ફેડરલ બ્યુરો ઓફ ઇન્વેસ્ટિગેશન (FBI)એ નવા વર્ષની પૂર્વ સંધ્યાએ ઉત્તર કેરોલિનામાં થનારી એક ગંભીર આતંકી હુમલાની યોજના નિષ્ફળ બનાવી છે. આ મામલે 18 વર્ષીય યુવાન ક્રિશ્ચિયન સ્ટર્ડિવન્ટની ધરપકડ કરવામાં આવી છે. FBI મુજબ, આ યુવાન ઇસ્લામિક સ્ટેટ (ISIS)થી પ્રેરિત હતો અને કરિયાણાની દુકાન તથા ફાસ્ટ-ફૂડ રેસ્ટોરન્ટ પર હુમલો કરવાની યોજના બનાવી રહ્યો હતો.
FBIના સ્પેશિયલ એજન્ટનું શું કહેવું છે ?
FBIના સ્પેશિયલ એજન્ટ જેમ્સ બાર્નેકલે જણાવ્યું કે સ્ટર્ડિવન્ટના ઘર અને ફોનની તપાસ દરમિયાન એક હસ્તલિખિત મેનિફેસ્ટો મળ્યો હતો, જેમાં હુમલાની સંપૂર્ણ યોજના લખેલી હતી. તેમાં તેણે છરી અને હથોડી વડે લોકોને મારવાની યોજના દર્શાવી હતી. આ સાથે જ તેણે પોલીસ પર હુમલો કરીને “પોલીસના હાથે મરવાની” ઈચ્છા પણ વ્યક્ત કરી હતી.
ગુપ્ત એજન્ટ સામે પોતાની યોજના વ્યક્ત કરી
તપાસ દરમિયાન સ્ટર્ડિવન્ટે એક ગુપ્ત FBI એજન્ટને પોતાનો વિશ્વાસુ સાથી માનીને હુમલાની તમામ વિગતો આપી હતી. FBIએ ક્રિસમસથી જ તેના પર નજર રાખી હતી, કારણ કે તેમને ભય હતો કે તે કોઈ પણ સમયે હિંસા કરી શકે છે. અધિકારીઓએ સ્પષ્ટ કર્યું કે જો તે હથિયારો લઈને ઘરની બહાર નીકળ્યો હોત, તો તરત જ તેની ધરપકડ કરવામાં આવત.
સોશિયલ મીડિયા અને ઉગ્રવાદી વિચારધારા
સોગંદનામા મુજબ, સ્ટર્ડિવન્ટ એક એવા સોશિયલ મીડિયા એકાઉન્ટ સાથે જોડાયેલો હતો જે ISIS સમર્થક સામગ્રી પોસ્ટ કરતું હતું. એકાઉન્ટના નામમાં ISISના ભૂતપૂર્વ નેતા અબુ બકર અલ-બગદાદીનો ઉલ્લેખ હતો. આ પરથી સ્પષ્ટ થાય છે કે આજના સમયમાં ISIS એક વિચારધારા અને “બ્રાન્ડ” તરીકે યુવાનોને પ્રભાવિત કરી રહી છે, ભલે સંગઠનની સીધી ભૂમિકા ન હોય.
અગાઉની હિંસક ઘટનાઓનો સંદર્ભ
આ ઘટના ન્યૂ ઓર્લિયન્સમાં ગયા વર્ષે થયેલા હુમલા પછી સામે આવી છે, જેમાં 14 લોકોના મોત થયા હતા. અગાઉ પણ 2015માં સાન બર્નાર્ડિનો અને 2016માં ઓર્લાન્ડોમાં ISIS પ્રેરિત હુમલાઓમાં અનેક લોકોના જીવ ગયા હતા. કોર્ટના દસ્તાવેજો અનુસાર, જો સ્ટર્ડિવન્ટ દોષિત સાબિત થાય તો તેને 20 વર્ષ સુધીની જેલની સજા થઈ શકે છે. FBIના સ્ટિંગ ઓપરેશન અને સતર્કતાના કારણે એક મોટી દુર્ઘટના અટકાવી શકાઈ છે, જે સુરક્ષા એજન્સીઓની જાગૃતાના કારણે શક્ય બન્યું છે.
આ પણ વાંચો : Imran Khanના સમર્થનમાં પોસ્ટ કરવી પડી ભારે, Pakistanમાં 4 પત્રકારોને આજીવન કેદની સજા ફટકારાઇ
