બ્રિટનમાં એર ટ્રાફિક કંટ્રોલની સિસ્ટમમાં ગંભીર ટેક્નિકલ ખામી સર્જાવાને કારણે મંગળવારે બ્રિટનના એરપોર્ટ્સ પર એક હજારથી વધુ ઉડાનો રદ કરવામાં આવી હતી જેના કારણે હજારો મુસાફરો કલાકો સુધી વિમાનોમાં અને ટર્મિનલ્સ પર ફસાયા હતા.બ્રિટનની નેશનલ એર ટ્રાફિક સર્વિસે સાંજના સમયે ફ્લાઇટ પ્રોસેસિંગ સિસ્ટમની આ સમસ્યાને ઉકેલી લીધી હોવાની જાહેરાત કરી હતી પરંતુ મુસાફરોની લાંબી કતારો અને બેકલોગને સાફ કરવામાં એરપોર્ટ્સ અને એરલાઇન્સને ભારે મુશ્કેલીનો સામનો કરવો પડ્યો હતો. જેના કારણે બ્રિટનના 15 જેટલા એરપોર્ટ્સ પર તેની વ્યાપક અસર જોવા મળી હતી.

હીથ્રો અને ગેટવિક એરપોર્ટ પ્રભાવિત

ગેટવિક એરપોર્ટ પર રાયનએરની આયર્લેન્ડની ફ્લાઇટ પકડવા આવેલા મુસાફરે વિમાનમાં ત્રણ કલાક વિતાવ્યા બાદ તેમની ફ્લાઇટ રદ થઈ હોવાનું જણાવ્યું હતું. તેમણે એરપોર્ટની સ્થિતિ વર્ણવતા કહ્યું હતું કે,ત્યાંથી બહાર નીકળવું એ સાફ્રાસિસ્કો ખાડીની અલ્કાટ્રાઝ જેલમાંથી છૂટવા જેવું મુશ્કેલ લાગતું હતું.લંડનના હીથ્રો એરપોર્ટ પરથી રવાના થતી ઉડાનો તો ફરી શરૂ થઈ ગઈ હતી પરંતુ આ અરાજકતાને કારણે વ્યસ્ત હીથ્રો એરપોર્ટ પર રાત્રિ દરમિયાન આવનારી તમામ ફ્લાઇટ્સ સ્થગિત કરી દેવામાં આવી હતી અને આગામી સમયમાં પણ ભારે વિલંબ થવાની ચેતવણી આપવામાં આવી હતી.હીથ્રો એરપોર્ટ પર બાલ્ટીમોર જનારી બ્રિટિશ એરવેઝની ફ્લાઇટના મુસાફરો ચાર કલાક સુધી જમીન પર વિમાનમાં જ બેસી રહ્યા હતા. 

સામાન મેળવવા માટે ભારે અફરાતફરી મચી ગઈ

આ દરમિયાન ફ્લાઇટ અટેન્ડન્ટ્સે મુસાફરોને પાસ્તા અને ચિકન કરી પીરસ્યા હતા અને મુસાફરો મૂવી જોઈને કે ગેલરીમાં ચાલીને સમય પસાર કરી રહ્યા હતા.જોકે, બાદમાં તેમને ફ્લાઇટ રદ થવાની જાણ થતાં સામાન મેળવવા માટે ભારે અફરાતફરી મચી ગઈ હતી. બ્રિટિશ એરવેઝે આ ઘટનાને કારણે 100થી વધુ ફ્લાઇટ્સ રદ કરવી પડી કે ડાયવર્ટ કરવી પડી હોવાનું જણાવ્યું હતું.જ્યારે બજેટ એરલાઇન રાયનએરે 50થી વધુ ફ્લાઇટ્સ રદ કરી હતી અને તેના 65 હજારથી વધુ મુસાફરો પ્રભાવિત થયા હોવાનું જણાવ્યું હતું.આ ઉપરાંત સ્ટેન્સ્ટેડ,સિટી, મેન્ચેસ્ટર, બર્મિંગહામ અને સ્કોટલેન્ડના એરપોર્ટ્સ પર પણ તેની ગંભીર અસર જોવા મળી હતી. જ્યારે ઇઝીજેટએ પણ આ સિસ્ટમ ફેલ્યોરને કારણે યુરોપભરમાં ઉડાનો મોડી પડી હોવાની પુષ્ટિ કરી હતી.

આ પણ વાંચોઃ નવસારીમાં માછી સમાજ દ્વારા ભવ્ય નિઃશુલ્ક સર્વ રોગ નિદાન કેમ્પ યોજાયો