પ્રીતિ પટેલે પોતાની સરકાર અને કાનૂની પ્રક્રિયા પર પ્રહાર કરતા કહ્યુ કે છે, કેસમાં વિલંબથી ભારત અને યુકે વચ્ચેના સંબંધો પર નકારાત્મક અસર પડી છે.
પ્રીતિ પટેલે વ્યક્ત કરી નારાજગી
યુકેના ભૂતપૂર્વ ગૃહમંત્રી પ્રીતિ પટેલે નીરવ મોદીના ભારત પ્રત્યાર્પણમાં વિલંબ માટે પોતાના દેશની સિસ્ટમની ટીકા કરતા કહ્યું કે, તેનાથી ભારત-યુકે સંબંધો અને પરસ્પર વિશ્વાસને નુકસાન થયું છે. તેમણે કહ્યું કે, જો યુકેની સિસ્ટમ યોગ્ય રીતે કામ કરતી હોત, તો નીરવ મોદી અત્યાર સુધીમાં ભારતીય જેલમાં હોત. પ્રીતિ પટેલે કહ્યું કે તેઓ આશ્ચર્યચકિત અને નિરાશ છે કે પ્રત્યાર્પણના આદેશ પર હસ્તાક્ષર થયાના વર્ષો પછી પણ નીરવ મોદી યુકેમાં છે.
2021માં પ્રત્યાર્પણ હુકમ પર હસ્તાક્ષર
પ્રીતિ પટેલે એપ્રિલ 2021માં ભાગેડુ હીરા વેપારી નીરવ મોદીના પ્રત્યાર્પણ હુકમ પર હસ્તાક્ષર કર્યા હતા. આ પહેલા, બ્રિટિશ અદાલતોએ એવું માન્યું હતું કે, ભારતમાં તેની સામે કાર્યવાહી કરવા માટે પૂરતા આધારો અસ્તિત્વમાં છે. પટેલે મોદી હજુ પણ યુકેમાં હોવાનો આઘાત અને દુઃખ વ્યક્ત કર્યું હતુ. તેણીએ કહ્યું કે પંજાબ નેશનલ બેંકમાં કથિત $2 બિલિયન છેતરપિંડી અને મની લોન્ડરિંગ કેસના સંબંધમાં વોન્ટેડ ઉદ્યોગપતિને પ્રત્યાર્પણ કરવામાં નિષ્ફળતાથી ભારત સરકાર ખૂબ જ નારાજ છે. તેણીએ કહ્યું કે જો આપણી સિસ્ટમે સમજદારીપૂર્વક કામ કર્યું હોત અને પ્રક્રિયાઓ અને બહાનાઓમાં ફસાઈ જવાને બદલે યોગ્ય પગલાં લીધા હોત, તો મોદી આ દેશમાં ન હોત અને અત્યાર સુધીમાં તેને દેશનિકાલ કરવામાં આવ્યો હોત.
'નીરવ અત્યાર સુધીમાં ભારતીય જેલમાં હોત'
પ્રીતિ પટેલે કહ્યું કે કાનૂની પ્રક્રિયા પૂર્ણ થયા પછી, નીરવ મોદીએ અત્યાર સુધીમાં ભારતમાં તેની સજા ભોગવવાનું શરૂ કરી દેવું જોઈતું હતું. તેણીએ કહ્યું, તેમણે ભારતીય જેલમાં તેની સજા ભોગવવી જોઈતી હતી, અને આ કાનૂની પ્રક્રિયા અનુસાર થવું જોઈતું હતું. યુકે પ્રત્યાર્પણ કાયદા અને સંધિઓનો આ જ હેતુ છે. તેણીએ આ લાંબા વિલંબને યુકે સિસ્ટમનો ખુલ્લેઆમ દુરુપયોગ અને બ્રિટિશ કરદાતાઓનું અપમાન ગણાવ્યું.
ભારત-યુકે સંબંધો પર અસર
તેણીએ દાવો કર્યો હતો કે 2019 અને 2022 વચ્ચે ગૃહ સચિવ તરીકેના તેમના કાર્યકાળ દરમિયાન આ કેસ રાજદ્વારી પડકારો પણ ઉભા કરે છે. તેમણે સમજાવ્યું કે ભારત પ્રત્યાર્પણનો મુદ્દો ઉકેલાય ત્યાં સુધી જેમની આશ્રય અરજીઓ નકારી કાઢવામાં આવી હતી તેમને પાછા લેવામાં સહકાર આપવા તૈયાર નહોતું. તેમણે કહ્યું, ભારતને જેમની આશ્રય અરજીઓ નકારી કાઢવામાં આવી હતી તેમને પાછા લેવા માટે મનાવવું મારા માટે એક મોટો પડકાર હતો. અને હું માનું છું કે આ એટલા માટે હતું કારણ કે અમારી પાસે આ હાઇ-પ્રોફાઇલ કેસ હતો.
આ પણ વાંચોઃ 'કોઈ મને ન બતાવે કે અમારે શું વેચવું અને શું નહીં...', તુર્કીને F-35 જેટ આપવા મુદ્દે નેતન્યાહૂ પર ભડક્યા