ભારત અને કેનેડા વચ્ચે છેલ્લા બે વર્ષથી ચાલી રહેલા રાજદ્વારી તણાવ અને શીતયુદ્ધ જેવી સ્થિતિ બાદ આખરે મડાગાંઠ ઉકેલાતી જણાય છે. ભારતના રાષ્ટ્રીય સુરક્ષા સલાહકાર (NSA) અજિત ડોભાલે તાજેતરમાં 6 અને 7 ફેબ્રુઆરીના રોજ કેનેડાની રાજધાની ઓટાવાની મુલાકાત લીધી હતી. આ મુલાકાત માત્ર ઔપચારિક નહોતી, પરંતુ બંને દેશો વચ્ચેના ખરડાયેલા સંબંધોને ફરીથી પાટા પર લાવવા માટેનું એક મહત્વપૂર્ણ પગલું સાબિત થયું છે.
સુરક્ષા અને ગુપ્તચર માહિતીનું આદાન-પ્રદાન
મુલાકાતના બીજા દિવસે, 7 ફેબ્રુઆરીએ અજિત ડોભાલે કેનેડાના વડાપ્રધાનના નાયબ સચિવ અને રાષ્ટ્રીય સુરક્ષા તથા ગુપ્તચર સલાહકાર નતાલી ડ્રુઇન સાથે લાંબી મંત્રણા કરી હતી. આ બેઠક નિયમિત દ્વિપક્ષીય સુરક્ષા સંવાદનો એક ભાગ હતી, જેનો મુખ્ય હેતુ બંને દેશો વચ્ચે વિશ્વાસનું વાતાવરણ ઊભું કરવાનો હતો. આ પૂર્વે ડોભાલે કેનેડાના જાહેર સલામતી મંત્રી ગેરી આનંદસંગી સાથે પણ મહત્વપૂર્ણ મુદ્દાઓ પર ચર્ચા કરી હતી.
સંયુક્ત કાર્ય યોજના અને સંપર્ક અધિકારીઓ
આ બેઠકમાં સૌથી મહત્વનો નિર્ણય સંયુક્ત કાર્ય યોજના વિકસાવવાનો લેવાયો છે. ભારત અને કેનેડા હવે રાષ્ટ્રીય સુરક્ષા અને કાયદો-વ્યવસ્થા જાળવવા માટે એકબીજાને સહકાર આપશે. આ પ્રક્રિયાને વેગ આપવા માટે બંને દેશોએ પરસ્પર સંપર્ક અધિકારીઓ ની નિમણૂક કરવાનો નિર્ણય લીધો છે. આ અધિકારીઓ સુરક્ષા એજન્સીઓ વચ્ચે સેતુ બનીને કામ કરશે, જેથી કોઈપણ કટોકટી કે ગુનાહિત પ્રવૃત્તિ સમયે સમયસર માહિતીની આપ-લે થઈ શકે.
મુખ્ય મુદ્દાઓ પર ધ્યાન કેન્દ્રિત
બંને દેશો નીચે મુજબના ગંભીર મુદ્દાઓ પર સાથે મળીને કામ કરવા સંમત થયા છે:
ડ્રગ હેરફેર: ખાસ કરીને જીવલેણ 'ફેન્ટાનાઇલ' સંબંધિત રસાયણોના ગેરકાયદે વેપારને રોકવો.
સંગઠિત અપરાધ: આંતરરાષ્ટ્રીય સ્તરે ચાલતા ક્રાઈમ નેટવર્ક અને ગેંગસ્ટરો સામે કડક કાર્યવાહી.
સાયબર સુરક્ષા: સાયબર હુમલાઓ રોકવા માટે ઔપચારિક નીતિઓ ઘડવી અને ટેકનિકલ માહિતી શેર કરવી.
ઇમિગ્રેશન અને છેતરપિંડી: વિઝા છેતરપિંડી અને ઇમિગ્રેશનને લગતી સમસ્યાઓનો ઉકેલ આંતરરાષ્ટ્રીય નિયમો મુજબ લાવવો.
આ પણ વાંચોઃ Epstein Files: અમેરિકાથી નોર્વે સુધીના દિગ્ગજ નેતાઓની ખુરશી જોખમમાં, એક બાદ એક આપી રહ્યા છે રાજીનામાં
