઢી હતી.

મેયરે સોશિયલ મીડિયા દ્વારા મદદ માંગી

અત્યાર સુધી મળેલા સમર્થન બદલ આભાર વ્યક્ત કરતા મેયર હમાલે ગોવાના સમુદાયને અપીલ કરી અને તેમની પુત્રીને શોધવા વિનંતી કરી. તેમણે આ સર્ચ ઓપરેશનમાં એકતા અને સહકારના મહત્વ પર ભાર મૂક્યો હતો. ગોવામાં આરતીના મિત્રોએ તેના ગુમ થવા અંગે ચિંતા વ્યક્ત કરી હતી. આ પછી મેયર હમાલે સોશિયલ મીડિયા પ્લેટફોર્મ દ્વારા લોકો અને પોલીસ અને અધિકારીઓ પાસેથી મદદ માંગી છે. આ ઉપરાંત, તેઓએ આ માટે કેટલાક સંપર્ક નંબરો પણ જાહેર કર્યા હતા.