મધ્ય-પૂર્વમાં ચાલી રહેલા યુદ્ધના સંકટ વચ્ચે શુક્રવાર, 6 માર્ચ, 2026ના રોજ એક અત્યંત ચોંકાવનારા સમાચાર સામે આવ્યા છે. અમેરિકી સૈન્યએ દાવો કર્યો છે કે તેમણે ઈરાનના સૌથી શક્તિશાળી ડ્રોન વહન કરતા જહાજ પર ભીષણ હુમલો કરીને તેને સમુદ્રમાં ડૂબાડી દીધું છે. આ હુમલા સાથે જોડાયેલો એક બ્લેક-એન્ડ-વ્હાઇટ વીડિયો પણ યુનાઇટેડ સ્ટેટ્સ સેન્ટ્રલ કમાન્ડ (CENTCOM) દ્વારા જાહેર કરવામાં આવ્યો છે, જેમાં જહાજ મિસાઇલ પ્રહાર બાદ સળગતું અને ધુમાડાના ગોટા વચ્ચે ડૂબતું દેખાય છે.
CENTCOM એ સોશિયલ મીડિયા પર શેર કરી હુમલાની માહિતી
CENTCOM એ સોશિયલ મીડિયા પ્લેટફોર્મ 'X' પર આ હુમલાની પુષ્ટિ કરતા લખ્યું છે કે, "યુએસ સૈન્ય ઈરાની નૌકાદળને સંપૂર્ણપણે ડૂબાડવાના અને નાશ કરવાના તેના મિશન પર મક્કમ છે અને તે પાછળ હટશે નહીં." અમેરિકાએ આ જહાજની સરખામણી બીજા વિશ્વયુદ્ધના વિમાનવાહક જહાજોના કદ સાથે કરી છે, જે દર્શાવે છે કે આ જહાજ ઈરાન માટે વ્યૂહાત્મક રીતે કેટલું મહત્વનું હતું. જોકે, આ હુમલો સમુદ્રમાં કયા ચોક્કસ સ્થળે થયો તેની વિગતવાર માહિતી હજુ સુધી ગુપ્ત રાખવામાં આવી છે.
શા માટે 'IRIS શાહિદ બાઘેરી' ખાસ હતું?
જે જહાજને અમેરિકાએ નિશાન બનાવ્યું છે તેનું નામ IRIS શાહિદ બાઘેરી છે. રસપ્રદ વાત એ છે કે, આ જહાજ મૂળભૂત રીતે એક કન્ટેનર જહાજ હતું, જેને ઈરાની એન્જિનિયરોએ મોડિફાય કરીને ડ્રોન કેરિયર તરીકે તૈયાર કર્યું હતું. ફેબ્રુઆરી 2025માં જ તેને નૌકાદળમાં સામેલ કરવામાં આવ્યું હતું. આ જહાજની ખાસિયત તેની 180 મીટર લાંબી રનવે હતી, જેના પરથી આધુનિક ડ્રોન લોન્ચ કરી શકાતા હતા. તે ઇંધણ ભર્યા વિના દરિયામાં 22,000 નોટિકલ માઇલ સુધીની મુસાફરી કરવાની ક્ષમતા ધરાવતું હતું, જે તેને ઈરાન માટે સમુદ્રી શક્તિનું પ્રતીક બનાવતું હતું.
ઈરાનનું મૌન અને વૈશ્વિક ચિંતા
અત્યાર સુધી ઈરાની સૈન્ય કે તેહરાન સરકાર દ્વારા આ હુમલા અંગે કોઈ સત્તાવાર સ્વીકાર કે પ્રતિક્રિયા આપવામાં આવી નથી. ઈરાન સામાન્ય રીતે તેના લશ્કરી નુકસાનની માહિતી તાત્કાલિક જાહેર કરવાનું ટાળતું હોય છે. પરંતુ આ હુમલો એવા સમયે થયો છે જ્યારે સમગ્ર વિશ્વની નજર ઈરાન-અમેરિકા વચ્ચેના તણાવ પર છે. આ જહાજ ડૂબી જવાથી ઈરાનની દરિયાઈ હુમલો કરવાની ક્ષમતાને મોટો ફટકો પડ્યો હોવાનું માનવામાં આવે છે.
આ પણ વાંચોઃ Canada મા રહેતા ભારતીય વિદ્યાર્થીઓ માટે સારાં સમાચાર,વિદ્યાર્થીઓને મળશે $25 મિલિયનની શિષ્યવૃત્તિ
