યુનાઇટેડ એરલાઇન્સની ફ્લાઇટ 1837માં એક મુસાફરે ફ્લાઇટ અટેન્ડન્ટ પર હુમલો કરી કોકપિટમાં ઘૂસવાનો પ્રયાસ કર્યો હતો, જેના કારણે પાયલટે ઇમરજન્સી લેન્ડિંગ કરવું પડ્યું હતું. ન્યૂયોર્કમાં વિમાન ઉતરતાની સાથે જ મુસાફરને કસ્ટડીમાં લેવામાં આવ્યો હતો.
શનિવારે યુનાઇટેડ એરલાઇન્સની ફ્લાઇટ 1837માં તે સમયે અફરાતફરી મચી ગઈ જ્યારે એક મુસાફરે કથિત રીતે ફ્લાઇટ અટેન્ડન્ટ પર હુમલો કર્યો અને જબરદસ્તી કોકપિટમાં ઘૂસવાનો પ્રયત્ન કર્યો. આ વિમાન સાંજે લગભગ 6 વાગ્યે ન્યૂ જર્સીના નેવાર્ક લિબર્ટી ઇન્ટરનેશનલ એરપોર્ટ પર પહોંચવાનું હતું, ત્યારે જ સ્થિતિ વણસી હતી અને પાયલટે ઇમરજન્સી જાહેર કરવી પડી હતી.
અહેવાલો અનુસાર, 48 વર્ષનો એક મુસાફર અચાનક આક્રમક બની ગયો હતો. વિમાન સુરક્ષિત રીતે લેન્ડ થયા બાદ પોર્ટ ઓથોરિટી પોલીસે તેની તાત્કાલિક અટકાયત કરી હતી અને માનસિક સ્વાસ્થ્ય તપાસ માટે હોસ્પિટલ મોકલી આપ્યો હતો. રાહતની વાત એ રહી કે આ સમગ્ર ઘટનામાં કોઈ પણ મુસાફર કે ક્રૂ મેમ્બરને ઈજા થઈ નથી.
યુનાઇટેડ એરલાઇન્સનું નિવેદન
યુનાઇટેડ એરલાઇન્સે એક નિવેદન જારી કરીને આ ઘટનાની પુષ્ટિ કરી છે અને તમામ મુસાફરો તથા કર્મચારીઓની સુરક્ષા સુનિશ્ચિત કરવામાં ક્રૂ મેમ્બર્સની ત્વરિત કાર્યવાહીની પ્રશંસા કરી છે. કંપનીના જણાવ્યા અનુસાર, કર્મચારીઓની ઝડપી અને વ્યાવસાયિક કાર્યવાહીને કારણે તમામ મુસાફરો અને સ્ટાફની સુરક્ષા સુનિશ્ચિત કરી શકાઈ હતી. એરલાઇને જણાવ્યું કે વિમાન પહોંચતાની સાથે જ સ્થાનિક કાયદા અમલીકરણ એજન્સીઓ સ્થિતિ સંભાળવા માટે હાજર હતી.
શું છે સજાની જોગવાઈ?
અમેરિકન કાયદા હેઠળ, કોઈપણ વ્યક્તિ જે ફ્લાઇટ ક્રૂના સભ્ય (જેમાં ફ્લાઇટ અટેન્ડન્ટ પણ સામેલ છે) પર હુમલો કરે છે, તેમને ડરાવે છે અથવા તેમના કામમાં અવરોધ ઊભો કરે છે, તો તેણે ગંભીર પરિણામો ભોગવવા પડી શકે છે. આવા કિસ્સાઓમાં દોષિત સાબિત થવા પર 20 વર્ષ સુધીની જેલ, ભારે દંડ (લગભગ 2.5 લાખ ડોલર) અથવા બંને સજા થઈ શકે છે. આ ઉપરાંત, ફેડરલ એવિએશન એડમિનિસ્ટ્રેશન (FAA)ની 'ઝીરો ટોલરન્સ' નીતિ હેઠળ અલગથી સિવિલ પેનલ્ટી પણ લાદવામાં આવી શકે છે.
ફેબ્રુઆરીમાં પણ આવી જ ઘટના બની હતી
વિમાનમાં આ પ્રકારની ઘટના બની હોય તેવું આ પહેલીવાર નથી. આ પહેલા 18 ફેબ્રુઆરીએ ડેલ્ટા એર લાઇન્સની ફ્લાઇટ 2557માં પણ એક મુસાફરે કોકપિટ સુધી પહોંચવાનો પ્રયાસ કર્યો હતો, ત્યારબાદ ફ્લાઇટ ક્રૂએ કટોકટી જાહેર કરી હતી. એર ટ્રાફિક કંટ્રોલ પર પાયલટોએ જણાવ્યું હતું કે એક મુસાફર ઉભો થયો અને કોકપિટમાં ઘૂસવાનો પ્રયાસ કર્યો. આરોપ છે કે તે મુસાફરે બીજા મુસાફર પર પણ હુમલો કર્યો હતો.
મુસાફરો અને ક્રૂની મદદથી આરોપીને કાબૂમાં લેવામાં આવ્યો હતો. ત્યારબાદ બોઇંગ 717 વિમાન લગભગ 17 મિનિટ પછી હોબી એરપોર્ટ (Hobby Airport) પર પાછું ફર્યું હતું. પોલીસે તે મુસાફરને કસ્ટડીમાં લીધો હતો અને લગભગ 90 મિનિટના વિલંબ બાદ ફ્લાઇટ ફરી શરૂ થઈ હતી. ડેલ્ટાએ આ ઘટનાને અસ્તવ્યસ્ત અને ગેરકાયદેસર વર્તન ગણાવ્યું હતું.
આ પણ વાંચો:Iran યુદ્ધ સમાપ્ત કરવાની તૈયારીમાં! US મોકલ્યો આ શાંતિ પ્રસ્તાવ, જાણો કેટલાં મુદ્દાઓ સામેલ ?
