અમેરિકાના મિશિગનમાં ગોળીબારની એક ઘટનામાં એક કિશોર અને ચાર વયસ્કોના મોત થયા છે.આ ઘટના બાદ ભાગી રહેલા બંદૂકધારીની વ્યાપક સ્તરે શોધખોળ હાથ ધરવામાં આવી હતી અને આખરે તેનો મૃતદેહ જંગલ વિસ્તારમાંથી મળી આવ્યો હતો.પોલીસના જણાવ્યા અનુસાર,એક 13 વર્ષની કિશોરી બચી ગઈ છે અને તેની હાલત સ્થિર છે.મિસૌકી કાઉન્ટીમાં શોધખોળ બાદ 39 વર્ષીય ચાડ હિકમેન મૃત હાલતમાં મળી આવ્યો હતો.પોલીસે શનિવારે પીડિતોની ઉંમર અને લિંગ અંગેની માહિતી આપી હતી પરંતુ તેઓ એકબીજા સાથે કે શંકાસ્પદ સાથે કેવી રીતે જોડાયેલા હતા તે સ્પષ્ટ કર્યું ન હતું.
પોલીસને એક ઘરમાં ગોળીબારની માહિતી મળી
મિશિગન સ્ટેટ પોલીસે જણાવ્યું કે શુક્રવારે સવારે અધિકારીઓને ડેટ્રોઇટથી લગભગ 170 માઇલ ઉત્તર-પશ્ચિમમાં આવેલા એક ઘરમાં ગોળીબારની માહિતી મળી હતી.ત્યાં તેમને 16 વર્ષના એક છોકરા એક પુરુષ (45) અને એક મહિલા (40)ના મૃતદેહ મળ્યા હતા સાથે જ એક કિશોરી (13) ગંભીર હાલતમાં મળી આવી હતી. અધિકારીઓનું કહેવું છે કે હિકમેન ઘટનાસ્થળેથી ભાગી ગયો હતો જે બાદ મોટા પાયે સર્ચ ઓપરેશન શરૂ કરવામાં આવ્યું હતું.પોલીસને બીજા એક ઘરમાંથી એક પુરુષ (53)નો મૃતદેહ મળ્યો હતો અને ત્યારબાદ જંગલમાં હિકમેનની પાસે એક મહિલા (29)નો મૃતદેહ મળ્યો હતો. પોલીસે જણાવ્યું કે તમામ પીડિતોના મોત ગોળી વાગવાથી થયા છે.
વર્જિનિયા સ્ટેટ યુનિવર્સિટીમાં ગોળીબાર
બીજી તરફ, શનિવારે વહેલી સવારે વર્જિનિયા સ્ટેટ યુનિવર્સિટીમાં અનેક શંકાસ્પદો સામેલ હોય તેવી ગોળીબારની ઘટનામાં પાંચ લોકો ઈજાગ્રસ્ત થયા છે. આ ઘટના બાદ કેમ્પસને લોકડાઉન કરી દેવામાં આવ્યું હતું અને પોલીસે તપાસ શરૂ કરી હતી, જ્યારે વિદ્યાર્થીઓ નવા શૈક્ષણિક સત્રની તૈયારી કરી રહ્યા હતા. આ ઘટના યુનિવર્સિટીના ‘ક્વાડ એનેક્સ’ પાસે બની હતી, જ્યાં કેમ્પસ પોલીસ અને ચેસ્ટરફીલ્ડ કાઉન્ટીના અધિકારીઓને કેમ્પસ ડોર્મિટરી બહાર પાંચ લોકો ગોળી વાગવાથી ઈજાગ્રસ્ત હાલતમાં મળ્યા હતા. યુનિવર્સિટીએ એક નિવેદનમાં જણાવ્યું કે ઈજાગ્રસ્તોમાંથી ઓછામાં ઓછો એક વ્યક્તિ વિદ્યાર્થી હોવાની પુષ્ટિ થઈ છે.
શનિવારે મોડી રાત સુધી ગોળીબારની તપાસ ચાલી રહી હતી
શનિવારે મોડી રાત સુધી ગોળીબારની તપાસ ચાલી રહી હતી. આ ઘટના વર્જિનિયા સ્ટેટના શૈક્ષણિક સત્રની શરૂઆતના સમયે જ બની છે. યુનિવર્સિટીની વેબસાઇટ અનુસાર, વિદ્યાર્થીઓ માટે રેસિડન્સ હોલ એક અઠવાડિયા પહેલા જ ખુલ્યા હતા અને સોમવારથી વર્ગો શરૂ થવાના છે. ઘણા વિદ્યાર્થીઓએ નવા આવનારા વિદ્યાર્થીઓ માટે યુનિવર્સિટીનો 'ન્યૂ ટ્રોજન એક્સપિરિયન્સ' પ્રોગ્રામ હજુ હમણાં જ પૂરો કર્યો હતો.યુનિવર્સિટીએ શનિવારે સવારે એક નિવેદનમાં જણાવ્યું હતું કે ગોળીબારમાં અનેક શંકાસ્પદો સામેલ છે. પાછળથી જારી કરાયેલા નિવેદનમાં જણાવાયું હતું કે કાયદો અને વ્યવસ્થા જાળવતી એજન્સીઓને કેમ્પસ સમુદાય માટે કોઈ તાત્કાલિક જોખમ જણાયું નથી અને કેમ્પસનું લોકડાઉન હટાવી લેવામાં આવ્યું છે.
ઈજાગ્રસ્તોની સ્થિતિ અને સુરક્ષા પગલાં
પોલીસ અને યુનિવર્સિટીના અધિકારીઓએ પીડિતોમાંથી કોઈની પણ ઓળખ છતી કરી નથી. કાઉન્ટી પોલીસે જણાવ્યું કે પાંચેય લોકોને હોસ્પિટલ લઈ જવામાં આવ્યા હતા. શરૂઆતમાં જેમાંથી એકની ઈજાઓ જાનલેવા બતાવવામાં આવી હતી, તેમની હાલત હવે ગંભીર કહેવાય છે. પોલીસે કહ્યું કે બાકીના લોકોને એવી ઈજાઓ થઈ છે જેથી જીવનું જોખમ નથી. યુનિવર્સિટીએ જણાવ્યું કે જે વ્યક્તિ વિદ્યાર્થી હોવાની પુષ્ટિ થઈ છે, તેને મામૂલી ઈજાઓ થઈ હતી અને તેને હોસ્પિટલમાંથી રજા આપી દેવામાં આવી છે.
આ પણ વાંચોઃ Vadodara News: શાળાના રમતના મેદાનમાં ફૂટબોલ રમતા વિદ્યાર્થીને વીજ કરંટ લાગતા મોત નિપજ્યું
